Hoseya 4:1-19
4 Awu nine bantfu baka-Israyeli, lalelani livi laJehova,Jehova ubabeke licala bantfu bakulelive,+Ngobe labantfu abaketsembeki, bete lutsandvo lulocotfo, futsi bete lwati ngaNkulunkulu.+
2 Kufunga emanga, kukhuluma emanga,+ kubulala,+Kweba kanye nekuphinga+ kugcwele kulelive,Bantfu babulalana ngalana nangalana.+
3 Kungako lelive litawulila+Futsi bonkhe labahlala khona batawuhhohloka kancane kancane;Tilwane tesiganga netinyoni tasemazulwiniKanye netinhlanti taselwandle kutawushabalala.
4 “Nobe kunjalo, kute umuntfu lotaneluleka,+Ngobe nifana nebantfu labaphikisana nemphristi.+
5 Ngako nitawugileka emini kalo-hha!
Nemphrofethi utawugileka kanye nani, kube shengatsi kusebusuku.
Make wenu ngitambhubhisa.
6 Bantfu bami batawubhujiswa ngobe abangati.
Njengobe abakafuni kungati,+Nami ngitabayekelisa kutsi babe baphristi bami.
Ngenca yekutsi bawukhohliwe umtsetfo* waNkulunkulu wabo,+Nami ngitabakhohlwa bantfwana babo.
7 Bekutsi nakwandza linani lebaphristi, kwandze netono labatenta kimi.+
Inkhatimulo yabo ngitayigucula ibe lihlazo.*
8 Bantfu bami batsi nabona, labaphristi batitike ngenyama,*Futsi bahlale bafisa* kutsi bente lokubi.
9 Lokutawehlela bantfu kutawufana nalokutawehlela baphristi.
Ngitabenta baphendvule ngenca yekutiphatsa kwabo,Futsi ngibajezise ngenca yemisebenti yabo.+
10 Batawudla, kodvwa angeke besutse.+
Batawugwadla,* kodvwa angeke bandze,+Ngobe abakamhloniphi Jehova.
11 Bugwadla* neliwayini lelisha kanye nalelidzalaKucedza sifiso sekwenta lokulungile.*+
12 Bantfu bami babuta etithicweni tabo letakhiwe ngetigodvo,Benta loko intfonga* yabo lebatjela kona.
Sifiso sabo sekugwadla* siyabadukisa,Futsi ngenca yebugwadla* babo abafuni kutitfoba kuNkulunkulu wabo.
13 Benta imihlatjelo eticongweni tetintsaba,+Futsi bashuncisa imihlatjelo emagcumeni,Bayishuncise ngephansi kwetihlahla tem-okhi, testorakisi* nangephansi kwato tonkhe tihlahla letinkhulu,+Ngobe tinemtfunti lomnandzi.
Kungako emadvodzakati enu agwadla,*Nabomalukatana benu baphinga.
14 Emadvodzakati enu angeke ngiwajezisele kugwadla* kwawo,Nabomalukatana benu angeke ngibajezisele kuphinga kwabo.
Ngobe nemadvodza ahamba netingwababaneFutsi enta imihlatjelo netingwadla tasethempelini;Kungako labantfu labete kucondza+ batawubhujiswa.
15 Awu Israyeli, ngisho nobe wena ugwadla,*+Ungamenti Juda abe nelicala.+
Ungeti eGilgali+ nobe eBhethi-aveni,+Futsi ungafungi utsi: ‘Ngifunga Jehova Nkulunkulu lophilako!’+
16 Ngobe Israyeli sewunenkhani kuhle kwenkhomo lenenkhani.+
Pho Jehova angamelusa njani emadlelweni* njengemvu lendvuna leseyincane?
17 Efrayimu utinikele etithicweni.+
Ningatihluphi ngaye!
18 Nasebuphelile tjwala* bakhe,Ubese utiphatsa kabi.*
Nebaholi* bakhe batitsandza kakhulu tintfo letilihlazo.+
19 Umoya utamphephula ngetimphiko tawo,Futsi yena utawudliwa ngemahloni ngenca yalemihlatjelo yakhe.”
Imibhalo lengentansi
^ Nobe “sicondziso.”
^ Kungaphindze kubekwe ngekutsi, “Kunekutsi bangikhatimulise, bayangihlaza.”
^ Lokusho, imihlatjelo bantfu labayentela tono tabo.
^ Nobe “baphakamisa imiphefumulo yabo.” Fundza Tinchazelo Temagama, ubuke ligama lelitsi “Umphefumulo.”
^ Nobe “Batatiphatsa kabi kakhulu.”
^ NgesiHebheru kutsi, “Kususa inhlitiyo.”
^ Nobe “Kungetsembeki.”
^ Nobe “indvuku yemphenguli.”
^ Nobe “sekungetsembeki.”
^ Nobe “yekungetsembeki.”
^ Lesi sihlahla lesiveta timbali letinhle futsi letimhlophe.
^ Nobe “angetsembeki.”
^ Nobe “kungetsembeki.”
^ Nobe “ungaketsembeki.”
^ NgesiHebheru kutsi, “endzaweni levulekile.”
^ Nobe “tjwala lobentiwe ngakolo.”
^ Nobe “uyagwadla.”
^ NgesiHebheru kutsi, “Nemahawu.”
