Hoseya 10:1-15
10 “Israyeli usihlahla lesibi* semagilebisi lesitsela titselo letimbi.+
Utsi nakatsela kakhulu, akhe ema-al’thare lamanyenti;+Live lakhe litsi nalitfutfuka, akhe ematje langcwele lamahle kakhulu.+
2 Bayatentisa;*Ngako batawubekwa licala.
Ukhona lotawuphihlita ema-al’thare abo futsi abhidlite tinsika tabo.
3 Nyalo batawutsi: ‘Site inkhosi+ ngobe asikamesabi Jehova.
Kodvwa yona lenkhosi beyitasisita ngani?’
4 Benta tetsembiso letilite, bafunga emanga,+ futsi benta tivumelwane;Kwehlulela kwabo kufana nesihlahla lesingushevu lesimila emiseleni yensimu.+
5 Bantfu baseSamariya batasesabela sithico selitfole saseBhethi-aveni.+
Bantfu batawusililela,Kulile nebaphristi bankulunkulu wemanga lebebasitsandza futsi basidvumisa,Ngobe sitawutfunjwa.
6 Lesithico sitawuyiswa e-Asiriya sifike sibe sipho senkhosi lenkhulu.+
Efrayimu utawuhlazeka,Na-Israyeli ahlazeke ngenca yeseluleko lasitsatsa.+
7 ISamariya kanye nenkhosi yakhona kutawushabalala*+Kuhle kweligala lelephukile lelihamba nemanti.
8 Titawucotfulwa+ tindzawo letiphakeme taseBhethi-aveni+ letabangela ema-Israyeli kutsi ente sono.+
Kutawumila emanyeva nelukhula kuma-al’thare abo.+
Bantfu batawutsi etintsabeni: ‘Simbonyeni!’
Nasemagcumeni batsi: ‘Welani etikwetfu!’+
9 Awu Israyeli, kusukela emalangeni aseGibeya benisolo nenta lokubi,+Futsi nanyalo solo niyachubeka niyona.
Imphi lebeyiseGibeya ayizange ibacotfule* bonkhe bantfu labangakalungi.
10 Ngitabajezisa nobe nini nangifuna.
Tive titawuhlangana timelane naboFutsi batawetfwala emaphutsa abo lamabili.*
11 Efrayimu abelitfokati leliceceshelwe kubhula kolo futsi abekutsandza loko,Ngako bengingafuni kulimata intsamo yakhe lenhle.
Nyalo sengitawenta lotsite agalele* Efrayimu kutsi ayolima.+
Juda utawulima; Jakobe yena abulale emagadze.
12 Hlanyelani kulunga futsi nivune lutsandvo lolucotfo.
Limani umhlaba longakalinywa,+Futsi nifune Jehova sikhatsi sisekhona,+Kuze kube ngulapho afika anifundzisa ngekulunga.+
13 Kodvwa nine nihlanyele* lokubi,Navuna bubi,+Futsi natfola imiphumela yekukhohlisa kwenu.
Ngobe nitetsembe nine,Netsemba nemasotja enu lamanyenti.
14 Kutawuba nemsindvo welibutfo lemphi lelitawuhlasela bantfu bakini,Futsi onkhe emadolobha enu lavikelekile atawudzilitwa+Njengalapho Shalmani adzilita indlu ya-Abeli,Layidzilita ngesikhatsi kunemphi futsi bomake babulawa kabuhlungu kanye nebantfwana babo.
15 Awu Betheli, nguloku lokutawentiwa kuwe+ ngenca yetento takho letenyanyekako.
Kutawutsi nje nakusa, inkhosi yaka-Israyeli ibe seyibulewe.”*+
Imibhalo lengentansi
^ Kungaphindze kubekwe ngekutsi, “lesenabako.”
^ Nobe “Tinhlitiyo tabo setiyatentisa.”
^ NgesiHebheru kutsi, “kutawuthuliswa.”
^ Nobe “ayibakhandzanga.”
^ Lokusho, sikhatsi lapho batawetfwala sijeziso sabo kube shengatsi betfwele lijoka.
^ Nobe “abophele.”
^ NgesiHebheru kutsi, “nilime.”
^ NgesiHebheru kutsi, “seyithulisiwe.”