Jobe 27:1-23
27 Jobe wachubeka wakhuluma watsi:
2 “Ngifunga Nkulunkulu lophilako longiphetse kabi,+Ngifunga Somandla Nkulunkulu lophilako, lowente kuphila kwami kwaba buhlungu,+
3 Yingci nje nangisaphefumula,Futsi nemoya lovela kuNkulunkulu usekimi,+
4 Umlomo wami angeke ukhulume tintfo letingakalungi;Nelulwimi lwami angeke lukhulume tintfo letikhohlisako!
5 Angikucabangi nekukucabanga kutsi ngingatsi nine nilungile!
Ngitawuze ngife solo ngingakabulahli* bucotfo bami!+
6 Ngitawuchubeka ngitsi ngilungile futsi ngeke ngiyekele kusho njalo;+Inhlitiyo yami angeke ingilahle* kuko konkhe kuphila kwami.*
7 Shengatsi sitsa sami singajeziswa njengebantfu lababi,Nalabo labangihlaselako bajeziswe njengebantfu labangakalungi.
8 Umuntfu lowenta lokubi* uba nalo yini litsemba nakabhujiswa,+Nakwenteka Nkulunkulu ambulala?
9 Nkulunkulu utakuva yini kukhala kwakheNakafikelwa kuhlupheka?+
10 Loyo muntfu utawujabula yini ngaSomandla?
Utawuthantaza yini kuNkulunkulu ngaso sonkhe sikhatsi?
11 Ngitanifundzisa mayelana nemandla aNkulunkulu;*Ngeke nginifihlele lutfo ngaSomandla.
12 Nangabe nonkhe nibone imibono,Kungani-ke lenikushoko kulite nje?
13 Ngulesi sabelo Nkulunkulu lasinika umuntfu lomubi,+Lifa Somandla lalinika bantfu labacindzetela labanye.
14 Ngisho nobe angaba nemadvodzana lamanyenti, atawufa ngenkemba,+Nebantfwana bakhe ngeke babe nekudla lokwenele.
15 Labo labatawusala nasekafile batawubulawa sifo lesingumshayabhuce,Futsi bafati babo ngeke babalilele.
16 Ngisho nobe angabutsisa lisiliva kube shengatsi lutfuli,Futsi abutsise timphahla letidulile kube shengatsi lubumba,
17 Ngisho nobe angatibutsisa letimphahla,Titawugcokwa ngumuntfu lolungile,+Futsi labamsulwa batawehlukaniselana lelisiliva lakhe.
18 Indlu yakhe itsambe njengendlu yemvunya,Injengendzawo yekukhosela+ leyakhiwe ngugadzi.
19 Utawulala anjingile kodvwa kute latakuvuna;Utawutsi nakavula emehlo, atfole kungenalutfo.
20 Kwesaba kumhlasela njengetikhukhula;Sivunguvungu siyamphephula ebusuku.+
21 Umoya wasemphumalanga utamphephula, futsi ngeke asabakhona;Utamphephula umsuse endzaweni yakhe.+
22 Lomoya utawutijika etikwakhe ungamveli+Njengobe atawube etama kamatima kuwubalekela.+
23 Utawushaya tandla umhleke bulimaFutsi umshayele inkwela+ usendzaweni yawo.*
Imibhalo lengentansi
^ Nobe “ngingakabushiyi; ngilondvolota.”
^ Nobe “ingihluphe.”
^ Nobe “nangisaphila.”
^ Nobe “losihlubuki.”
^ Kungaphindze kubekwe ngekutsi, “ngesandla saNkulunkulu.”
^ Kungaphindze kubekwe ngekutsi, “Batawushaya tandla bamhleke bulima futsi bamshayele inkwela basendzaweni yabo.”
