Imisebenti Yebaphostoli 5:1-42
5 Nanobe kunjalo, indvodza lebitwa ngekutsi ngu-Ananiyase, ikanye nemkayo Safira, yatsengisa indzawo yayo.
2 Kodvwa yagodla lenye yalemali, futsi nemkayo bekati ngaloko, yase itsatsa lena lebeyisele yayinika baphostoli.+
3 Kepha Phetro watsi: “Ananiyase, umvumeleleni Sathane kutsi abuse inhlitiyo yakho, akwente uyenge+ umoya longcwele+ futsi ugodle lenye yalemali loyitfolile?
4 Angitsi lendzawo beyiyakho, futsi nangemuva kwekuyitsengisa, lemali bewungayisebentisa ngekutsandza kwakho? Kungani ucabange kwenta sento lesinjena? Awukayengi bantfu, kodvwa uyenge Nkulunkulu.”
5 Nakeva loku, Ananiyase waganklateka phansi wafa. Bonkhe labeva ngaloku besaba kakhulu.
6 Ngako kwefika emajaha amgocotela ngetindvwangu, amkhiphela ngephandle futsi amngcwaba.
7 Ngemuva kwema-awa langaba matsatfu, kwangena umkakhe angati kutsi kwentekeni.
8 Phetro watsi kuye: “Asewusho, ngulena kuphela yini imali leniyitfole nanitsengisa lendzawo?” Yena watsi: “Yebo, ngiyo.”
9 Ngako Phetro watsi kuye: “Kungani nine nobabili nivumelene ngekutsi niyenge umoya waJehova?* Labo labangcwabe indvodza yakho sebalapha emnyango, futsi batakukhiphela ngephandle.”
10 Naye wavele waganklateka phansi wafa. Lamajaha atsi nakefika, amkhandza afile, ngako amkhiphela ngephandle, amngcwaba eceleni kwendvodza yakhe.
11 Ngenca yaloko, lonkhe libandla kanye nabo bonkhe labeva ngaloku besaba kakhulu.
12 Ngetulu kwaloko, baphostoli bachubeka benta tibonakaliso netimangaliso letinyenti embikwebantfu,+ futsi bonkhe bebahlangana ndzawonye eMhubheni waSolomoni.+
13 Nanobe kunjalo, labanye abazange babe nesibindzi sekutihlanganisa nabo, kodvwa bantfu bebakhuluma kahle ngabo.
14 Labadvuna nalabasikati labanyenti bakholwa yiNkhosi, futsi bebachubeka bengeteka.+
15 Bantfu bebaletsa labagulako, bababeke emigwacweni lemikhulu ngemibhedze lemincane nangemacansi, kuze kutsi nakwendlula Phetro, lokungenani sitfunti sakhe simane sendlule kulomunye wabo.+
16 Bekusolo kuta nebantfu labanyenti lebebasuka emadolobheni langaseJerusalema betfwele labagulako nalabahlushwa ngemadimoni, futsi bonkhe bebaphiliswa.
17 Umphristi lophakeme nabo bonkhe lebebanaye, belicembu lebaSadusi, basukuma futsi bebanemona lomkhulu.
18 Babamba* labaphostoli babavalela ejele.+
19 Kodvwa ebusuku, ingilosi yaJehova* yavula iminyango yelijele,+ yabakhipha, yatsi kubo:
20 “Hambani niye ethempelini, nichubeke nikhuluma nebantfu ngawo wonkhe umlayeto lomayelana nekuphila.”
21 Nasebeve loko, bangena ethempelini entsatsakusa bacala kufundzisa.
Umphristi lophakeme nalabo lebebanaye befika babita emalunga eNkantolo YemaJuda nelicembu lemadvodza lamadzala aka-Israyeli, futsi batfuma tinceku ejele kutsi tiyolandza labaphostoli.
22 Kodvwa tatsi natifika ejele tangabakhandzi. Ngako tajika tayobika,
23 tatsi: “Sikhandze kukhiyiwe ejele futsi konkhe kukahle, nabogadzi beme emnyango, kodvwa sitsite nasivula sangatfoli muntfu.”
24 Ngesikhatsi indvuna yelithempeli nebaphristi labakhulu beva loku, batibuta kutsi utawuba yini umphumela wako.
25 Kodvwa kwefika lomunye umuntfu aletse umbiko, watsi: “Lamadvodza lebeniwavalele ejele, asethempelini afundzisa bantfu.”
26 Ngako lendvuna yahamba netinceku tayo bayolandza labaphostoli kodvwa hhayi ngeludlame, ngobe bebesaba kutsi bantfu batobagcoba ngematje.+
27 Base babamisa embikweNkantolo YemaJuda. Umphristi lophakeme wakhuluma nabo,
28 watsi: “Besiniyale kahle kutsi ningachubeki nekufundzisa ngaleligama,+ kodvwa asenibuke, senigcwalise iJerusalema ngalemfundziso yenu, futsi nitimisele kusetfwesa ingati yalomuntfu.”+
29 Phetro nalalabanye baphostoli batsi: “Kufanele silalele Nkulunkulu njengobe angumbusi kunekutsi silalele bantfu.+
30 Nkulunkulu wabokhokho betfu wamvusa Jesu, loyo lenambulala ngekumlengisa elugodvweni.*+
31 Wamphakamisela ngesekudla sakhe waba nguMmeleli Loyinhloko+ neMsindzisi,+ kuze ema-Israyeli aphendvuke futsi atsetselelwe tono.+
32 Tsine sibofakazi baletintfo,+ nemoya longcwele uyasifakazela,+ loyo Nkulunkulu lawunike labo labamlalelako futsi labamtsatsa njengembusi wabo.”
33 Nabeva loku batfukutsela babila,* bafuna nekubabulala.
34 Kodvwa lenye indvodza lengumFarisi, lebitwa ngekutsi nguGamaliyeli,+ nalebeyingumfundzisi weMtsetfo futsi ihlonishwa ngibo bonkhe bantfu, yasukuma embikwaleNkantolo YemaJuda yatsi labaphostoli abakhishelwe ngephandle sikhashana.
35 Yase itsi: “Madvodza aka-Israyeli, cabangisisani ngaloku lenihlose kukwenta kulabantfu.
36 Ngobe esikhatsini lesendlulile, kwavela Thoyidasi watsi yena ungumuntfu lomkhulu futsi emadvodza langaba ngu-400 aba balandzeli bakhe. Kodvwa wabulawa, futsi bonkhe lebebamlandzela bahlakateka, nemacebo abo aphelela eteni.
37 Ngemuva kwaloko, ngemalanga ekubhalisa, kwavela Judasi waseGalile, wadvonsa bantfu labanyenti kutsi bamlandzele. Naye wafa, futsi bonkhe lebebamlandzela bahlakateka.
38 Ngenca yaloko ngitsi kini: Wayekeleni lamadvodza, ningawaphatamisi. Ngobe nangabe lemfundziso nobe lomsebenti uvela kubantfu, utawuphela;
39 kodvwa nangabe uvela kuNkulunkulu, ngeke nikhone kubehlula.+ Ngale kwaloko, nitawutitfola senilwa naNkulunkulu.”+
40 Ngako basilalela leseluleko sakhe, babita labaphostoli, babashaya kamatima,+ babayala nekutsi bayekele kukhuluma ngeligama laJesu, base bayabakhulula.
41 Ngako-ke labaphostoli baphuma kuleNkantolo YemaJuda bajabulile+ ngobe Nkulunkulu bekabatsatse njengalabakufanele kuhlazwa ngenca yelibito laJesu.
42 Malanga onkhe, abazange bayekele kufundzisa nekumemetela tindzaba letimnandzi ngaKhristu Jesu,+ ethempelini nasemtini ngemuti.+
Imibhalo lengentansi
^ Fundza Sandzisanchazo A5.
^ Nobe “Babopha.”
^ Fundza Sandzisanchazo A5.
^ Nobe “esihlahleni.”
^ Nobe “kwatsi abacetuke ekhatsi.”
