Isaya 7:1-25
7 Ngemalanga a-Ahazi+ indvodzana yaJothamu, loyindvodzana ya-Uziya inkhosi yakaJuda, iNkhosi Resini yaseSiriya kanye naPhekha+ indvodzana yaRemaliya, inkhosi yaka-Israyeli, bahamba bayokulwa neJerusalema kodvwa abakhonanga kuyincoba.+
2 Kwefika umbiko endlini yaDavide lotsi: “ISiriya itihlanganise nelibutfo laka-Efrayimu.”
Ngako inhlitiyo ya-Ahazi kanye netinhlitiyo tebantfu bakhe tacala kuvevetela, njengetihlahla telihlatsi nakuhhusha umoya.
3 Jehova wabese utsi ku-Isaya: “Ngicela uphume uyohlangana na-Ahazi, uhambe nendvodzana yakho Sheyari-jashubi,*+ niyohlangana naye lapho kuphela khona umsele wemanti welichibi lelingenhla,+ ngasemgwacweni lomkhulu losensimini yemwashi wetimphahla.
4 Ubotsi kuye: ‘Ungetfuki. Ungesabi futsi ungaphelelwa ngemandla ngenca yaletiphunti letimbili tetingodvo letibhunyako, nangenca yentfukutselo levutsako yaResini neyeSiriya kanye neyendvodzana yaRemaliya.+
5 Ngobe iSiriya nesive saka-Efrayimu kanye nendvodzana yaRemaliya bakhe lisu lekukulimata, batsi:
6 “Asikhuphukeni siyohlasela live lakaJuda silicotfule* futsi sitincobele lona bese sibeka indvodzana yaThabeyali kutsi ibe yinkhosi+ yalo.”
7 “‘Naku lokushiwo yiNkhosi Lephakeme Jehova:
“Ngeke kuphumelele,Futsi ngeke kwenteke.
8 Ngobe inhlokodolobha yeSiriya yiDamaseko,Futsi inkhosi yaseDamaseko nguResini.
Kungakapheli ngisho neminyaka lengu-65Sive saka-Efrayimu sitawucotfulwa, ngeke sisaba sive.+
9 Inhlokodolobha yaka-Efrayimu yiSamariya,+Nenkhosi yaseSamariya yindvodzana yaRemaliya.+
Ngaphandle kwekutsi ube nekukholwa lokucinile,Angeke ume ucine.”’”
10 Jehova wachubeka akhuluma na-Ahazi watsi:
11 “Cela luphawu kuJehova Nkulunkulu wakho;+ kungenteka lujule njengeliThuna* nobe luphakame njengesibhakabhaka.”
12 Kodvwa Ahazi watsi: “Angeke ngilucele futsi angeke ngimvivinye Jehova.”
13 Isaya wase utsi: “Awu wenandlu yaDavide, ngicela ulalele. Akukeneli yini kutsi nivivinya kubeketela kwebantfu? Kufanele yini nize nivivinye kubeketela kwaNkulunkulu?+
14 Ngako-ke, Jehova lucobo lwakhe utakuniketa nalu luphawu: Intfombi itawutetfwala ibeleke indvodzana,+ iyibite ngekutsi ngu-Imanuweli.*+
15 Itawudla bhotela neluju naseyikwati kwala lokubi futsi ikhetsa lokuhle.
16 Ngobe ngaphambi kwekutsi lomfana akwati kwala lokubi futsi akhetse lokuhle, lelive lemakhosi lamabili leniwesabako litawushiywa ngalokuphelele.+
17 Jehova utawuletsela wena, nebantfu bakho kanye nendlu yababe wakho sikhatsi lesingakaze sibe khona kusukela ngemalanga bantfu baka-Efrayimu labahlukana ngaso nebakaJuda,+ ngobe Nkulunkulu utawuletsa inkhosi yase-Asiriya+ kutsi ikuhlasele.
18 “Ngalelolanga Jehova utawushaya inkwela abite timphungane emifuleni lekhashane yeNayili leseGibhithe kanye netinyosi taseveni lase-Asiriya,
19 futsi tonkhe titawuta tifike tihlale etindzaweni letehlelako, emaweni nakuto tonkhe tihlahla temanyeva nakuto tonkhe tindzawo letinemanti ekunatsa tilwane.
20 “Ngalelolanga, Jehova asebentisa lohhulako futsi locashiwe losuka esifundzeni seMfula,* lokuyinkhosi yase-Asiriya,+ utakuhhula inhloko kanye neboya lobusemilenteni futsi utakuhhula naso sonkhe silevu.
21 “Ngalelolanga, umuntfu utaligcina liphila litfokati lemhlambi kanye netimvu letimbili.
22 Ngenca yebunyenti belubisi, utawudla bhotela, ngobe wonkhe umuntfu lotawube asele kulelive utawudla bhotela neluju.
23 “Ngalelolanga nome ngukuphi lapho bekuvame kuba netihlahla temagilebisi letingu-1 000 letingabita tinhlavu tesiliva letingu-1 000, kutawutfolakala kuphela tihlahla temanyeva nelukhula.
24 Bantfu batawuya kulendzawo baphetse butjoki nemcibisholo ngobe lonkhe lelive litawugucuka libe netihlahla temanyeva nelukhula.
25 Tonkhe tintsaba lebetivame kuhlakulwa ngelikhuba, angeke usondzele kuto ngobe wesaba tihlahla temanyeva nelukhula; titawuba ngemadlelo etinkunzi tiphindze tibe tindzawo tekugcotjwagcotjwa timvu.”
Imibhalo lengentansi
^ Lokusho kutsi “Kutawubuyela Labasele Kuphela.”
^ Kungaphindze kubekwe ngekutsi, “silihlamahlame.”
^ Nobe “iShiyoli,” lokusho lithuna lebantfu. Fundza Tinchazelo Temagama.
^ Lokusho kutsi “Nkulunkulu Unatsi.”
^ Lokusho, iYufrathe.
