Incwadzi YaJakobe 5:1-20
5 Nine tinjinga, khalani futsi nilile ngetinhlupheko letitawunehlela.+
2 Umcebo wenu sewubolile, netimphahla tenu tidliwe ngumvunya.+
3 Ligolide nelisiliva lenu selitfombile, futsi lokutfomba kutawuba bufakazi lobunilahlako kuphindze kucedze nenyama yenu. Loko lenikucongelele kutawuba njengemlilo ngemalanga ekugcina.+
4 Bukani-ke, tisebenti letivuna emasimu enu solo tiyakhala ngobe nitigodlele umholo wato, naJehova* wemabutfo sewukuvile kukhala kwalabavunako bakhalela lusito.+
5 Nine beniphila ntofontofo futsi nitenetisa emhlabeni. Nikhuluphalise tinhlitiyo tenu ngisho nangelilanga lekuhlatjwa.+
6 Nimlahle ngelicala umuntfu lolungile futsi nambulala. Akakamelani yini nani?
7 Ngako beketelani bazalwane, kuze kube sekubeni khona kweNkhosi.+ Ngobe nemlimi uhlala alindzele sitselo lesiligugu lesivetwa ngumhlaba, abeketele kuze kufike timvula tekucala netimvula tekugcina.+
8 Nani-ke beketelani,+ nicinise tinhlitiyo tenu, ngobe sesisondzele sikhatsi sekuba khona kweNkhosi.+
9 Bazalwane, ningakhononi* ngalomunye nalomunye kuze ningatowehlulelwa.+ Nangu uMehluleli sewume emnyango.
10 Bazalwane, lingisani sibonelo sebaphrofethi lebebakhuluma egameni laJehova,*+ labahlupheka ngetindlela letinyenti+ futsi babeketela.+
11 Sitsi bayajabula* labo labacinisele.+ Nivile ngekucinisela kwaJobe,+ nawubona nemphumela Jehova* lawuletsa,+ ngaleyo ndlela nabona kutsi Jehova* unelutsandvo* lolukhulu futsi unemusa.+
12 Ngetulu kwako konkhe bazalwane bami, yekelani kufunga, kungaba ngelizulu nobe ngemhlaba, nanganobe ngusiphi lesinye sifungo. Kodvwa “Yebo” wenu akabe nguyebo, na-“Cha” wenu abe ngucha,+ kuze ningafanelwa kwehlulelwa.
13 Ukhona yini lohluphekako emkhatsini wenu? Akachubeke athantaza.+ Ukhona yini lojabulile? Akahlabele tingoma tekudvumisa.+
14 Ukhona yini logulako emkhatsini wenu? Akabite labadzala belibandla,+ futsi abamthantazele, bamgcobe ngemafutsa+ egameni laJehova.*
15 Umthantazo lowentiwa ngekukholwa utamphilisa umuntfu logulako,* futsi Jehova* utamphilisa. Nangabe onile, utawutsetselelwa.
16 Ngako-ke vumani tono tenu+ kulomunye nalomunye, nithantazelane kuze niphiliswe. Kuncusa kwemuntfu lolungile kunemandla kakhulu.*+
17 Elija bekangumuntfu lonemiva lefana neyetfu, kodvwa ngekutimisela, wathantazela kutsi lingani, futsi alizange line eveni iminyaka lemitsatfu netinyanga letisitfupha.+
18 Waphindze wathantaza, litulu labese liyana nemhlaba waveta titselo.+
19 Bazalwane bami, nangabe lomunye kini adukiswa ecinisweni, bese lomunye uyambuyisa,
20 nibokwati kutsi nobe ngubani lobuyisa soni ekoneni+ kwaso utawusisindzisa ekufeni, ambonye netono letinyenti.+
Imibhalo lengentansi
^ Fundza Sandzisanchazo A5.
^ NgesiGriki kutsi, “ningabubuli.”
^ Fundza Sandzisanchazo A5.
^ Nobe “uneluvelo.”
^ Fundza Sandzisanchazo A5.
^ Fundza Sandzisanchazo A5.
^ Nobe “babusisiwe.”
^ Fundza Sandzisanchazo A5.
^ Kungaphindze kubekwe ngekutsi, “lodziniwe.”
^ Fundza Sandzisanchazo A5.
^ NgesiGriki kutsi, “kunemandla kakhulu nakusebenta.”
