Imisebenti Yebaphostoli 2:1-47
2 Ngelilanga leMkhosi weliPhentekhoste,+ bonkhe bafundzi bebahlangene endzaweni yinye.
2 Kwatsi kusenjalo, kwevakala umsindvo uvela ezulwini unjengekuhhusha kwemoya lomkhulu, futsi wagcwala lendlu lebebahleli kuyo.+
3 Kwabonakala lokunjengemalangabi lamise kwelulwimi, futsi nguloko naloko kwahlala etikwemuntfu ngamunye,
4 bonkhe base bagcwala umoya longcwele,+ bakhuluma ngetilwimi letehlukahlukene, njengobe nje umoya bewubenta kutsi bakhulume.+
5 Ngaleso sikhatsi, eJerusalema bekunemaJuda lebekesaba Nkulunkulu, avela kuto tonkhe tive temhlaba.+
6 Kwatsi nakuvakala lomsindvo, sicumbi sebantfu sabutsana ndzawonye sididekile, ngobe nguloyo naloyo kuso bekeva labafundzi bakhuluma ngelulwimi lwakhe.
7 Lesicumbi samangala kakhulu satsi: “Labantfu labakhulumako akusibo yini baseGalile?+
8 Pho kwentiwa yini kutsi ngamunye wetfu eve lulwimi lwakhe?*
9 Lapha kitsi kunalabavela ePhathiya, eMediya,+ e-Elamu,+ eMesophothamiya, eJudiya, eKhaphadosiya, ePhontusi, esifundzeni sase-Asiya,+
10 eFrigiya, ePhamfiliya, eGibhithe, etigodzini taseLibhiya lengaseSirene, futsi kukhona netihambi letivela eRoma, letifaka ekhatsi emaJuda nalabo labagucukele enkholweni yebuJuda,+
11 kanye nalabavela eKhrethe nase-Arabhiya. Sonkhe sibeva bakhuluma ngemisebenti lemangalisako yaNkulunkulu ngetilwimi takitsi.”
12 Bonkhe bebamangele futsi badidekile, ngako bakhuluma bodvwa batsi: “Kusho kutsini loku?”
13 Kodvwa labanye bahlekisa ngabo batsi: “Badzakiwe.”
14 Phetro wasukuma nebaphostoli labangu-11,+ waphakamisa livi watsi: “Nine bantfu baseJudiya nani nonkhe lenihlala eJerusalema, lalelisisani emavi ami.
15 Labantfu abakadzakwa njengobe nicabanga, ngobe kusengakashayi ngisho nensimbi yemfica ekuseni.*
16 Kunaloko, naku lokwashiwo ngumphrofethi Joweli:
17 ‘Nkulunkulu utsi: “Emalangeni ekugcina ngitawutfululela umoya wami* kuto tonkhe tinhlobo tebantfu, futsi emadvodzana enu nemadvodzakati enu atawuphrofetha, emajaha enu atawubona imibono, emadvodza lasakhulile emkhatsini wenu aphuphe emaphupho,+
18 ngisho netinceku tami kanye netincekukati tami ngitatitfululela umoya wami ngalawo malanga, futsi titawuphrofetha.+
19 Ngitawenta timangaliso ezulwini netibonakaliso emhlabeni: Ingati, umlilo kanye nekushunca kwentfutfu.
20 Lilanga litawuba mnyama nenyeti ibe yingati ngaphambi kwekutsi kufike lilanga laJehova* lelikhulu nalelibalulekile.
21 Wonkhe umuntfu lobita libito laJehova* utawusindziswa.”’+
22 “Nine bantfu baka-Israyeli, lalelani lamavi: Jesu waseNazaretha bekatfunywe nguNkulunkulu. Loku kwavetwa ngalokucacile ngemisebenti lemikhulu, ngetimangaliso, nangetibonakaliso Nkulunkulu latenta ngaye embikwenu,+ njengobe nje nati.
23 Lomuntfu wanikelwa ngekuvumelana nenjongo* yaNkulunkulu futsi Nkulunkulu wakwati loko kusengakenteki.+ Nine nambetsela elugodvweni nisebentisa toni futsi nambulala.+
24 Kodvwa Nkulunkulu wamvusa+ ngekumkhulula ekufeni,* ngobe kufa bekute emandla ekuchubeka kumbophile.+
25 Davide wakhuluma ngaye watsi: ‘Ngihlale ngicabanga ngaJehova* ngobe usesandleni sami sangesekudla, ngako angeke nginyakatiswe.
26 Ngako-ke inhlitiyo yami yajabula, nelulwimi lwami lwagcwala injabulo. Ngitawuhlala* ngikwetsemba,
27 ngobe ngeke uze ungishiye eThuneni,* futsi angeke uvumele kutsi lowetsembekile wakho abole.+
28 Ungifundzisile indlela leholela ekuphileni, futsi kungemukela kwakho kutangenta ngijabule kakhulu.’+
29 “Banaketfu, ngivumeleni ngikhulume ngekukhululeka ngakhokho wetfu Davide, kutsi wafa futsi wangcwatjwa,+ nelithuna lakhe lisekhona ngisho nalamuhla.
30 Ngenca yekutsi bekangumphrofethi, futsi bekati kutsi Nkulunkulu wafunga kuye kutsi lomunye webantfwana bakhe* utawuhlala esihlalweni sakhe sebukhosi,+
31 Davide wati ngekuvuswa kwaKhristu kusengakenteki futsi wakhuluma ngako kutsi bekangeke ashiywe eThuneni,* nekutsi inyama yakhe beyingeke ibole.*+
32 Nkulunkulu wamvusa Jesu, futsi sonkhe sibofakazi+ baloko.
33 Njengobe aphakanyiselwa ngesekudla saNkulunkulu,+ futsi wemukela nemoya longcwele lowetsenjiswa nguBabe,+ usitfululele loku lenikubonako nalenikuvako.
34 Davide akazange enyukele ezulwini, kodvwa naku lakusho: ‘Jehova* watsi eNkhosini yami: “Hlala ngesekudla sami,
35 kuze kube ngulapho titsa takho ngitibeka ngephansi kwetinyawo takho.”’+
36 Ngako bonkhe bantfu baka-Israyeli kufanele bati kutsi loJesu lenambulalela elugodvweni,+ Nkulunkulu umente iNkhosi+ futsi wamenta waba nguKhristu.”
37 Nabeva loku batsintseka etinhlitiyweni futsi bakhuluma naPhetro nalaba labanye baphostoli, batsi: “Banaketfu, kufanele senteni?”
38 Phetro watsi kubo: “Phendvukani,+ nibhajatiswe+ egameni laJesu Khristu kuze nitsetselelwe tono tenu,+ futsi nitawutfola sipho lesingumoya longcwele.
39 Ngobe lesetsembiso+ sitawutfolwa ngibo bonkhe labatawubitwa nguJehova* Nkulunkulu wetfu, kungaba ngini, nebantfwana benu, kanye nabo bonkhe labakhashane.”+
40 Wachubeka abachazela kahle futsi abancenga atsi: “Sindziswani kulesitukulwane lesigwegwile.”+
41 Ngako labo labawemukela ngenjabulo emavi akhe babhajatiswa,+ futsi ngalelolanga kwengeteka bantfu labangaba ngu-3 000 baba bafundzi.+
42 Batimisela kuchubeka bafundza kubaphostoli, kuhlangana ndzawonye,* kudla ndzawonye+ kanye nekuthantaza.+
43 Bonkhe bantfu besaba njengobe baphostoli bebenta timangaliso netibonakaliso letinyenti.+
44 Bonkhe lababa ngemakholwa bebahlangana ndzawonye, babelana konkhe lebebanako,
45 futsi batsengisa tonkhe tintfo tabo+ kanye nemhlaba wabo, base babela labanye leyo mali, kuye ngekutsi umuntfu ngamunye bekadzingani.+
46 Malanga onkhe bebahlale bahlangana ngebunye ethempelini, bavakashelana, badla kudla bajabule kakhulu, futsi loku bebakwenta ngalokusuka enhlitiyweni.
47 Bebadvumisa Nkulunkulu futsi bemukelwa ngibo bonkhe bantfu. Onkhe malanga, Jehova* wachubeka engeta linani lalabo lebebasindziswa.+
Imibhalo lengentansi
^ Nobe “lalumunya.”
^ NgesiGriki kutsi, “kuseli-awa lesitsatfu.”
^ Nobe “incenye yemoya wami.” NgesiGriki kutsi, “incenye lengiyitsetse emoyeni wami.”
^ Fundza Sandzisanchazo A5.
^ Fundza Sandzisanchazo A5.
^ Nobe “nentsandvo.”
^ NgesiGriki kutsi, “etinhlungwini tekufa.” Kungaphindze kubekwe ngekutsi, “ekuboshweni kufa.”
^ Fundza Sandzisanchazo A5.
^ NgesiGriki kutsi, “Inyama yami itawuhlala.”
^ Nobe “eHayidesi,” lokusho lithuna lebantfu. Fundza Tinchazelo Temagama.
^ NgesiGriki kutsi, “lophuma elukhalo lwakhe.”
^ Nobe “eHayidesi,” lokusho lithuna lebantfu. Fundza Tinchazelo Temagama.
^ Nobe “yonakale.”
^ Fundza Sandzisanchazo A5.
^ Fundza Sandzisanchazo A5.
^ Nobe “kwabelana tintfo.”
^ Fundza Sandzisanchazo A5.
