Joshuwa
1:1-18
1 Ngemuva kwekufa kwaMosi inceku yaJehova, Jehova wakhuluma naJoshuwa*+ lobekayinceku yaMosi futsi ayindvodzana yaNuni,+ watsi:
2 “Mosi inceku yami sewufile.+ Ngako tilungiselele kuze wena nabo bonkhe labantfu newele iJordane, niye kulelive lengilinika bantfu baka-Israyeli.+
3 Ngitaninika yonkhe indzawo lenitawunyatsela kuyo, njengobe nje ngetsembisa Mosi.+
4 Indzawo yenu itawusuka ehlane ize iyewufika eLebanoni, nasemfuleni lomkhulu iYufrathe, lokungilo lonkhe live lemaHethi,+ futsi itawuchubeka ize iyofika eLwandle Lolukhulu* ngasenshonalanga.+
5 Kute umuntfu lotawukhona kumelana nawe kuko konkhe kuphila kwakho.+ Ngitawuba nawe,+ njengobe nje benginaMosi. Ngeke ngikulahle nobe ngikushiye.+
6 Bani nesibindzi futsi ucine,+ ngobe nguwe lotawenta labantfu batsatse lelive lengafunga kubokhokho babo kutsi ngitabanika lona libe lifa labo.+
7 “Wena nje bani nesibindzi futsi ucine, uwulalelisise wonkhe loMtsetfo lowawutjelwa nguMosi inceku yami. Ungaphambuki kuwo uye ngesekudla nobe ngesencele,+ kuze wente tintfo ngekuhlakanipha nome ngukuphi lapho uya khona.+
8 Lencwadzi yeMtsetfo akukafaneli isuke emlonyeni wakho,+ futsi ubocabangisisa ngayo* imini nebusuku kuze ukugcine ngekucophelela konkhe lokubhalwe kuyo.+ Nawenta njalo, utawuphumelela futsi utawenta tintfo ngekuhlakanipha.+
9 Ngiyakutjela ngitsi: Bani nesibindzi futsi ucine. Ungesabi nobe wetfuke, ngobe Jehova Nkulunkulu wakho unawe nome ngukuphi lapho uya khona.”+
10 Ngemuva kwaloko, Joshuwa wakhuluma netindvuna talesive watsi:
11 “Hambani kuyo yonkhe lendzawo lokuhlalwa kuyo, nitsi kubantfu: ‘Lungisani kudla ngobe ngemuva kwemalanga lamatsatfu nitakwewela iJordane kuze ningene nitsatse lelive Jehova Nkulunkulu wenu laninika lona kutsi libe lenu.’”+
12 Joshuwa wakhuluma nesive sakaRubeni, sive sakaGadi, nencenye yesive sakaManase, watsi:
13 “Khumbulani loko Mosi inceku yaJehova lanitjela kona nakatsi:+ ‘Jehova Nkulunkulu wenu uninika kuphumula futsi sewuninikile lelive.
14 Bafati benu, bantfwana benu kanye nemfuyo yenu kutawuhlala kulelive Mosi laninike lona ngala* kweJordane,+ kodvwa nonkhe nine leningemachawe lanemandla+ kufanele newele iJordane ngaphambi kwebanakenu,+ nihleleke nibe ngemacembu emasotja. Kufanele nibasite labanakenu
15 kuze kube ngulapho Jehova abaniketa kuphumula njengobe nje nani aniniketile, futsi nabo sebalitsetse lelive Jehova Nkulunkulu wenu labanika lona. Ngemuva kwaloko nibobuyela kulelive lenanikwa lona kutsi nihlale kulo, live Mosi inceku yaJehova laninika lona ngasemphumalanga yeJordane.’”+
16 Baphendvula Joshuwa batsi: “Sitakwenta konkhe loko lositjele kona, futsi sitakuya nobe ngukuphi lapho utsi asiye khona.+
17 Njengobe sakulalela konkhe Mosi lakusho, nawe sitakulalela. Shengatsi Jehova Nkulunkulu wakho angaba nawe, njengobe nje abenaMosi.+
18 Nobe ngubani longeke akulalele lokushoko nalongeke akugcine konkhe lomtjela kona utawubulawa.+ Wena nje bani nesibindzi futsi ucine.”+
Imibhalo lengentansi
^ Nobe “Jehoshuwa,” lokusho kutsi “Jehova Uyinsindziso.”
^ Lokusho, iMedithera.
^ Nobe “uboyifundza ngelivi leliphansi.”
^ Lokusho, emphumalanga.
