Joshuwa
10:1-43
10 Ngekushesha nje ngemuva kwekutsi Adoni-sedeki inkhosi yaseJerusalema eve kutsi Joshuwa sewuncobe i-Ayi futsi wayinikela ekubhujisweni, weva nekutsi wente kuyo nasenkhosini yayo+ loko lakwenta eJerikho kanye nasenkhosini yakhona,+ nekutsi bantfu baseGibeyoni besebakhe kuthula nema-Israyeli+ futsi bachubeka bahlala nawo,
2 wetfuka kakhulu+ ngobe iGibeyoni beyilidolobha lelikhulu, ifanana nalelinye lemadolobha lamakhulu labuswa yinkhosi. Lelidolobha belilikhulu kune-Ayi+ futsi onkhe emadvodza akhona bekangemachawe.
3 Ngako Adoni-sedeki inkhosi yaseJerusalema watfumela umlayeto kuHohamu inkhosi yaseHebroni,+ kuPhiramu inkhosi yaseJamuthi, kuJafiya inkhosi yaseLakhishi kanye nakuDebiri inkhosi yase-Egloni,+ lotsi:
4 “Buyani ningisite sitohlasela iGibeyoni ngobe yakhe kuthula naJoshuwa kanye nema-Israyeli.”+
5 Ngenca yaloko emakhosi lasihlanu ema-Amori,+ lokuyinkhosi yaseJerusalema, inkhosi yaseHebroni, inkhosi yaseJamuthi, inkhosi yaseLakhishi nenkhosi yase-Egloni, ahlangana ndzawonye akanye nemabutfo awo futsi aya kuyovimbetela iGibeyoni kuze alwe nayo.
6 Emadvodza aseGibeyoni ase atfumela livi kuJoshuwa lapho bekahlala khona eGilgali,+ atsi: “Ungatilahli tigcili takho.*+ Sicela ute lapha ngekushesha! Sisindzise uphindze usisite! Onkhe emakhosi ema-Amori lahlala esifundzeni lesinetintsaba ahlangene ndzawonye kuze amelane natsi.”
7 Ngako Joshuwa wakhuphuka esuka eGilgali akanye nawo onkhe emadvodza emphi nemachawe lanemandla.+
8 Jehova wase utsi kuJoshuwa: “Ungabesabi+ ngobe ngibanikele esandleni sakho.+ Kute ngisho namunye kubo lotawukhona kumelana nawe.”+
9 Joshuwa wabahlasela bangakagadzi ngemuva kwekuhamba busuku bonkhe kusuka eGilgali.
10 Jehova wabangela kutsi badideke embikwema-Israyeli futsi ema-Israyeli+ abulala labanyenti babo eGibeyoni, abalandzela ngendlela leyenyukelako yaseBhethi-horoni futsi ababulala aze ayewufika e-Azekha naseMakheda.
11 Ngesikhatsi babalekela ema-Israyeli futsi sebasendleleni leyehlelako yaseBhethi-horoni, Jehova wehlisela kubo sangcotfo lesikhulu lesivela esibhakabhakeni baze bayewufika e-Azekha futsi bafa. Ecinisweni, banyenti lababulawa sangcotfo kunalabo ema-Israyeli lababulala ngenkemba.
12 Kungalelilanga Jehova lancoba ngalo ema-Amori embikwesive sema-Israyeli, lapho Joshuwa akhuluma naJehova embikwema-Israyeli watsi:
“Langa, mani+ unganyakati eGibeyoni,+Nawe nyeti, mani eSihosheni* sase-Ayaloni!”
13 Ngako lilanga lema langanyakati, nenyeti yanganyakati kwaze kwaba ngulapho sive sema-Israyeli sesitiphindziselele etitseni taso. Angitsi loku kubhaliwe encwadzini yaJashari?+ Lilanga lema langanyakati emkhatsini wesibhakabhaka futsi langashoni lilanga lonkhe.
14 Akukaze kube nelilanga lelifanana nalo esikhatsini lesendlulile nangemuva kwalo, lapho Jehova alalela khona livi lemuntfu,+ ngobe Jehova abewalwela ema-Israyeli.+
15 Ngemuva kwaloko Joshuwa nawo onkhe ema-Israyeli babuyela endzaweni lebebahlala kuyo eGilgali.+
16 Ngaleso sikhatsi, lamakhosi lasihlanu abaleka afike abhaca emhumeni loseMakheda.+
17 Joshuwa wase utfola umlayeto lotsi: “Lamakhosi lasihlanu atfolakele abhace emhumeni loseMakheda.”+
18 Ngako Joshuwa watsi: “Gicitelani ematje lamakhulu ekungeneni kwalemihume niphindze nibeke emadvodza kutsi awagadze.
19 Kodvwa lalabanye kini kufanele bangemi. Ticosheni letitsa tenu niphindze nitibulale nitichamukela ngemuva.+ Ningativumeli kutsi tingene emadolobheni ato ngobe Jehova Nkulunkulu wenu utinikele etandleni tenu.”
20 Ngemuva kwekutsi Joshuwa nema-Israyeli sebacedzile kubulala linani lelikhulu laletitsa, futsi baticotfula ngaphandle kwalabanye lababalekela emadolobheni labiyelwe,
21 bonkhe bantfu babuyela baphephile kuJoshuwa endzaweni lebebahlala kuyo eMakheda. Kute umuntfu lowaba nesibindzi sekukhuluma ngisho nalinye livi* lelimelene nema-Israyeli.
22 Joshuwa wabese utsi: “Vulani lomnyango walomhume, nikhokhe lamakhosi lasihlanu niwaletse lapha kimi.”
23 Bawaletsa kuJoshuwa lamakhosi lasihlanu labekasemhumeni, lokuyinkhosi yaseJerusalema, inkhosi yaseHebroni, inkhosi yaseJamuthi, inkhosi yaseLakhishi kanye nenkhosi yase-Egloni.+
24 Ngesikhatsi baletsa lamakhosi kuJoshuwa, wabita onkhe emadvodza aka-Israyeli wase utsi etindvuneni temadvodza emphi labehambe naye: “Sondzelani lapha. Nyatselani tintsamo talamakhosi.” Lamadvodza eta afike anyatsela tintsamo talamakhosi.+
25 Ngemuva kwaloko Joshuwa watsi kuwo: “Ningesabi nobe netfuke.+ Manini sibindzi futsi nicine, ngobe nguloku Jehova latakwenta kuto tonkhe titsa lenilwa nato.”+
26 Ngako Joshuwa wawabulala wabese uwalengisa etingodvweni* letisihlanu futsi alenga lapho kwaze kwahlwa.
27 Ekushoneni kwelilanga, Joshuwa watsi awehliswe kuletingodvo,+ ajikijelwe kulomhume lebekabhace kuwo. Ngemuva kwaloko, kwagicitelwa ematje lamakhulu emnyango walomhume, futsi solo alapho kuze kube ngulamuhla.
28 Ngalelolanga Joshuwa watsatsa iMakheda,+ wayihlasela ngenkemba. Wabhubhisa inkhosi yakhona nabo bonkhe bantfu balapho, futsi kute lowasindza.+ Wenta enkhosini yaseMakheda+ loko labekwente enkhosini yaseJerikho.
29 Ngemuva kwaloko, Joshuwa kanye nawo onkhe ema-Israyeli besuka eMakheda baya eLibna+ futsi balwa nayo.
30 Jehova wanikela neLibna kanye nenkhosi yakhona+ esandleni sema-Israyeli. Bonkhe bantfu labakuyo ababulala ngenkemba futsi kute ngisho namunye umuntfu lowasindza. Ngako ema-Israyeli enta enkhosini yaseLibna njengobe nje bekentile enkhosini yaseJerikho.+
31 Joshuwa akanye nawo onkhe ema-Israyeli babese bayesuka eLibna baya eLakhishi,+ bemisa emathende lapho base balwa nayo.
32 Jehova wanikela iLakhishi esandleni sema-Israyeli futsi ayincoba ngelilanga lesibili. Ayihlasela futsi wonkhe umuntfu lokuyo ambulala ngenkemba+ njengobe bekentile eLibna.
33 Ngemuva kwaloko Horamu inkhosi yaseGezeri+ wakhuphuka kuze ayewusita iLakhishi, kodvwa Joshuwa wambulala kanye nebantfu bakhe, kwangasindzi ngisho namunye.
34 Joshuwa kanye nawo onkhe ema-Israyeli babese bayesuka eLakhishi baya e-Egloni,+ bafike bahlala lapho, balwa nayo.
35 Ngalelolanga bayitsatsa i-Egloni, futsi bayihlasela ngenkemba. Bonkhe bantfu labakuyo babanikela ekubhujisweni ngalo lelolanga, njengobe bebentile eLakhishi.+
36 Joshuwa kanye nawo onkhe ema-Israyeli babese bayesuka e-Egloni baya eHebroni,+ balwa nayo.
37 Bayitsatsa iHebroni futsi bayihlasela ngenkemba, yona nenkhosi yayo, emadolobha ayo kanye nabo bonkhe bantfu, kwaba bete ngisho namunye losindzako. Joshuwa wayinikela ekubhujisweni, yona kanye nabo bonkhe bantfu labakuyo, njengobe bekentile e-Egloni.
38 Ekugcineni Joshuwa nawo onkhe ema-Israyeli bajika baya eDebiri+ futsi balwa nayo.
39 Wayitsatsa iDebiri nenkhosi yayo kanye nawo onkhe emadolobha ayo. Bababulala ngenkemba, banikela wonkhe umuntfu lokuyo ekubhujisweni+ futsi kute ngisho namunye umuntfu lowasindza.+ Loko Joshuwa lakwenta eHebroni kanye naseLibna nasenkhosini yakhona wakwenta eDebiri nasenkhosini yayo.
40 Joshuwa wancoba lonkhe live lelisesifundzeni lesinetintsaba, iNegebhu, iShefela,+ kanye netindzawo letehlelako nawo onkhe emakhosi ato, futsi kute ngisho namunye umuntfu lowasindza. Konkhe lokuphilako wakunikela ekubhujisweni+ njengobe Jehova Nkulunkulu wema-Israyeli bekamtjelile.+
41 Wabancoba kusukela eKhadeshi-bhaneya+ kuya eGaza+ kanye nalo lonkhe live laseGosheni+ kuze kuyewufika eGibeyoni.+
42 Joshuwa wancoba onkhe lamakhosi nemave awo ngesikhatsi sinye, ngobe Jehova Nkulunkulu wema-Israyeli nguye labelwela ema-Israyeli.+
43 Ngemuva kwaloko Joshuwa nawo onkhe ema-Israyeli babuyela endzaweni lebebahlala kuyo eGilgali.+
Imibhalo lengentansi
^ NgesiHebheru kutsi, “Ungavumi sandla sakho sehle etigcilini takho.”
^ Nobe “eTsafeni.”
^ NgesiHebheru kutsi, “lowalola lulwimi lwakhe.”
^ Nobe “etihlahleni.”
