Hoseya 1:1-11
1 Jehova wakhuluma naHoseya* indvodzana yaBeri emalangeni a-Uziya,+ aJothamu,+ a-Ahazi+ newaHezekiya,+ lebekungemakhosi akaJuda.+ Wakhuluma naye emalangeni aJerobowamu+ indvodzana yaJowashi,+ inkhosi yaka-Israyeli.
2 Ngesikhatsi Jehova acala kukhuluma asebentisa Hoseya, Jehova watsi kuye: “Hamba uyotsatsa umfati lotawuba yingwadla* futsi lotakutalela bantfwana labatfole ngebugwadla,* ngobe bantfu bakulelive banjengetingwadla* futsi bamshiyile Jehova.”+
3 Ngako Hoseya washada naGomeri indvodzakati yaDiblayimu, futsi Gomeri wakhulelwa wamtalela indvodzana.
4 Jehova wabese utsi kuHoseya: “Yetse libito utsi nguJezreyeli,* ngobe ngemuva kwesikhashana nje ngitawenta kutsi indlu yaJehu+ iphendvule ngenca yekubulawa kwebantfu eJezreyeli, futsi umbuso waka-Israyeli ngitawucedza.+
5 Ngalelolanga ngitawephula butjoki ba-Israyeli eSihosheni* saseJezreyeli.”
6 Gomeri waphindze wakhulelwa futsi watala indvodzakati. Nkulunkulu wabese ukhuluma naHoseya watsi: “Yetse libito utsi nguLo-ruhama,* ngenca yekutsi angeke ngisasentela umusa+ sive* sema-Israyeli ngobe ngitasicosha.+
7 Kodvwa ngitasentela umusa sive* sakaJuda,+ futsi mine Jehova, Nkulunkulu waso ngitasisindzisa.+ Angeke ngisisindzise ngebutjoki nobe ngenkemba nobe ngemahhashi nobe ngebagibeli bemahhashi.”+
8 Ngemuva kwekulumula Lo-ruhama, Gomeri wakhulelwa futsi watala indvodzana.
9 Nkulunkulu wabese utsi: “Yetse libito utsi nguLo-ami,* ngobe anisesibo bantfu bami futsi angeke ngisaba nguNkulunkulu wenu.
10 “Bantfu* baka-Israyeli batawuba banyenti ngangesihlabatsi saselwandle, lesingeke sikaleke nobe sibalwe.+ Nakulendzawo lapho kwatsiwa kubo: ‘Anisibo bantfu bami,’+ kutawutsiwa kubo: ‘Nine ningemadvodzana aNkulunkulu lophilako.’+
11 Bantfu bakaJuda nebaka-Israyeli batawuhlanganiswa ndzawonye babe munye,+ batikhetsele umholi munye futsi baphume kulelive, ngobe lelo kutawuba lilanga lelibaluleke kakhulu lakaJezreyeli.+
Imibhalo lengentansi
^ Lesi sifishaniso seligama lelitsi Hoshaya, lelisho kutsi “Losindziswe NguJehova; Jehova Usindzisile.”
^ Nobe “longeke etsembeke.”
^ Nobe “ngekungetsembeki.”
^ Nobe “abaketsembeki.”
^ Lokusho kutsi “Nkulunkulu Utawuhlanyela Inhlanyelo.”
^ Nobe “eTsafeni.”
^ Lokusho kutsi “Akentelwa Umusa.”
^ NgesiHebheru kutsi, “indlu.”
^ NgesiHebheru kutsi, “indlu.”
^ Lokusho kutsi “Anisibo Bantfu Bami.”
^ NgesiHebheru kutsi, “Emadvodzana.”
