Hezekeli 43:1-27
43 Yabese ingiyisa egedeni lelibuke ngasemphumalanga.+
2 Lapho ngabona inkhatimulo yaNkulunkulu wema-Israyeli ichamuka ngasemphumalanga,+ futsi livi lakhe belifanana nemsindvo wemanti lagijimako;+ umhlaba wakhanyiswa yinkhatimulo yakhe.+
3 Lengakubona bekufana nembono lebengiwubonile ngesikhatsi ngitobhubhisa* lelidolobha, futsi bekubonakala kufanana naloko lebengikubone eceleni kwemfula iKhebari;+ ngabese ngiguca phansi ngiyakhotsama.
4 Inkhatimulo yaJehova yabese ingena ethempelini* ngeligede lelibuke emphumalanga.+
5 Umoya wangiphakamisa wangiyisa ebaleni lelingekhatsi futsi ngabona kutsi lelithempeli beseligcwele inkhatimulo yaJehova.+
6 Ngabese ngiva lotsite akhuluma nami asethempelini, futsi lendvodza yeta kimi yefike yema eceleni kwami.+
7 Yatsi kimi:
“Ndvodzana yemuntfu, lena yindzawo yesihlalo sami sebukhosi,+ nendzawo yekubeka tinyawo+ tami, lapho ngitawuhlala khona nesive sema-Israyeli kuze kube phakadze.+ Bantfu baka-Israyeli angeke baphindze balihlambalate libito lami lelingcwele,+ bona kanye nemakhosi abo, ngekutsi bangetsembeki* kimi nangetidvumbu temakhosi abo nawafa.
8 Babeka umnyango wawo eceleni kwemnyango wami, nensika yesivalo sawo eceleni kwensika yesivalo sami, lapho kunelubondza kuphela loluhlukanisa mine nabo,+ bangcolisa libito lami lelingcwele ngetintfo letenyanyekako labatenta. Ngako-ke, ngabacotfula ngentfukutselo yami.+
9 Nyalo abayekele lokungetsembeki* kwabo futsi abasuse tidvumbu temakhosi abo tibe khashane nami. Mine-ke ngitawubese ngihlala emkhatsini wabo kuze kube phakadze.+
10 “Wena ndvodzana yemuntfu, chaza lithempeli kubantfu baka-Israyeli,+ kuze babe nemahloni ngenca yetono tabo,+ futsi kufanele bahlolisise ipulani yayo.*
11 Nangabe badliwa ngemahloni ngenca yako konkhe labakwentile, kufanele ubakhombise ipulani yetisekelo telithempeli, indlela lelihlelwe ngayo, iminyango yalo yekuphuma kanye neyekungena.+ Bakhombise onkhe emapulani alo aphansi netimiso talo, emapulani alo aphansi nemitsetfo yalo, futsi kubhale phansi loko bakubukile kuze balandzele yonkhe ipulani yetisekelo talelithempeli baphindze bagcine netimiso talo.+
12 Lona ngumtsetfo welithempeli. Yonkhe indzawo lesesicongweni sentsaba ingcwelengcwele.+ Lona ngumtsetfo walelithempeli.
13 “Nayi indlela lebekukalwe ngayo li-al’thare ngemasentimitha*+ (kumasentimitha langaba ngu-50* kwangetwa imphama yesandla).* Sisekelo sayo besingemasentimitha langaba ngu-50, nebubanti baso. Inemncele emngcengcemeni longangemphama yesandla* bubanti. Lesi ngiso sisekelo seli-al’thare.
14 Kusukela esisekelweni lesisesiyilweni kuyofika entfweni yekusimisa letungeletako bekungaba limitha linye,* futsi bubanti baso bebungaba sigamu selimitha. Kusukela entfweni yekusimisa lencane letungeletako kuyofika entfweni yekusimisa lenkhulu, bekungemamitha langaba mabili,* futsi bubanti baso bebungaba sigamu selimitha.
15 Siyilo sendzawo yekubasela saleli-al’thare besingemamitha langaba mabili kuphakama, futsi bekunetimphondvo letine lebetiphakeme tisuka e-al’thare.+
16 Siyilo sendzawo yekubasela yeli-al’thare besisikwele, budze nebubanti baso bebungemamitha langaba sitfupha.*+
17 Tinhlangotsi letine tentfo yekusimisa letungeletako betingemamitha langaba ngu-7* budze nebubanti; umncele lotungeletako bewungemasentimitha langaba ngu-25,* futsi sisekelo sawo besingemasentimitha langaba ngu-50 kuto tonkhe tinhlangotsi.
“Titebhisi tayo betibuke emphumalanga.”
18 Yabese itsi kimi: “Ndvodzana yemuntfu, iNkhosi Lephakeme Jehova itsi: ‘Leti ticondziso lokufanele tilandzelwe nakwakhiwa leli-al’thare kuze kunikelwe kulo iminikelo yekushiswa futsi lifafatwe ngengati.’+
19 “INkhosi Lephakeme Jehova itsi: ‘Kufanele unikele ngenkunzana ibe ngumnikelo wesono+ kubaphristi labangemaLevi labayintalelwane yaSadoki,+ labeta kimi kuze bangikhonte.
20 Kufanele utsatse lenye ingati uyigcobise etimphondvweni letine taleli-al’thare, emakoneni lamane alentfo yekusimisa letungeletako, kanye nasemnceleni lotungeletako, kuze ulihlante esonweni futsi ulihlambulule.+
21 Ubobese utsatsa lenkunzana lengumnikelo wesono, uyishise endzaweni lefanele ethempelini, ngephandle kwendzawo lengcwele.+
22 Ngelilanga lesibili, utawunikela ngembuti lendvuna lephile kahle ibe ngumnikelo wesono; futsi batawuhlanta leli-al’thare esonweni njengobe nje balihlanta esonweni ngenkunzana.’
23 “‘Nasewucedzile kulihlanta esonweni, kufanele unikele ngenkunzana lephile kahle nangemvu lendvuna lephile kahle emhlambini.
24 Kufanele unikele letilwane kuJehova, futsi baphristi kufanele batifake luswayi+ bese batinikela kuJehova tibe ngumnikelo wekushiswa.
25 Kufanele kuphele emalanga langu-7 unikela ngembuti lendvuna kutsi ibe ngumnikelo wesono lilanga ngalinye,+ unikele nangenkunzana emhlambini nangemvu lendvuna emhlambini; kufanele unikele ngetilwane letite sici.
26 Kufanele bahlambulule li-al’thare emalanga langu-7, futsi kufanele balihlante baphindze balente lilungele kusetjentiswa.
27 Nasaphelile lamalanga, ngelilanga lesi-8+ kuchubeke, baphristi batawunikela ngeminikelo yenu* yekushiswa nemihlatjelo yekuthula e-al’thare; futsi ngitawujabula ngani,’+ kusho iNkhosi Lephakeme Jehova.”
Imibhalo lengentansi
^ Kungaphindze kubekwe ngekutsi, “afika.”
^ NgesiHebheru kutsi, “indlu.”
^ Nobe “kugwadlela Nkulunkulu.”
^ Nobe “kugwadlela Nkulunkulu.”
^ NgesiHebheru kutsi, “bakale indlela lelakheke ngayo.”
^ NgesiHebheru kutsi, “ngemakhyubhitha.”
^ NgesiHebheru kutsi, “likhyubhitha.” Fundza Sandzisanchazo B14.
^ Loku kubhekisela kumakhyubhitha lamadze. Fundza Sandzisanchazo B14.
^ Lokusho imphama yesandla lephose ibe ngu-22.2 cm (8.75 in.). Fundza Sandzisanchazo B14.
^ NgesiHebheru kutsi, “emakhyubhitha lamabili.” Fundza Sandzisanchazo B14.
^ NgesiHebheru kutsi, “emakhyubhitha lamane.” Fundza Sandzisanchazo B14.
^ NgesiHebheru kutsi, “emakhyubhitha langu-12.” Fundza Sandzisanchazo B14.
^ NgesiHebheru kutsi, “emakhyubhitha langu-14.” Fundza Sandzisanchazo B14.
^ NgesiHebheru kutsi, “ihhafu yelikhyubhitha.” Fundza Sandzisanchazo B14.
^ Lokusho, iminikelo lenikelwa bantfu.
