Hezekeli 5:1-17
5 “Ndvodzana yemuntfu, titsatsele inkemba lekhaliphako kuze uyisebentise ibe yilezana yekuhhula. Hhula inhloko yakho nesilevu sakho bese utsatsa tikali kuze ukale uphindze wehlukanise letinwele tibe tincenye letintsatfu letilinganako.
2 Kufanele ushise incenye yekucala yato emlilweni ekhatsi kulelidolobha nasekaphelile emalanga ekuvinjetelwa kwalo.+ Ngemuva kwaloko ubotsatsa incenye lelandzelako yato uyihlabe ngenkemba kulo lonkhe lelidolobha,+ bese incenye yekugcina yato uyisakatele emoyeni, futsi mine ngitawukhipha inkemba kuze ngiticoshe.+
3 “Ubophindze utsatse ticucu letimbalwa taletinwele utibophele emphetfweni wengubo yakho.
4 Ubotsatsa naletinye taletinwele utijikijele emlilweni, tishe tize tingcongce. Lomlilo utawuhamba uze uyofika kubantfu baka-Israyeli.+
5 “Naku lokushiwo yiNkhosi Lephakeme Jehova: ‘Lena yiJerusalema. Ngiyibeke emkhatsini wetive futsi kunemave layitungeletile.
6 Kodvwa yona ivukele timiso tami nemitsetfo yami, yenta tintfo letimbi kakhulu kwendlula tive kanye nemave layitungeletile.+ Ngobe bantfu bakulelidolobha batalile timiso tami, futsi abakahambi ngemitsetfo yami.’
7 “Ngako-ke, naku lokushiwo yiNkhosi Lephakeme Jehova: ‘Ngesizatfu sekutsi nibe yinkinga lenkhulu kwendlula tive letinitungeletile, anikahambi ngemitsetfo yami futsi nehlulekile kulandzela timiso tami, esikhundleni saloko nilandzele timiso tetive letibomakhelwane benu,+
8 naku lokushiwo yiNkhosi Lephakeme Jehova: “Ngimelene nawe, wena dolobha+ futsi ngitakwehlulela embikwaletive.+
9 Ngitakwenta kuwe intfo lengingazange sengiyente ngaphambili, futsi lengingeke ngiphindze ngiyente, ngenca yato tonkhe tento takho letenyanyekako.+
10 “‘“Ngako bobabe labakhona emkhatsini wenu bayawudla emadvodzana abo,+ nemadvodzana adle bobabe bawo futsi ngitawukhipha sehlulelo kini, ngitawubahlakatela kuyo yonkhe indzawo* bonkhe labasele.”’+
11 “INkhosi Lephakeme Jehova itsi: ‘Ngako-ke, ngitifunga mine, kutsi ngenca yekutsi ningcolise indzawo yami lengcwele ngato tonkhe letithico tenu letenyanyekako nangetento tenu letenyanyekako,+ nami ngitanilahla;* angeke nginivele buhlungu* futsi angeke nginihawukele.+
12 Licembu lekucala emkhatsini wenu litawubulawa sifo lesibulalako nobe libulawe yindlala. Licembu lesibili litawubulawa ngenkemba kuto tonkhe tinhlangotsi takho.+ Licembu lekugcina ngitalisakatela kuyo yonkhe indzawo* futsi ngitawuhoshula inkemba ngiligijimise.+
13 Intfukutselo yami itawubese iyaphela nelulaka lenginalo ngabo lutawubohla futsi ngitawenetiseka.+ Nasengicedzile kukhiphela kubo lulaka lwami, bayawukwati kutsi mine Jehova ngikhulumile kutsi ngifuna kukhontwe mine ngedvwa.+
14 “‘Ngitakwenta ube yindzawo lengenalutfo nentfo yekuhlekwa tive letibomakhelwane nangibo bonkhe labengca ngendlela.+
15 Utawuba yinhlekisa nentfo yekwedzelelwa,+ ube sibonelo lesisecwayiso kanye nentfo leyetfusako etiveni letikutungeletile nasengikhipha sehlulelo kuwe futsi ngikujezisa ngitfukutsele futsi nginelulaka. Mine Jehova sengikhulumile.
16 “‘Ngitawutfumelela bantfu labahlala kuwe imicibisholo lebulalako yendlala kute ibabhubhise. Lemicibisholo itanibhubhisa.+ Ngitakwenta lendlala ibe yimbi kakhulu ngekutsi nginciphise kudla lenikutfolako.*+
17 Ngitanitfumelela indlala netilwane tesiganga letiyingoti+ futsi titawunishiya nite bantfwana. Nitawucotfulwa yinkemba nasifo lesibulalako.+ Mine Jehova sengikhulumile.’”
Imibhalo lengentansi
^ NgesiHebheru kutsi, “kuwo wonkhe umoya.”
^ NgesiHebheru kutsi, “liso lami ngeke linivele buhlungu.”
^ Nobe “ngitawunenta nikhoboseke.”
^ NgesiHebheru kutsi, “kuwo wonkhe umoya.”
^ NgesiHebheru kutsi, “ngitakwephula tindvuku tenu tesinkhwa.” Kungenteka kusho tindvuku betisetjentiselwa kubeka tinkhwa.
