Kulandzisa KwaJohane 3:1-36
3 Bekunendvodza lebeyingumFarisi libito layo kunguNikhodemu,+ futsi beyisikhulu semaJuda.
2 Lendvodza yeta kuJesu ebusuku+ yatsi: “Mfundzisi,*+ siyati kutsi ungumfundzisi lovela kuNkulunkulu, ngobe kute umuntfu longenta timangaliso+ letingaka nangabe angakanikwa nguNkulunkulu emandla ekutenta.”+
3 Jesu watsi kuyo: “Ngicinisile, ngicinisile ngitsi kuwe: Ngaphandle kwekutsi umuntfu atalwe kabusha,*+ ngeke awubone uMbuso waNkulunkulu.”+
4 Nikhodemu watsi kuye: “Umuntfu angatalwa njani kabusha sekavele amdzala? Angabuyela yini esiswini samake wakhe, aphindze atalwe?”
5 Jesu wamphendvula watsi: “Ngicinisile, ngicinisile ngitsi kuwe: Nangabe umuntfu angakatalwa ngemanti+ nangemoya,+ ngeke angene eMbusweni waNkulunkulu.
6 Loko lokutelwe yinyama kuyinyama, naloko lokutelwe ngumoya kungumoya.
7 Ungamangali ngobe ngitsite: Kufanele nitalwe kabusha.
8 Umoya uhhusha lapho utsandza khona, nekuhhusha kwawo niyakuva, kodvwa anati lapho uphuma khona, nalapho uya khona. Kunjalo-ke nangawo wonkhe umuntfu lotelwe ngemoya.”+
9 Nikhodemu watsi: “Loku kungenteka njani?”
10 Jesu watsi kuye: “Ungumfundzisi wema-Israyeli, kodvwa awutati letintfo?
11 Ngicinisile, ngicinisile ngitsi kuwe: Lesikwatiko sikhuluma ngako, naloko lesikubonile sifakaza ngako, kodvwa nine anibemukeli lobufakazi.
12 Nginitjele tintfo tasemhlabeni kodvwa nangangikholwa, nitangikholwa njani-ke nasenginitjela tintfo tasezulwini?
13 Kute umuntfu lowake wenyukela ezulwini+ ngaphandle kweNdvodzana yemuntfu leyehla ivela khona.+
14 Njengobe Mosi alengisa inyoka ehlane,+ neNdvodzana yemuntfu kufanele ilengiswe,+
15 kuze wonkhe umuntfu lokholwa ngiyo atfole kuphila lokuphakadze.+
16 “Ngobe Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo,+ kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.+
17 Nkulunkulu watfumela iNdvodzana yakhe eveni, hhayi kutowehlulela live, kodvwa kuze live lisindziswe ngayo.+
18 Loyo lokholwa ngiyo ngeke ehlulelwe.+ Loyo longakholwa ngiyo sewuvele wehlulelwe, ngobe akazange akholwe egameni leNdvodzana yaNkulunkulu lekuphela kwayo.+
19 Kukhanya sekufikile eveni,+ kodvwa bantfu batsandze bumnyama kunekukhanya, ngobe imisebenti yabo mibi, kungako batawehlulelwa.
20 Umuntfu lowenta tintfo letimbi uyakutondza kukhanya futsi aketi ekukhanyeni, kuze imisebenti yakhe ingatobekwa ebaleni.
21 Kodvwa loyo lowenta lokulungile uyeta ekukhanyeni,+ kuze imisebenti yakhe ibonakale kutsi ivumelana nentsandvo yaNkulunkulu.”
22 Ngemuva kwaloko, Jesu nebafundzi bakhe baya emaphandleni aseJudiya, wafike wahlala nabo, futsi wabhabhatisa bantfu.+
23 NaJohane bekabhabhatisa e-Enoni edvute naseSalimi, ngobe bekunemanti lamanyenti lapho,+ nebantfu bebasolo beta futsi babhajatiswa;+
24 Johane bekasengakafakwa ejele.+
25 Kwesuka imphikiswane emkhatsini webafundzi baJohane nalomunye umJuda, imayelana nekuhlanjululwa.
26 Ngako beta kuJohane batsi: “Mfundzisi,* lendvodza lebewunayo eJordane, leyo lowafakaza ngayo,+ seyiyabhabhatisa futsi bonkhe bantfu baya kuyo.”
27 Johane wabaphendvula watsi: “Umuntfu ngeke abe nentfo letsite ngaphandle kwekutsi anikwe yona ivela ezulwini.
28 Nani nibofakazi bekutsi ngatsi: ‘Angisuye Khristu,+ kodvwa ngitfunywe kutsi ngihambe embikwakhe.’+
29 Loyo lonamakoti ngumkhwenyane.+ Kodvwa umngani wemkhwenyane nakema edvute futsi eva livi lakhe, ujabula kakhulu ngaloko. Ngako-ke nami ngijabula kakhulu.
30 Yena utawuchubeka akhula, kodvwa mine ngitawuchubeka ngincipha.”
31 Loyo lovela etulu+ uphakeme kunabo bonkhe. Lovela emhlabeni wasemhlabeni, futsi ukhuluma tintfo tasemhlabeni. Loyo lovela ezulwini uphakeme kunabo bonkhe.+
32 Yena ufakaza ngaloko lakubonile nalakuvile,+ kodvwa kute umuntfu lowemukela bufakazi bakhe.+
33 Umuntfu lowemukele bufakazi bakhe uyacinisekisa* kutsi Nkulunkulu ucinisile.+
34 Loyo lotfunywe nguNkulunkulu ukhuluma emavi aNkulunkulu,+ ngobe Nkulunkulu akemani* umoya wakhe.
35 Babe uyayitsandza iNdvodzana+ futsi ubeke tonkhe tintfo etandleni tayo.+
36 Lokholwa yiNdvodzana utawutfola kuphila lokuphakadze;+ longayilaleli iNdvodzana ngeke akutfole kuphila,+ kodvwa lulaka lwaNkulunkulu lusetikwakhe.+
Imibhalo lengentansi
^ NgesiGriki kutsi, “Rabi.”
^ Kungaphindze kubekwe ngekutsi, “atalwe ngekwasezulwini.”
^ NgesiGriki kutsi, “Rabi.”
^ NgesiGriki kutsi, “ubeke luphawu.”
^ Nobe “akakalelani.”
