Imisebenti Yebaphostoli 19:1-41
19 Ngesikhatsi Apholosi+ aseKhorinte, Pawula wahamba wadzabula etindzaweni letisekhatsi nesifundza sase-Asiya futsi wehlela e-Efesu.+ Nakefika lapho watfola bafundzi labatsite,
2 watsi kubo: “Nawutfola yini umoya longcwele ngesikhatsi niba ngemakholwa?”+ Bona batsi: “Tsine asati lutfo ngemoya longcwele.”
3 Wase utsi: “Manje nabhajatiswa ngaluphi lubhabhatiso?” Bona batsi: “Ngelubhabhatiso lwaJohane.”+
4 Pawula watsi: “Johane bekabhabhatisa bantfu ngelubhabhatiso lebelukhombisa kuphendvuka,+ abatjela kutsi bakholwe nguloyo lota emvakwakhe,+ lokunguJesu.”
5 Nabeva loku, babhajatiswa egameni leNkhosi Jesu.
6 Ngesikhatsi Pawula ababeka tandla, umoya longcwele wehlela kubo,+ bacala kukhuluma letinye tilwimi futsi baphrofetha.+
7 Sebabonkhe, bebangemadvodza langaba ngu-12.
8 Pawula wangena esinagogeni,+ futsi kwaphela tinyanga letintsatfu akhuluma ngesibindzi, etfula tinkhulumo, abonisana nabo futsi etama kubenta kutsi bakholwe nguMbuso waNkulunkulu.+
9 Ngesikhatsi labanye baba nenkhani, bala nekukholwa,* futsi bakhuluma kabi ngaleNdlela+ embikwabo bonkhe bantfu, Pawula wabashiya+ watsatsa labafundzi wahamba nabo. Beketfula tinkhulumo malanga onkhe ehholweni lesikolwa laThiranusi.
10 Loko wakwenta iminyaka lemibili, kangangekutsi bonkhe lebebahlala esifundzeni sase-Asiya, lobekufaka ekhatsi emaJuda nemaGriki, baliva livi leNkhosi.
11 Nkulunkulu bekasolo enta timangaliso letinkhulu ngaPawula.+
12 Bantfu bebaze batsatse timphahla netidziya takhe batiyise kubantfu labagulako,+ tifo tabo betivele telapheke, nemadimoni aphume.+
13 Kodvwa lamanye emaJuda lebekahamba akhipha emadimoni etama kusebentisa libito leNkhosi Jesu kulabo lebebanemadimoni. Bekatsi: “Nginiyala ngeligama laJesu loshunyayelwa nguPawula.”+
14 Emadvodzana langu-7 emphristi lomkhulu wemaJuda, lokutsiwa nguSkheva nawo bekakwenta loku.
15 Kodvwa lelidimoni lawaphendvula latsi: “Ngiyamati Jesu+ naPawula,+ nine-ke nibobani?”
16 Ngako lendvodza lebeyinelidimoni yawasukela, futsi yawehlula, aze aphuma kulendlu abaleka, angcunu futsi alimele.
17 Loku kwatiwa ngibo bonkhe bantfu, lokufaka ekhatsi emaJuda nemaGriki lebekahlala e-Efesu, futsi bonkhe besaba, nelibito leNkhosi Jesu lachubeka lidvunyiswa.
18 Labanyenti kulababa ngemakholwa beta bafike bakuvuma konkhe lebebakwentile, bakuchaza embikwabo bonkhe bantfu.
19 Labanyenti kulabo lebebake benta imilingo baletsa tincwadzi tabo ndzawonye, batishisa embikwabo bonkhe bantfu.+ Batsi nababala, batfola kutsi betingabita tinhlavu telisiliva letingu-50 000.
20 Ngako livi laJehova* lachubeka landza futsi liba nemandla.+
21 Ngemuva kwaletintfo, Pawula wancuma kutsi nasekaye eMasedoniya+ nase-Akhaya, utawuya eJerusalema.+ Watsi: “Nangisuka lapho kufanele ngiye eRoma.”+
22 Ngako watfuma lababili kulabo lebekasebenta nabo, lokunguThimothi+ na-Erastusi+ kutsi baye eMasedoniya, kodvwa yena wahlala sikhashana esifundzeni sase-Asiya.
23 Ngaleso sikhatsi, kwavela kuphikisana lokukhulu+ mayelana naleNdlela.+
24 Lenye indvodza lokutsiwa nguDemetriyusi, lebeyisebenta ngelisiliva futsi yakha titfombe telisiliva temathempeli a-Athemisi,* beyibangenisela imali lenyenti labo lebeyisebenta nabo.+
25 Ngako yababita, yabita nalabanye lebebenta imisebenti lefana nalena, yatsi: “Madvodza, nati kahle kutsi sitfola imali lenyenti kulelibhizinisi letfu.
26 Niyatibonela futsi niyativela kutsi Pawula udvonse bantfu labanyenti, waphindze wabagucula, hhayi lapha e-Efesu+ kuphela kodvwa kuso sonkhe sifundza sase-Asiya, watsi bonkulunkulu labentiwe ngetandla abasibo bonkulunkulu sibili.+
27 Ngesaba nekutsi bantfu ngeke bagcine nje ngekukhuluma kabi ngalelibhizinisi letfu, kodvwa lelithempeli la-Athemisi longunkulunkulukati wetfu lomkhulu batawubese balitsatsa njengentfo lengenamsebenti. Bonkhe bantfu labase-Asiya nakuwo wonkhe umhlaba, batawuyekela kumdvumisa.”
28 Ngesikhatsi lamadvodza eva loku, atfukutsela abila futsi amemeta atsi: “Mkhulu Athemisi webantfu base-Efesu!”
29 Kwaba nesiphitsiphitsi lesikhulu edolobheni, bonkhe bantfu bagijimela enkhundleni yetemidlalo, bahudvula Gayusi na-Aristakhusi,+ lebebahamba naPawula futsi bebabaseMasedoniya.
30 Pawula bekafuna kungena ngekhatsi, kodvwa bafundzi abazange bamvumele.
31 Ngisho nalabanye bacondzisi bemikhosi nemidlalo lebebavana naye batfumela umlayeto kuye bamncenga kutsi angatifaki engotini ngekungena kulenkhundla.
32 Ecinisweni bantfu bebamemeta basho tintfo letehlukahlukene; bekunesiphitsiphitsi kuso sonkhe lesicumbi, futsi labanyenti babo bebangati nekutsi bahlanganeleni.
33 Ngako bakhiphela Alekzanda ngephandle kwalesicumbi, emaJuda wona amfucela ngembili. Alekzanda wababindzisa futsi bekafuna kutikhulumela embikwebantfu.
34 Batsi nababona kutsi ungumJuda, bonkhe bacala kumemeta sikhatsi lesingaba ngema-awa lamabili, batsi: “Mkhulu Athemisi webantfu base-Efesu!”
35 Kwatsi lapho umgcini mabhuku welidolobha sekasibindzisile lesicumbi, watsi: “Nine bantfu base-Efesu, ukhona yini umuntfu longati kutsi lidolobha lase-Efesu liyindzawo yekugcina lithempeli la-Athemisi lomkhulu, nesitfombe lesehla ezulwini?
36 Ngako njengobe letintfo tingeke tiphikwe, kufanele nehlise umoya futsi ningatsatseli tintfo etulu.
37 Ngobe lamadvodza leniwaletsile akawagcekezi emathempeli futsi akamhlambalati nkulunkulukati wetfu.
38 Ngako nangabe Demetriyusi+ nalabo lasebenta nabo bamangalela lotsite, akhona emalanga ekutekwa kwemacala, nebabusi betifundza* bakhona; abamangalelane khona.
39 Nangabe nifuna lokunye ngephandle kwaloko, kufanele kulungiswe emhlanganweni wetakhamuti losemtsetfweni.
40 Ngobe ngalendzaba yalamuhla sisengotini yekubekwa licala lekususa siphitsiphitsi, njengobe kute netizatfu lesingatibeka tekubangela lesiphitsiphitsi lesinjena.”
41 Nakacedza kusho loku, wawucitsa lomhlangano.
Imibhalo lengentansi
^ Nobe “baba lukhuni futsi bangavumi kukholwa.”
^ Fundza Sandzisanchazo A5.
^ Nobe “aDiyana.”
^ Laba babusi betifundza labangemaRoma. Fundza Tinchazelo Temagama.
