Hezekeli 42:1-20
42 Ngako yangitsatsa yangiyisa ebaleni lelingephandle lelingasenyakatfo.+ Yabese ingiyisa esakhiweni lesinemakamelo ekudlela, lebesiseceleni kwendzawo levulekile+ ngasenyakatfo nesakhiwo lesichunyiwe.+
2 Budze baso nawungena ngasenyakatfo bebungemamitha langaba ngu-50,* nalangaba ngu-25* bubanti.
3 Lesakhiwo besisemkhatsini wesiyilo selibala lelingephandle nelibala lelingekhatsi, lebelingemamitha langaba ngu-10* bubanti.+ Tindzawo taso letiphakeme betibukene futsi besititezi letintsatfu.
4 Nasewutawufika emakamelweni ekudlela,* bekunendlela+ lengemamitha langaba sihlanu* bubanti, nalangaba ngu-50 budze,* futsi iminyango yawo beyingasenyakatfo.
5 Emakamelo ekudlela langetulu bekangumntjuntju nakacatsaniswa nalawo esitezi lesisekucaleni nalesisemkhatsini, ngobe letindzawo letiphakeme letikuletitezi betitsetse indzawo lenkhulu.
6 Kuphakama kwalamakamelo ekudlela bekutitezi letintsatfu, kodvwa bekete tinsika letifana naleto betisemabaleni. Kungako lesitezi lebesingetulu saba nendzawo lencane nasicatsaniswa nesitezi lesisekucaleni nalesisemkhatsini.
7 Lubondza lolungephandle lolwakhiwe ngematje lobeluseceleni kwemakamelo ekudlela nawuya ebaleni lelingephandle lebelibukene nemakamelo ekudlela, belingemamitha langaba ngu-25 budze.
8 Budze bemakamelo ekudlela labekangasebaleni lelingephandle bekangemamitha langaba ngu-25, kodvwa lamakamelo ekudlela labekabuke lithempeli bekangemamitha langaba ngu-50.
9 Bekunemnyango longena emakamelweni ekudlela ngasemphumalanga nawusuka ebaleni lelingephandle.
10 Bekuphindze kube nemakamelo ekudlela ngekhatsi kwelubondza lwematje lwelibala lobelungasemphumalanga, eceleni kwendzawo levulekile kanye nesakhiwo.+
11 Embikwawo bekunendlela lefanana nendlela lebeyisemakamelweni ekudlela labekangasenyakatfo.+ Budze nebubanti bawo bebulingana, futsi iminyango yawo kanye nendlela lebekakhiwe ngayo beyifanana. Iminyango yawo
12 beyifanana neminyango yemakamelo ekudlela lebekangaseningizimu. Bekunemnyango ekucaleni kwalendlela nawusengakefiki kulolubondza lobelwakhiwe ngematje nawuya ngasemphumalanga, lapho umuntfu bekangangena khona.+
13 Yabese itsi kimi: “Lamakamelo ekudlela lasenyakatfo nalawo laseningizimu laseceleni kwendzawo levulekile,+ angemakamelo ekudlela langcwele, lapho baphristi labasondzela kuJehova badla khona iminikelo lengcwelengcwele.+ Kuleyondzawo, babeka iminikelo lengcwelengcwele, iminikelo yalokutinhlavu, iminikelo yesono neminikelo yelicala, ngobe lendzawo ingcwele.+
14 Baphristi nabangena, akukafaneli baphume endzaweni lengcwele baye ebaleni lelingephandle bangakatikhumuli timphahla labatisebentisa nabenta lemisebenti,+ ngobe tingcwele. Kufanele bagcoke letinye timphahla nabaya etindzaweni lapho labanye bantfu bavumelekile kutsi babe kuto.”
15 Naseyicedzile kukala indzawo lengekhatsi kwelithempeli,* yangitsatsa yaphuma nami ngendlela leya egedeni lelibuke ngasemphumalanga,+ futsi yakala yonkhe leyo ndzawo.
16 Yakala luhlangotsi lolungasemphumalanga ngemhlanga wekukala.* Budze bayo bebungemamitha langu-1 555* nawusuka eluhlangotsini lunye kuya kulolunye.
17 Yakala neluhlangotsi lolungasenyakatfo, futsi nakusetjentiswa umhlanga wekukala, belungemamitha langu-1 555 budze.
18 Yakala neluhlangotsi lolungaseningizimu, futsi nakusetjentiswa umhlanga wekukala, belungemamitha langu-1 555 budze.
19 Yahamba yatungeleta luhlangotsi lolungasenshonalanga. Belungemamitha langu-1 555 budze nakusetjentiswa umhlanga wekukala.
20 Yakala tonkhe tinhlangotsi tayo letine. Beyinelubondza lolutungeletako,+ lobelungemamitha langu-1 555 budze nalangu-1 555 bubanti,+ kuze yehlukanise indzawo lengcwele nalengasingcwele.+
Imibhalo lengentansi
^ NgesiHebheru kutsi, “emakhyubhitha langu-100.” Loku kubhekisela kumakhyubhitha lamadze. Fundza Sandzisanchazo B14.
^ NgesiHebheru kutsi, “emakhyubhitha langu-50.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ Nobe “emakamelo.”
^ NgesiHebheru kutsi, “emakhyubhitha langu-10.” Fundza Sandzisanchazo B14.
^ NgesiHebheru kutsi, “emakhyubhitha langu-100.” Ngekusho kwe-Greek Septuagint, “emakhyubhitha langu-100 budze.” Imibhalo yesiHebheru itsi: “Indlela yelikhyubhitha.”
^ NgesiHebheru kutsi, “indlu lengekhatsi.”
^ Fundza Sandzisanchazo B14.
^ NgesiHebheru kutsi, “budze lobungangemihlanga lengu-500.” Fundza Sandzisanchazo B14.
