Jeremiya 6:1-30
6 Balekani eJerusalema niyobhaca, nine madvodzana aBhenjamini.
Shayani luphondvo+ eThekhowa;+Layidani umlilo eBhethi-hakheremu, ube luphawu!
Ngobe kuta inhlekelele lenkhulu, inhlekelele lechamuka enyakatfo.+
2 Lidolobha laseSiyoni* lifanana nemfati lomuhle futsi lotototiswako.+
3 Kutawufika belusi nemihlambi yabo.
Batawumisa emathende atungelete lonkhe lelidolobha,+Nguloyo naloyo anakekele umhlambi wakhe.+
4 “Tilungiseleleni* kuyokulwa neJerusalema!
Sukumani, asiyihlaseleni kusesemini!”
“Awu yehheni bo, naku nelilanga seliyashona,Sekucala nekuba mnyama!”
5 “Sukumani, asiyihlaseleni ebusukuFutsi sibhidlite imibhoshongo yayo levikelekile.”+
6 Ngobe Jehova wemabutfo utsi:
“Gawulani tihlahla futsi nimise indvundvuma kuze nivimbetele iJerusalema.+
Lelidolobha kufanele lijeziswe,Ngobe kuyacindzetelwana nje kulo.+
7 Njengobe nje umtfombo ukhipha emanti lamnandzi,Kanjalo nalelidolobha lingumtfombo webubi.
Kuvakala umsindvo wekulwa newembhubhiso;+Futsi ngihlale ngibona bantfu labagulako kanye netinhlekelele.
8 Awu Jerusalema lalela, ngobe nawungenti njalo ngitakufulatsela ngenyanyile;+Ngitawenta indzawo yakho ibe bete lutfo, kube bete nebantfu labahlala kuyo.”+
9 Naku lokushiwo nguJehova wemabutfo:
“Bantfu labasele ka-Israyeli bafanana nemagilebisi ekugcina lasele esihlahleni.
Kufanele uphindze ubabutsele ndzawonye kuhle kwemuntfu lokha emagilebisi ekugcina awafake ebhasikidini.”
10 “Ngubani lokufanele ngikhulume naye futsi ngimecwayise?
Ngubani lotawulalela?
Tindlebe tabo tivalekile,* ngako abakhoni kulalela.+
Sebayaledzelela livi laJehova,+Futsi abalitsandzi.
11 Nami ngitfukutsele ngiyabilelana njengaJehova,Futsi sengidziniwe kuthula.”+
“Tjela umntfwana losesitaladini indlela lengitfukutsele ngayo,+Utjele emacembu emajaha lahlangene ndzawonye.
Utjele bonkhe bantfu, lokufaka ekhatsi indvodza nemfati wayo,Kanye nebantfu lasebakhulile nemachegu.*+
12 Tindlu tabo titawutsatfwa ngulabanye bantfu,Kutsatfwe emasimu abo kanye nebafati babo.+
Ngobe ngitawelula sandla sami ngimelane nebantfu labahlala kulelive,” kusho Jehova.
13 “Bonkhe batizuzisa bona ngetindlela letingaketsembeki, kusukela kulophansi kuya kulohlonishwako;+Baphrofethi nebaphristi nabo abaketsembeki.+
14 Betama kupholisa emanceba ebantfu bami ngekumane nje batsi:
‘Kunekuthula! Kunekuthula!’
Kantsi kute kuthula.+
15 Utsi banawo nje emahloni ngetintfo letenyanyekako labatentile?
Bete ngisho nalamancane!
Abati nekutsi kunjani kuhlazeka!+
Ngako batawubulawa njengalabanye lesebabulewe.
Batawudzayitela nasengibajezisa,” kusho Jehova.
16 Jehova utsi:
“Manini lapho kuhlangana khona tindlela futsi nibuke.
Butani ngetindlela takadzeni,Butani kutsi nguyiphi indlela lekahle bese nihamba ngayo,+Futsi nitawuphumula.”
Kodvwa bona batsi: “Angeke sihambe ngayo.”+
17 “Ngabeka bogadzi+ lebebatsi:
‘Lalelani umsindvo wekukhala kweluphondvo!’”+
Kodvwa bona batsi: “Angeke siwulalele.”+
18 “Ngako-ke lalelani nine tive!
Shengatsi nani nine bantfu ningakwatiLoko lokutakwenteka kubantfu baseJerusalema.
19 Lalelani lana nonkhe nine lenisemhlabeni!
Labantfu ngitabaletsela inhlekelele+Ngenca yemicabango yabo lemibi,Ngobe abakawalaleli emavi amiFutsi bawalile nemtsetfo* wami.”
20 “Akusho lutfo kimi lokungiletsela lamakha esihlahla semphepho labuya eShebaKanye nalomhlanga* losuka eveni lelikhashane.
Angiyifuni iminikelo yenu yekushiswa lephelele,Futsi imihlatjelo yenu iyangicansula.”+
21 Ngako-ke Jehova utsi:
“Labantfu ngitababekela tintfo letitabagilaFutsi batawugileka bawe,Kutawugileka bobabe nemadvodzana abo,Kugileke umuntfu nemngani wakhe,Futsi bonkhe batawushabalala.”+
22 Jehova utsi:
“Lalelani la! Kuta bantfu labasuka eveni lasenyakatfo,Kutawuchamuka sive lesikhulu lesisuka ekugcineni kwemhlaba.+
23 Batawuhloma ngebutjoki nangesikhali.
Abananhlitiyo futsi kute labatamvela.
Emavi abo atawufana nekubhodla kwelwandle,Futsi batawube bagibele emahhashi.+
Beta njengelibutfo kuze banihlasele nine bantfu baseSiyoni.”*
24 Sivile ngalabantfuFutsi sesiphelelwe ngemandla,+Sicindzeteleke kakhulu,Buhlungu* lesibuvako bufana nebemfati lobelekako.+
25 Ningayi emasimini,Futsi ningayi nasemgwacweni,Ngobe lesitsa siphetse inkemba,Yonkhe indzawo kuyesabeka.
26 Awu bantfu baseSiyoni,*Gcokani tindvwangu temasaka+ futsi nitigicite emlotseni.
Dzindzani sililo kube shengatsi nikhalela indvodzana lekuphela kwayo,+Ngobe sitsa lesitosibhubhisa sitawufika singakasigadzi.+
27 “Ngikwente* wafana nemuntfu locwengisisa lisilivaNgobe kufanele ucwengisise bantfu bami,Kufanele ubanakisise futsi utibukisise tintfo labatentako.
28 Bonkhe banenkhani yesicoco,+Bahamba banyundzela labanye.+
Balukhuni njengelitfusi nensimbi,Futsi bonkhe bakhohlakele.
29 Umuntfu angetama kamatima kubacwengisisa ngemlilo, kuze kushe ngisho nemathulusi akhe.
Kodvwa baphuma solo banemthofi nje.
Umuntfu usuke asebentela lite naketama kubacwengisisa+Ngobe bonkhe babantfu lababi.+
30 Bantfu batababita ngekutsi balisiliva lelingenamsebenti,Ngobe Jehova ubalahlile.”+
Imibhalo lengentansi
^ NgesiHebheru kutsi, “Indvodzakati yaseSiyoni.”
^ NgesiHebheru kutsi, “Tingcweliseni.”
^ NgesiHebheru kutsi, “atikasokwa.”
^ NgesiHebheru kutsi, “lasebanemalanga baphila.”
^ Nobe “nesicondziso.”
^ Lona ngumhlanga lonukelela kahle.
^ NgesiHebheru kutsi, “indvodzakati yaseSiyoni.”
^ NgesiHebheru kutsi, “Umhelo.”
^ NgesiHebheru kutsi, “ndvodzakati yebantfu bami.”
^ Lokusho, Jeremiya.
