Jobe 33:1-33
33 “Manje-ke Jobe, ngicela ulalele emavi ami;Ukulalele konkhe lengikushoko.
2 Ngicela ungilalele! Mine ngitawukhuluma;Umlomo wami kufanele ukhulume.*
3 Emavi ami akhombisa kutsi ngicotfo enhlitiyweni,+Futsi tindzebe tami tikhuluma kona kanye loko lengikwatiko.
4 Ngentiwe ngumoya waNkulunkulu,+Emandla aSomandla angenta ngaphila.+
5 Ngiphendvule nawungakhona;Beka umbono wakho embikwami; tilungiselele kungiphendvula.
6 Ngifanana nawe phambi kwaNkulunkulu weliciniso;Nami ngabunjwa ngelubumba.+
7 Ngako kute sidzingo sekutsi ungesabe,Emavi ami ngeke abe matima etikwakho.
8 Ngikuvile nawukhuluma,Bengisolo ngiweva emavi akho nawutsi:
9 ‘Ngimsulwa, ngite sono;+Ngihlantekile, ngite neliphutsa.+
10 Kodvwa Nkulunkulu uhlale anesizatfu sekumelana nami;Ungitsatsa njengesitsa sakhe.+
11 Uyangijezisa;*Ahlolisise tonkhe tindlela tami.’+
12 Kodvwa awukhulumi liciniso nawusho njalo, ngako ngitakuphendvula:
Nkulunkulu mkhulu kakhulu kunemuntfu.+
13 Kungani ukhonona ngaye?+
Ngulokutsi akawaphendvuli yini onkhe emavi akho?+
14 Ngobe Nkulunkulu ukhuluma kanye aphindze akhulume kwesibili,Nanobe kute lolalelako,
15 Ukhuluma ngeliphupho, ngembono ebusuku,+Ngesikhatsi bantfu babanjwe butfongo lobukhuluBaselele emibhedzeni yabo.
16 Ngemuva kwaloko uvula tindlebe tabo+Afake imiyalo yakhe etingcondvweni tabo,*
17 Kute akhweshise umuntfu ekwenteni lokubi+Futsi amvimbe kutsi angatishayi sifuba.+
18 Nkulunkulu uyamgcina angayi emgodzini,*+Futsi angafi ngenkemba.*
19 Umuntfu ujeziswa buhlungu nakalele embhedzeni wakheAjeziswe nabuhlungu bematsambo lobungapheli,
20 Kangangekutsi uze akwenyanye* kudla,Futsi ale* ngisho nekudla lokumnandzi.+
21 Wondza kakhulu,Kangangekutsi ematsambo akhe aze abonakale.*
22 Kuphila kwakhe kusondzela* emgodzini;*Kusondzela kulabo labafuna kumbulala.
23 Nangabe kufika sitfunywa* kuye,Umkhulumeli munye kulabayinkhulungwane,Simtjele kutsi yini lelungile,
24 Bese Nkulunkulu umentela umusa futsi atsi:
‘Mvikele angehleli emgodzini!*+
Sengiyitfolile inhlawulo!+
25 Umtimba wakhe awube musha kunewemntfwana;*+Akabuyele abe nemandla njengalapho asemusha.’+
26 Utawuthantaza kuNkulunkulu+ futsi Nkulunkulu utamemukela,Utawujabula kakhulu nakabona buso baNkulunkulu,NaNkulunkulu utawuphindze amtsatse njengemuntfu lolungile.
27 Loyo muntfu utawutjela* bantfu atsi:
‘Ngonile+ futsi ngakugwegwisa lokulungile,Kodvwa angizange ngikutfole loko lebekungifanele.*
28 Ungisindzisile* kuze ngingehleli emgodzini,*+Futsi ngitakubona kukhanya.’
29 Ecinisweni Nkulunkulu wenta tonkhe letintfoAtentele umuntfu emahlandla lamanyenti,
30 Kuze amkhulule* ethuneni,Khona atewujabulela kuphila.+
31 Ngilalele Jobe! Ngilalelisise!
Bindza, khona ngitewuchubeka ngikhuluma.
32 Nakukhona lofuna kukusho, kusho kimi.
Khuluma, ngobe ngiyafisa kuveta kutsi umsulwa.
33 Nakute longakusho, kufanele ulalele mine;Bindza, futsi mine ngitakufundzisa kuhlakanipha.”
Imibhalo lengentansi
^ NgesiHebheru kutsi, “Lulwimi lwami nelwanga kufanele kukhulume.”
^ NgesiHebheru kutsi, “Uvalela tinyawo tami esitokisini.” Fundza Tinchazelo Temagama.
^ NgesiHebheru kutsi, “Abeke luphawu emiyalweni labanika yona.”
^ Nobe “ethuneni.”
^ Nobe “ngesikhali.”
^ Nobe “umphefumulo wakhe wale.”
^ NgesiHebheru kutsi, “kuphila kwakhe kuze kwenyanye.”
^ Nobe “ahlale ebaleni.”
^ Nobe “Umphefumulo wakhe usondzela.”
^ Nobe “ethuneni.”
^ Nobe “ingilosi.”
^ Nobe “ethuneni.”
^ NgesiHebheru kutsi, “Inyama yakhe ayibe yinsha kuneyemntfwana.”
^ NgesiHebheru kutsi, “utawuhlabelela.”
^ Kungaphindze kubekwe ngekutsi, “Futsi akuzange kungizuzise.”
^ Nobe “Usindzise umphefumulo wami.”
^ Nobe “ethuneni.”
^ Nobe “akhulule umphefumulo wakhe.”
