Isaya 22:1-25
22 Simemetelo lesimayelana neSihosha seMbono:*+
Kwentiwa yini kutsi bonkhe bantfu bakho bakhuphukele eluphahleni lwetindlu?
2 Bewugcwele siphitsiphitsi,Ulidolobha lelinemsindvo nalelitiphakamisako.
Bantfu bakho abazange babulawe ngenkemba,Futsi abazange babulawe emphini.+
3 Bonkhe babusi bakho labacindzetelanako babaleke kanyekanye.+
Bayiswe ejele kungakasetjentiswa ngisho nebutjoki.
Bonkhe labatfolakele baboshiwe,+Ngisho nome besebabalekele khashane.
4 Kungako ngitsite: “Ningangibuki,Futsi ngitawukhala kabuhlungu.+
Ningaphikeleli ngekungidvudvutaNgenca yekubhujiswa kwendvodzakati* yebantfu bami.+
5 Ngobe leli lilanga lekudideka, lekuncotjwa nelekwesaba,+Kuvela eNkhosini Lephakeme, Jehova wemabutfo,ESihosheni seMbono.
Kubhidlitwa lubondza+Kukhona nekukhala lokuvakala ngisho nasentsabeni.
6 I-Elamu+ itsatsa umgodla wemicibisholoIshayela tincola temahhashi,*Bese iKhiri+ igwabula* lihawu.
7 Ematsafa akho elikhetseloAtawugcwala tincola temphi,Emahhashi* atawuba sendzaweni yawo egedeni,
8 Sivikelo sakaJuda sitawususwa.
“Ngalelolanga, utawubuka tikhali letiseNdlini Yelihlatsi,+
9 futsi nitawubona timfa letinyenti teliDolobha laDavide.+ Nitawukha emanti echibini lelingentansi.+
10 Nitawubala tindlu taseJerusalema, niphindze nibhidlite tindlu kuze nicinise lubondza.
11 Nitakwakha bhesini emkhatsini wetibondza letimbili kuze ufake emanti elichibi lelidzala, kodvwa angeke nimnake uMakhi walo Lomkhulu, futsi angeke nimbone Loyo lowalakha kadzeni.
12 Ngalelolanga, iNkhosi Lephakeme, Jehova wemabutfo,Itawutsi akukhalwe futsi kulilwe,+Itawutsi akuhhulwe tinhloko kugcokwe netindvwangu temasaka.
13 Esikhundleni saloko, kunekuhalalisa nenjabulo,Kuhlatjwa tinkhomo netimvu,Kudliwa inyama kunatfwe neliwayini.+
Nitawutsi: ‘Asidleni sinatse ngoba kusasa sitawufa.’”+
14 Jehova wemabutfo ukwembulile loku kimi, ngakuva: “‘Angeke nicolelwe leliphutsa nize niyofa,’+ kusho iNkhosi Lephakeme, Jehova wemabutfo.”
15 INkhosi Lephakeme, Jehova wemabutfo, itsi: “Hamba uye kuShebna indvuna,+ lowengamele sigodlo, ufike utsi:
16 ‘Ufunani lana, ufuna bani lana, kutsi sewungaze utilungisele nendzawo lotawungcwatjwa kuyo?’ Utilungisela lithuna lakhe endzaweni lephakeme; utakhela indzawo yekuphumula edvwaleni.
17 ‘Jehova utakujikijela phansi ngemandla, wena ndvodza, akubambe kabuhlungu.
18 Nakanjani utakubopha akucinise futsi akujikijele njengebhola endzaweni lebanti. Utawufela lapho, netincola takho temphi letikhatimulako titawusala khona lapho, kube lihlazo endlini yemphatsi wakho.
19 Ngitakwemuka sikhundla sakho, ngikuyekelise umsebenti wakho.
20 “‘Ngalelolanga ngitawubita inceku yami, Eliyakimu+ indvodzana yaHilkiya,
21 ngimgcokise sembatfo sakho, ngimbophe ngentsambo yakho,+ bese ngimnika sikhundla sakho. Yena utawuba ngubabe webantfu labahlala eJerusalema newendlu yakaJuda.
22 Sikhiya sendlu yaDavide+ ngitasibeka emahlombe akhe. Lapho avule khona kute lotawuvala; lapho avale khona kute lotawuvula.
23 Ngitambetsela njengesikhonkhwane endzaweni yaphakadze futsi utawufana nesihlalo sebukhosi senkhatimulo endlini yababe wakhe.
24 Batawukhungela kuye yonkhe inkhatimulo yendlu yababe wakhe, situkulwane nentalelwane,* tonkhe titja letincane, titja letigubhile kanye nawo onkhe emajeke lamakhulu.
25 “Jehova wemabutfo utsi: ‘Ngalelolanga, lesikhonkhwane lesishayelwe endzaweni yaphakadze sitawukhishwa,+ sitawujutjwa siwe futsi umtfwalo lebewusime kuso utakuwa wonakale, ngobe Jehova lucobo lwakhe ukhulumile.’”
Imibhalo lengentansi
^ Kushiwo iJerusalema.
^ Lesi simuntfutiso lesiyinkondlo, lokungenteka siyindlela yekuveta luvelo.
^ Nobe “ilungisa.”
^ Nobe “yebagibeli bemahhashi.”
^ Nobe “Bagibeli bemahhashi.”
^ Nobe “nemahlumela.”
