Hezekeli 22:1-31
22 Livi laJehova laphindze lefika kimi latsi:
2 “Ndvodzana yemuntfu, sewukulungele yini kumemetela sehlulelo* kulelidolobha lelinelicala lekucitsa ingati,+ futsi ulente litati tento talo letenyanyekako?+
3 Ubotsi: ‘INkhosi Lephakame Jehova itsi: “Awu wena dolobha lelicitsa ingati,+ sikhatsi sakho sitawufika,+ wena wenta tithico letenyanyekako* kuze utingcolise.+
4 Kucitsa kwakho ingati kukubangele kutsi ube nelicala+ futsi tithico takho letenyanyekako tikungcolisile.+ Sewente emalanga akho ashesha kuphela, futsi kuphela kweminyaka yakho sekufikile. Kungako ngitakwenta ube yintfo yekwetfukwa tive neyekuhlekwa ngiwo onkhe emave.+
5 Emave lasedvutane nawe nalakhashane atakuhleka,+ wena dolobha lelineligama lelingcolile naleligcwele siphitsiphitsi.
6 Nguloyo naloyo mholi waka-Israyeli emkhatsini wakho usebentisa ligunya lakhe kuze acitse ingati.+
7 Khona lakuwe, bedzelela bobabe babo nabomake babo.+ Bemuka bantfu bakuletinye tive tintfo tabo ngebucili futsi baphatsa kabi intsandzane kanye nemfelokati.”’”+
8 “‘Wena ukhobosa tindzawo tami letingcwele, futsi wedzelela nemasabatha ami.+
9 Emkhatsini wakho kunalabanyundzelako, labatimisele kucitsa ingati.+ Khona lakuwe, kunalabadla imihlatjelo etintsabeni nalabachubeka nemkhuba wekutiphatsa kabi.+
10 Kuwe, balala nebafati babobabe babo,*+ futsi balala nebafati labangcolile labasesikhatsini.+
11 Emkhatsini wakho, umuntfu wenta intfo leyenyanyekako ngekulala nemfati wamakhelwane wakhe,+ lomunye ungcolisa makoti wakakhe ngekuya naye ecansini,+ kantsi lomunye ulala nadzadzewabo, indvodzakati yababe wakhe.+
12 Khona lakuwe, bantfu bayadizelwa kuze bacitse ingati.+ Uyabolekisa bese ufuna intalo+ nome inzuzo,* futsi wemuka bomakhelwane+ bakho imali ngebucili. Ecinisweni, sewungikhohlwe mbamba mine,’ kusho iNkhosi Lephakeme Jehova.
13 “‘Iyangenyanyisa inzuzo loyitfole ngekungetsembeki nekucitfwa kwengati emkhatsini wakho.
14 Utawuhlale unesibindzi* yini? Tandla takho titawuchubeka tinemandla yini ngelilanga lengiyakutsatsela ngalo sinyatselo?+ Mine Jehova, ngikhulumile futsi ngitawutsatsa sinyatselo.
15 Ngitakuhlakatela etiveni ngikusakatele nasemaveni,+ futsi ngitakucedza nya kungcola kwakho.+
16 Tive titakwedzelela futsi uyawukwati kutsi mine nginguJehova.’”+
17 Livi laJehova laphindze lefika kimi latsi:
18 “Ndvodzana yemuntfu, bantfu baka-Israyeli sebafana nemfucuta lengenamsebenti kimi. Bonkhe balitfusi, nethini, nensimbi kanye nemthofi lokusemlilweni lomkhulu. Sebayimfucuta yelisiliva.+
19 “Ngako-ke naku lokushiwo yiNkhosi Lephakeme Jehova: ‘Njengobe nonkhe seninjengemfucuta lengenamsebenti,+ ngitanibutsela nonkhe ngekhatsi kweJerusalema.
20 Njengobe lisiliva, litfusi, insimbi, umthofi kanye nethini kufakwa ndzawonye endzaweni yekubasa kute kushiswe ngemlilo bese kuyancibilika, ngitanihlanganisela kanjalo-ke nani entfukutselweni yami naselulakeni lwami, futsi ngitawubasa umlilo etikwenu nginincibilikise.+
21 Ngitanibutsisa ndzawonye nginishise ngemlilo wentfukutselo yami+ bese niyancibilika ngekhatsi kulelidolobha.+
22 Ngendlela lisiliva lelincibilika ngayo emlilweni lomkhulu, niyawuncibilika kanjalo-ke nani ngekhatsi kwalo; futsi niyawukwati kutsi mine Jehova lucobo lwami ngitfululele intfukutselo yami etikwenu.’”
23 Livi laJehova laphindze lefika kimi latsi:
24 “Ndvodzana yemuntfu, khuluma nalelive utsi: ‘Wena ulive lelingeke lihlantwe futsi lelingeke linetfwe yimvula ngelilanga lentfukutselo yami.
25 Baphrofethi balo bakhe licebo ekhatsi kulo+ kuhle kwelibhubesi lelibhodlako nalidzabudzabula silwane.+ Bashwabadzela bantfu.* Batsatsa umcebo netintfo letiligugu ngenkhani. Babangele kutsi bantfu labanyenti kulelive babe bafelokati.
26 Baphristi balo bawephulile umtsetfo wami,+ futsi bachubeka nekungatihloniphi tindzawo tami letingcwele.+ Abehlukanisi emkhatsini walokungcwele nalokuvamile,+ futsi bayehluleka kutjela bantfu umehluko emkhatsini walokuhlantekile nalokungcolile,+ abafuni nekugcina emasabatha ami, bayangedzelela.
27 Tindvuna takhona tifana netimphisi letidzabudzabula silwane; ticitsa ingati futsi tibulala bantfu* kuze titfole inzuzo ngekungetsembeki.+
28 Baphrofethi bakhona bafihle tento tabo letimbi kuhle kwemuntfu ahuca lubondza ngeludzaka lolumhlophe. Babona imibono lengemanga futsi baphengula tintfo letingemanga,+ bese batsi: “Naku lokushiwo yiNkhosi Lephakeme Jehova,” abe Jehova angakase akhulume.
29 Bantfu bakulelive bemuke labanye tintfo tabo ngebucili,+ futsi babagebengile. Babaphetse kabi bantfu labeswele nalabahluphekako futsi batitsetse ngebucili tintfo temuntfu wekuhamba, abavumi nekutsi ehlulelwe ngekulunga.’
30 “‘Bengifuna umuntfu emkhatsini wabo longalungisa lubondza lwematje nome eme embikwami lakunesikhala khona kuze lelive lingabhujiswa,+ kodvwa kute lengimtfolile.
31 Ngako ngitawutfululela intfukutselo yami kubo, ngibacotfule ngemlilo wentfukutselo yami. Ngitakwehlisela imiphumela yetindlela tabo etinhloko tabo,’ kusho iNkhosi Lephakeme Jehova.”
Imibhalo lengentansi
^ NgesiHebheru kutsi, “utakwehlulela yini, utakwehlulela yini?”
^ Leligama lesiHebheru kungenteka lihlobene neligama lelisho “bulongo” futsi lisetjentiswa nakukhulunywa ngendzelelo.
^ NgesiHebheru kutsi, “bembula bungcunu babobabe babo.”
^ Nobe “ufuna intalo lemba ecolo.”
^ NgesiHebheru kutsi, “unenhlitiyo.”
^ Nobe “imiphefumulo.”
^ Nobe “imiphefumulo.”
