Isaya 33:1-24
33 Maye kuwe, wena mbhubhisi longakabhujiswa;+Wena mtsengisi longakatsengiswa!
Utawutsi nawucedza kubhubhisa, nawe ubhujiswe.+
Utawutsi nawucedza kutsengisa labanye, nawe utsengiswe.
2 Awu Jehova, sentele umusa.+
Litsemba letfu likuwe.
Bani ngumkhono*+ wetfu njalo ekuseni,Ube yinsindziso yetfu ngesikhatsi sekucindzeteleka.+
3 Ngesikhatsi semsindvo wekudideka, tive tiyabaleka.
Nawusukuma wena, tive tigcwala tiganga.+
4 Njengesikhonyane lesishwabadzelako lesibutsana ndzawonye, tintfo lenititsatsele tona titawubutsiswa ndzawonye;Bantfu batawugijimela kuto njengelibulo letintsetse.
5 Jehova utawuphakanyiswa,Ngobe uhlala etulu endzaweni lephakeme.
ISiyoni utayigcwalisa ngekwehlulela kahle nangekulunga.
6 Nguye lonenta nivikeleke;Ugcwele insindziso,+ kuhlakanipha, lwati kanye nekwesaba Jehova,+Loku kungumcebo wakhe.
7 Emachawe abo ayamemeta esitaladini;Titfunywa tekuthula tikhala kabuhlungu.
8 Imigwaco lemikhulu ilahliwe;Kute lohamba kuleto tindlela.
Yena* usephulile sivumelwane;Uwalahlile emadolobha;Akanendzaba nemuntfu.+
9 Lelive liyalila* futsi liyabuna.
ILebanoni ihlazekile;+ ibole phuhlu.
ISharoni seyifana nelugwadvule,Futsi iBhashani neKhameli ihhohlota emacembe.+
10 Jehova utsi: “Manje ngitawusukuma,Manje ngitatiphakamisa;+Manje ngitatenta ngibe mkhulu.
11 Nemitsa tjani lobomisiwe, nitale tinhlanga.
Umoya wenu utanidla njengemlilo.+
12 Tive titawuba njengekuvutsa kwemcakatfo.
Njengemanyeva lageciwe, titawushiswa ngemlilo.+
13 Nine lenikhashane, lalelani loko lengitakwenta!
Nani lenidvutane, wavumeni emandla ami!
14 Toni letiseSiyoni tiseluvalweni;+Kwesaba kubambe letihlubuki:
‘Ngubani kitsi longaphila lapho kunemlilo locotfulako khona?+
Ngubani kitsi longaphila lapho kunemalangabi langacimeki khona?’
15 Loyo lochubeka ahamba ngekulunga,+Lokhuluma liciniso,+Lolahla kungetsembeki, nenzuzo yekukhwabanisa,Loyo tandla takhe letingakwemukeli kudizelwa,+Loyo lovala indlebe yakhe kulabo labakhuluma ngekucitsa ingati,Naloyo lovala emehlo akhe kute angakuboni lokubi
16 Nguye lotawuhlala etindzaweni letiphakeme;Siphephelo* sakhe sitawuba semadvwaleni lokulukhuni kufika kuwo,Utawuniketwa sinkhwa,Futsi emanti akhe angeke aphele.”+
17 Emehlo akho atawubona inkhosi lekhatimulako;Atawubona live lelikhashane.
18 Enhlitiyweni yakho utawukhumbula* lenhlekelele, bese utsi:
“Uphi mabhalane?
Uphi loyo lobekakala tetfulo?+
Uphi loyo lobekabala imibhoshongo?”
19 Angeke uphindze ubone bantfu labaluhlata,Lokubantfu labakhuluma lulwimi lolulukhuni* kakhulu kutsi ungaluva,Labo labanelulwimi lolungingitako futsi longeke ubeve.+
20 Buka iSiyoni, lidolobha lemikhosi yetfu!+
Emehlo akho ayawubona iJerusalema iyindzawo yekuhlala lenekuthula,Lithende lelingeke lisuswe.+
Tikhonkhwane talo angeke tinyomulwe,Futsi kute tintsambo talo letitawudzatjulwa.
21 Kodvwa kuleyondzawo, Loyo Lohloniphekile, longuJehova,Utawuba sifundza semifula kitsi, nemisele lebanti,Kute imikhumbi letawuhamba khonaFutsi kute nemikhumbi lehloniphekile letakwendlula lapho.
22 Ngobe Jehova unguMehluleli wetfu,+Jehova unguMnikimtsetfo wetfu,+Jehova uyiNkhosi yetfu;+Nguye lotasisindzisa.+
23 Tintsambo takho titawulenga tingakaboshwa;Angeke tikwati kumisa lipali futsi angeke tikwati kuvula liseyili.
Ngaleso sikhatsi, kutawuhlukaniselwana tintfo letinyenti letatsatfwa emphini;Ngisho nalabachutako batatitsatsela tintfo letinyenti kakhulu.+
24 Kute lohlala khona* loyawutsi: “Ngiyagula.”+
Bantfu labahlala eveni batawube bacolelwe emaphutsa abo.+
Imibhalo lengentansi
^ Nobe “emandla.”
^ Lokubhekisele esitseni.
^ Kungaphindze kubekwe ngekutsi, “liyoma.”
^ Nobe “Indzawo levikelekile.”
^ Nobe “utawuzindla.”
^ NgesiHebheru kutsi, “lolujulile.”
^ Nobe “sakhamuti.”
