Joshuwa
11:1-23
11 Ngekushesha nje Jabini inkhosi yaseHasori nakeva ngaloko lokwentekile, watfumela livi kuJobabi inkhosi yaseMadoni,+ nasenkhosini yaseShimroni, nasenkhosini yase-Akshafu,+
2 nesemakhosini lebekasesifundzeni sasenyakatfo lesinetintsaba, nesemakhosini lasematsafeni* laseningizimu yeKhinerethi, nakulawo laseShefela kanye nakulawo lasetindzaweni letehlelako taseDori+ letisenshonalanga.
3 Walitfumela kumaKhenani+ lahlala emphumalanga nalawo lahlala enshonalanga, nakuma-Amori,+ nakumaHethi, nakumaPheresi, nakumaJebhusi lahlala esifundzeni lesinetintsaba kanye nakumaHivi+ langephansi kwentsaba iHemoni+ eveni laseMispa.
4 Ngako aphuma anawo onkhe emabutfo awo, abemanyenti kakhulu ngangesihlabatsi lesiselugwini lwelwandle. Aphuma nemahhashi lamanyenti kakhulu kanye netincola temphi.
5 Onkhe lamakhosi avuma kuhlangana ndzawonye, futsi amisa emathende ngasemantini aseMeromu kute alwe nema-Israyeli.
6 Ngako Jehova watsi kuJoshuwa: “Ungawesabi+ ngobe kusasa ngalesikhatsi onkhe ngitawanikela kuma-Israyeli kutsi awabulale. Ubojuba imisipha+ yemahhashi awo futsi ushise netincola tawo ngemlilo.”
7 Joshuwa nawo onkhe emadvodza emphi bahlasela lamakhosi angakagadzi bahamba ngasemantini aseMeromu.
8 Jehova wawanikela esandleni sema-Israyeli,+ futsi awancoba, awagijimisa aze ayofika eSidoni Lenkhulu+ naseMisrefothi-mayimu,+ naseSihosheni saseMispa lesisemphumalanga. Ema-Israyeli awabulala onkhe, kangangekutsi kute ngisho namunye lowasindza.+
9 Joshuwa wabese wenta njengobe nje Jehova abemtjelile, wajuba imisipha yemahhashi awo futsi washisa netincola tawo ngemlilo.+
10 Ngetulu kwaloko, Joshuwa wabese uyajika futsi wavimbetela iHasori, wabulala inkhosi yakhona ngenkemba,+ ngobe iHasori beyike yaba lidolobha lelidvumile kuyo yonkhe lemibuso.
11 Bababulala ngenkemba bonkhe bantfu lebakulelidolobha, babanikela ekubhujisweni.+ Kute ngisho nakunye lokuphilako labakushiya.+ Joshuwa wabese ushisa iHasori ngemlilo.
12 Joshuwa wawavimbetela onkhe lamadolobha alamakhosi, wancoba onkhe emakhosi awo ngenkemba.+ Wawanikela ekubhujisweni+ njengobe nje Mosi inceku yaJehova abemtjelile.
13 Kodvwa ema-Israyeli akazange ashise ngisho nalinye kulamadolobha labekakhiwe etindzaleni ngaphandle kweHasori. Ngiyo kuphela Joshuwa layishisa.
14 Ema-Israyeli atitsatsela tonkhe tintfo lebetikulelidolobha kanye nemfuyo.+ Kodvwa abulala wonkhe muntfu ngenkemba kwaze kwaba ngulapho sebafe bonkhe.+ Awazange ashiye ngisho munye lophilako.+
15 Njengobe Jehova abetjele Mosi inceku yakhe, naMosi watjela Joshuwa+ futsi Joshuwa wakwenta loko. Kute ngisho nakunye kuko konkhe Jehova labekushito kuMosi,+ Joshuwa langazange akwente.
16 Joshuwa walincoba lonkhe lelive, lokufaka ekhatsi sifundza lesinetintsaba, yonkhe iNegebhu,+ lonkhe live laseGosheni, iShefela,+ i-Arabha,+ sifundza lesinetintsaba saka-Israyeli, kanye nangephansi kwaso,
17 kusuka eNtsabeni iHalaki lekhuphuka ize iyofika eSeyiri kuchubeke kuyofika naseBhali-gadi+ eSihosheni saseLebanoni lesiphansi kweNtsaba iHemoni.+ Wawatfumba onkhe emakhosi akhona, wawancoba futsi wawabulala.
18 Kwaphela sikhatsi lesidze solo Joshuwa alwa nawo onkhe lamakhosi.
19 Kute lelinye lidolobha lelakha kuthula nema-Israyeli, ngaphandle kwemaHivi labehlala eGibeyoni.+ Ema-Israyeli ancoba onkhe lalamanye emphini.+
20 NguJehova lowavumela tinhlitiyo tebantfu bakhona taba lukhuni+ baze balwa nema-Israyeli, kuze yena abanikele ekubhujisweni ngaphandle kwekubavela.+ Bekufanele bacotfulwe, njengobe nje Jehova abetjele Mosi.+
21 Ngaleso sikhatsi Joshuwa wacotfula ema-Anaki+ esifundzeni lesinetintsaba, eHebroni, eDebiri, e-Anabu, kuso sonkhe sifundza lesinetintsaba sakaJuda nakuso sonkhe sifundza lesinetintsaba saka-Israyeli. Joshuwa wawanikela ekubhujisweni,+ wona kanye nemadolobha awo.
22 Kute ema-Anaki lasala+ eveni laka-Israyeli. Asala kuphela eGaza,+ eGathi+ nase-Ashdodi.+
23 Ngako Joshuwa walitsatsa lonkhe lelive njengobe Jehova abetsembise Mosi,+ wabese ulinika ema-Israyeli laba lifa lawo, kuze letive tehlukaniselane lona kuye ngetabelo tato.+ Lelive laphumula ekulweni timphi.+
Imibhalo lengentansi
^ Nobe “i-Arabha.”