Jobe 19:1-29
19 Jobe waphendvula watsi:
2 “Kutawuze kube ngunini solo ningicansula,*+Nisho tintfo letingephula inhlitiyo?+
3 Sengemahlandla langu-10 nyalo solo ningitsetsisa;*Nite nemahloni ekungiphatsa kabi.+
4 Nangabe ngente liphutsa,Leyo yindzaba yami ngedvwana.
5 Naniphikelela nitenta labancono kunami,Nitsi lokuhlupheka lengibhekene nako kulungile,
6 Nibowati-ke kutsi nguNkulunkulu longibangele tonkhe letintfo,Futsi ungibambe ngelinethi lakhe lekutingela.
7 Ngihlale ngikhala ngenca yekuphatfwa kabi, kodvwa kute longiphendvulako;+Ngichubeka ngicela lusito, kodvwa kute lowenta tintfo ngendlela lelungile.+
8 Indlela lengihamba kuyo uyivimbe ngelubondza lolwakhiwe ngematje, futsi angikhoni kwendlula;Umbonye indlela yami ngebumnyama.+
9 Ungemuke sitfuntiWasusa umchele enhloko yami.
10 Uhhohlota umtimba wami ngalana nangalana ngize ngishabalale;Litsemba lami ulizuphuna njengesihlahla.
11 Intfukutselo yakhe iyangivutsela,Futsi ungitsatsa njengesitsa sakhe.+
12 Emasotja akhe abutsana ndzawonye futsi angivimbetele,Amisa emathende kuto tonkhe tinhlangotsi telithende lami.
13 Ungehlukanise nabomnaketfu,Nebantfu labangatiko sebangilahlile.+
14 Bangani bami labakhulu abasekho,*Nebantfu lebengibetayele sebangikhohliwe.+
15 Tivakashi letisendlini yami+ kanye netincekukati tami tingitsatsa njengesihambi;Sengingumuntfu wekuhamba emehlweni ato.
16 Nangibita sisebenti sami, asisabeli;Ngisho nobe sengisincenga kutsi singentele umusa.
17 Umoya lengiwuphefumulako sewuyenyanyeka kumfati wami,+Futsi sengibanukela kabi nabomnaketfu.*
18 Ngisho nebantfwana labancane bangibukela phansi;Nangisukuma, bavele bangedzelele.
19 Bonkhe bangani bami labakhulu sebayangenyanya,+Futsi bantfu lebengibatsandza sebangijikele.+
20 Ematsambo ami anamatsele esikhunjeni nasenyameni yami,+Ngisindze ngekulambisa.
21 Ngihawukeleni bangani bami, ngihawukeleni,Ngobe sandla saNkulunkulu singishayile.+
22 Kungani nichubeka ningiphatsa kabi njengobe Nkulunkulu enta,+Ningihlasela ningangiyekeli?*+
23 Kube mane emavi ami abebhalwe phansi,Kube mane abebhalwe encwadzini!
24 Awu, kube abebhalwe edvwaleni ngendlela lengacimeki,Abhalwe ngelutsi lwensimbi nangemthofi!
25 Ngobe ngati kahle kutsi umhlengi*+ wami uyaphila;Utawufika ngemuva kwesikhatsi futsi eme etikwemhlaba.*
26 Ngemuva kwekutsi kugula sekuhhohlote sikhumba sami,Ngitambona Nkulunkulu yingci nje nangisaphila,
27 Ngitambona mine matfupha,Ngimbone ngemehlo ami, hhayi alomunye umuntfu.+
Ekujuleni kwenhlitiyo yami loko ngiyakulangatelela!
28 Ngobe nitsi: ‘Usho kutsini nakatsi simphatsa kabi?’+
Kube shengatsi umsuka walenkinga ngimi.
29 Kufanele nani niyesabe inkemba,+Ngobe inkemba iletsa sijeziso kulabo labonako;Kufanele nati kutsi ukhona umehluleli.”+
Imibhalo lengentansi
^ NgesiHebheru kutsi, “nicansula umphefumulo wami.” Fundza Tinchazelo Temagama.
^ Nobe “ningetfuka.”
^ Nobe “Tihlobo tami atisekho.”
^ NgesiHebheru kutsi, “sengiwanukela kabi emadvodzana esisu sami,” lokusho sisu lengaphuma kuso (sisu samake).
^ NgesiHebheru kutsi, “Futsi ningeneliswa yinyama yami?”
^ Nobe “umtsengi.”
^ NgesiHebheru kutsi, “etikwelutfuli.”
