Hezekeli 44:1-31
44 Yase ingibuyisela emuva sihamba ngendlela yeligede lelingephandle lelithempeli lelibuke ngasemphumalanga,+ futsi belivaliwe.+
2 Jehova wabese utsi kimi: “Leligede litawuhlala livaliwe. Akukafaneli livulwe, futsi kute umuntfu lokufanele angene ngalo; ngobe Jehova Nkulunkulu wema-Israyeli ungene ngalo,+ ngako kufanele lihlale livaliwe.
3 Nome kunjalo, umholi utawuhlala kulo kuze adle embikwaJehova,+ ngobe ungumholi. Utawungena ngavulandi waleligede aphindze aphume ngawo.”+
4 Yabese ingingenisa ngeligede lelisenyakatfo ngembikwelithempeli. Ngatsi nangibuka, ngabona kutsi inkhatimulo yaJehova beseyigcwele lelithempeli laJehova.+ Ngako ngaguca phansi futsi ngakhotsama.+
5 Jehova wabese utsi kimi: “Ndvodzana yemuntfu, nakisisa,* ubuke, futsi ukulalele ngekucophelela konkhe lengitakutjela kona mayelana netimiso nemitsetfo yelithempeli laJehova. Nakisisa iminyango lengenako nalephumako yalelithempeli.+
6 Kufanele utjele bantfu labavukelako baka-Israyeli utsi: ‘INkhosi Lephakeme Jehova itsi: “Awu nine bantfu baka-Israyeli, sengenele ngulemikhuba yenu leyenyanyekako.
7 Naniletsa ethempelini bantfu bakuletinye tive labangakasoki enhlitiyweni nasenyameni, bangcolisa lithempeli lami. Ninikela ngemanoni nangengati, nibe nephula sivumelwane lenasenta nami ngenca yalemikhuba yenu leyenyanyekako.
8 Anikatinakekeli tintfo tami letingcwele.+ Esikhundleni saloko, nibeka labanye kutsi bente imisebenti yasethempelini lami.”’
9 “‘INkhosi Lephakeme Jehova itsi: “Kute umuntfu wakuletinye tive lohlala ka-Israyeli futsi longakasoki enhlitiyweni nasenyameni lokufanele angene ethempelini lami.”’
10 “‘Kodvwa emaLevi langishiya+ ngesikhatsi ema-Israyeli angishiya ayokhonta tithico tawo letenyenyekako,* atawubhekana nemiphumela yesono sawo.
11 Atawuba tisebenti ethempelini lami, engamele emagede elithempeli+ futsi asebente ethempelini. Atawuhlaba umnikelo wekushiswa nemhlatjelo lonikelwa ngulabantfu, futsi atawuma embikwebantfu kute abasebentele.
12 Ngenca yekutsi bekatisebenti tabo embikwetithico tabo letenyanyekako futsi asikhubekiso lesabangela kutsi bantfu baka-Israyeli bone,+ kungako ngiphakamise sandla sami ngalokumelene nawo ngifunga,’ kusho iNkhosi Lephakeme Jehova, ‘futsi atawubhekana nemiphumela yesono sawo.
13 Angeke ete kimi atokwenta imisebenti yebaphristi nobe atsintse tintfo tami letingcwele nobe letingcwelengcwele, futsi atawetfwala lihlazo lawo ngenca yetintfo letenyanyekako latentile.
14 Ngitawenta kutsi anakekele imisebenti yasethempelini, ente imisebenti yalo kanye nato tonkhe tintfo lokufanele tentiwe ngekhatsi kulo.’+
15 “INkhosi Lephakeme Jehova itsi: ‘Mayelana nebaphristi labangemaLevi, lokungemadvodzana aSadoki,+ lebebanakekela imisebenti yelithempeli lami ngesikhatsi ema-Israyeli angishiyile,+ batawuta kimi kuze bangisebentele futsi batawuma embikwami kuze banikele ngemanoni+ nangengati.+
16 Ngibo lokufanele bangene ethempelini lami, batawusondzela etafuleni lami kuze bangisebentele,+ futsi batawunakekela imisebenti lengibanike yona.+
17 “‘Nabangena emagedeni elibala lelingekhatsi, kufanele bagcoke timphahla letentiwe ngelineni.+ Akukafaneli bagcoke nome ngabe yini leyakhiwe ngeboya nabenta imisebenti emagedeni elibala lelingekhatsi nobe ngekhatsi kulelibala.
18 Kufanele bashucule ngemishuculo leyentiwe ngelineni enhloko, bagcoke netikhindi kuze tivale tingculu tabo.+ Akukafaneli bagcoke nome ngabe yini letabenta bajuluke.
19 Ngaphambi kwekutsi baphumele ebaleni lelingephandle, lokulibala lokutfolakala kulo bantfu, kufanele bakhumule timphahla tabo lebebatigcoke nabasebenta ngekhatsi,+ futsi batibeke emakamelweni ekudlela langcwele.*+ Ngemuva kwaloko kufanele bagcoke letinye timphahla kuze bangendluliseli bungcwele* kulabantfu ngaletimphahla tabo letingcwele.
20 Akukafaneli batihhule tonkhe tinwele enhloko+ nome babe netinwele letindze. Kufanele baphungule tinwele enhloko.
21 Baphristi akukafaneli banatse liwayini nabangena ebaleni lelingekhatsi.+
22 Akukafaneli batitsatsele umfelokati nome umfati lodivosile;+ kodvwa bangayitsatsa intfombi leyintalelwane yaka-Israyeli nobe umfelokati wemphristi.’+
23 “‘Kufanele bafundzise bantfu bami umehluko emkhatsini walokungcwele nalokuvamile; futsi batabafundzisa umehluko emkhatsini walokuhlantekile nalokungakahlanteki.+
24 Kufanele babe behluleli nakutekwa emacala;+ kufanele behlulele ngekuvumelana netehlulelo tami.+ Kufanele bagcine imitsetfo yami netimiso tami letimayelana nayo yonkhe imikhosi+ yami futsi bangcwelise emasabatha ami.
25 Akukafaneli batsintse sidvumbu semuntfu ngobe sitabangcolisa. Nobe kunjalo, bangatingcolisa ngetidvumbu tabobabe babo, tabomake babo, temadvodzana abo, temadvodzakati abo, tabomnakabo nobe tabodzadzewabo labangakashadi.+
26 Kufanele kuphele emalanga langu-7 umphristi angasebenti ngemuva kwekuhlantwa kwakhe.
27 Kufanele ente umnikelo wesono ngelilanga layongena ngalo endzaweni lengcwele, ebaleni lelingekhatsi kuze ente imisebenti endzaweni lengcwele,’+ kusho iNkhosi Lephakeme Jehova.
28 “‘Nali lifa labo: Mine ngilifa labo.+ Akukafaneli nibanikete lifa ka-Israyeli, ngobe mine ngilifa labo.
29 Ngibo lokufanele badle umnikelo walokutinhlavu,+ umnikelo wesono nemnikelo welicala,+ futsi konkhe lokunikelwe ngema-Israyeli kutawuba ngekwabo.+
30 Lokuncono kakhulu kwato tonkhe titselo letivutsiwe tekucala nalo lonkhe luhlobo lweminikelo levela kini kutawuba kwebaphristi,+ futsi kufanele ninikete baphristi kudla lenikupheke ngetitselo tenu tekucala.+ Loku kutawuletsela imindeni yenu tibusiso.+
31 Baphristi akukafaneli badle nome nguyiphi inyoni nobe silwane lesitfolakale sifile nobe lesidzabudzabulwe silwane.’+
Imibhalo lengentansi
^ NgesiHebheru kutsi, “beka inhlitiyo yakho.”
^ Leligama lesiHebheru kungenteka lihlobene neligama lelisho “bulongo” futsi lisetjentiswa nakukhulunywa ngendzelelo.
^ Nobe “emakamelweni langcwele.”
^ NgesiHebheru kutsi, “kuze bangangcwelisi”
