Kulandzisa KwaJohane 20:1-31
20 Ngelilanga lekucala evikini,* Mariya waseMagdala waya ethuneni ekuseni+ kakhulu, wakhandza litje lisusiwe kulelithuna.+
2 Ngako wagijima waya kuSimoni Phetro nakulomfundzi Jesu lebekamtsandza,+ wafike watsi kubo: “INkhosi bayitsetse ethuneni,+ futsi asati kutsi bayibekephi.”
3 Phetro nalolomunye umfundzi besuka baya kulelithuna.
4 Bobabili bagijima, kodvwa lolomunye umfundzi wagijima kakhulu kunaPhetro wefika kucala.
5 Nakagobondzela ahlola, wabona tindvwangu telineni tiphansi,+ kodvwa akazange angene ngekhatsi.
6 Simoni Phetro wefika emvakwakhe, wangena ethuneni. Watfola letindvwangu telineni tiphansi.
7 Indvwangu lebeyigocotelwe enhloko yaJesu beyingekho kuleti letinye tindvwangu, kodvwa beyigocwe yodvwa.
8 Lomfundzi lobekafike kucala ethuneni naye wangena, futsi wakubona loko wase uyakukholwa.
9 Bebangakawucondzi umbhalo lotsi Jesu bekufanele avuke ekufeni.+
10 Ngako labafundzi babuyela emakhaya abo.
11 Nanobe kunjalo, Mariya bekasolo eme ngephandle kwalelithuna akhala. Njengobe akhala, wagobondzela kuze ahlole ngekhatsi ethuneni,
12 futsi wabona tingilosi letimbili+ tigcoke lokumhlophe, tihleti lapho Jesu bekabekwe khona, lenye ingasenhloko, lenye ingasetinyaweni.
13 Ngako tatsi kuye: “Ukhalelani?” Yena watiphendvula watsi: “Batsetse iNkhosi yami, angati nekutsi bayibekephi.”
14 Ngemuva kwekusho loko, wagucuka wabona Jesu emile, kodvwa akazange abone kutsi nguye.+
15 Jesu watsi kuye: “Ukhalelani, futsi ufuna bani?” Mariya bekacabanga kutsi ngulomuntfu lobekagadza insimu, ngako watsi kuye: “Mnumzane, nangabe kunguwe lomtsetse, ngicela ungitjele kutsi umbekephi, ngitokuya ngiyomlandza.”
16 Jesu watsi kuye: “Mariya!” Yena wagucuka wakhuluma ngesiHebheru, watsi kuye: “Raboni!” (lokusho kutsi “Mfundzisi!”)
17 Ngako Jesu watsi: “Yekela kunginkonkoshela, ngobe ngisengakenyukeli kuBabe. Kodvwa hamba uye kubomnaketfu+ utsi kubo: ‘Sengenyukela kuBabe wami+ longuBabe wenu, nakuNkulunkulu wami+ longuNkulunkulu wenu.’”
18 Mariya waseMagdala wahamba wayobikela bafundzi, wafike watsi: “Ngiyibonile iNkhosi!” Wabatjela naloko Jesu bekakushito.+
19 Ngalelolanga kusihlwa, ngelilanga lekucala evikini, bafundzi bebawukhiyile umnyango walapho bebakhona khona ngobe bebesaba emaJuda. Jesu wefika wema emkhatsini wabo, watsi: “Kuthula akube nani.”+
20 Nasekakushito loku, wabakhombisa tandla takhe kanye nemhlubulo wakhe.+ Bafundzi bajabula kakhulu nababona iNkhosi.+
21 Jesu waphindze watsi kubo: “Kuthula akube nani.+ Njengobe Babe angitfumile,+ nami ngiyanitfuma.”+
22 Ngemuva kwekusho loku wabaphefumulela, wase utsi: “Yemukelani umoya longcwele.+
23 Nangabe nimtsetselela umuntfu lowonile, Nkulunkulu usuke sekamtsetselele loyo muntfu. Kodvwa nangabe ningamtsetseleli umuntfu lowonile, naNkulunkulu usuke angakamtsetseleli.”
24 Kodvwa Tomase,+ lomunye webaphostoli labangu-12, lebekabitwa ngekutsi Liphahla, bekangekho ngesikhatsi Jesu efika.
25 Ngako laba labanye bafundzi batsi kuye: “Siyibonile iNkhosi!” Kodvwa yena watsi kubo: “Ngaphandle kwekutsi ngibone emanceba* etipikili etandleni takhe, ngifake nemuno wami kuwo, futsi ngifake nesandla sami emhlubulweni wakhe,+ ngeke ngize ngikholwe.”
26 Ngemuva kwemalanga langu-8, bafundzi bakhe baphindze bahlala endlini, naTomase bekakhona. Nanobe iminyango beyikhiyiwe, Jesu wefika wema emkhatsini wabo, watsi: “Kuthula akube nani.”+
27 Wase utsi kuTomase: “Faka umuno wakho lapha, ubuke tandla tami, ufake nesandla sakho emhlubulweni wami, kuze ukholwe uyekele nekungabata.”*
28 Tomase watsi: “Nkhosi, Nkulunkulu wami!”
29 Jesu watsi kuye: “Sewuyakholwa yini njengobe sewungibonile? Bayajabula labo labakholwako nanobe bangakaboni.”
30 Jesu wentela bafundzi bakhe letinye timangaliso letinyenti, letingakabhalwa lapha kulomculu.+
31 Kodvwa leti tabhalwa kuze nitewukholwa kutsi Jesu unguKhristu, iNdvodzana yaNkulunkulu, futsi ngekukholwa nitawutfola kuphila ngelibito lakhe.+
Imibhalo lengentansi
^ Fundza umbhalo longentansi waMat 28:1.
^ Nobe “tibati.”
^ NgesiGriki kutsi, “kungakholwa.”
