Joshuwa
13:1-33
13 Joshuwa abesakhulile, sekusedvute nekutsi afe.+ Ngako Jehova watsi kuye: “Sewukhulile ngeminyaka, futsi sekusedvute kutsi ufe, kodvwa kusenencenye lenkhulu yelive lokusafanele itsatfwe.*
2 Ngulena indzawo lesengakatsatfwa:+ tonkhe tifundza temaFilisti kanye nato tonkhe tifundza temaGeshuri+
3 (kusukela lapho uMfula iNayili uphambuka khona* emphumalanga* yeGibhithe kuze kuyewufika emnceleni wase-Ekroni losenyakatfo, lebeyatiwa njengendzawo yemaKhenani)+ lokufaka ekhatsi indzawo yebabusi labasihlanu bemaFilisti,+ lokungemaGaza, ema-Ashdodi,+ ema-Ashkeloni,+ emaGathi,+ nema-Ekroni;+ nendzawo yema-Avi+
4 leseningizimu; yonkhe indzawo yemaKhenani; iMeyara lokuyindzawo yemaSidoni+ kuze kuyewufika e-Afeki, emnceleni wendzawo yema-Amori;
5 indzawo yemaGebali+ kanye nayo yonkhe iLebanoni nawuya emphumalanga, kusukela eBhali-gadi ngephansi kweNtsaba iHemoni kuze kuyewufika eLebo-hamathi.*+
6 Kufanele kutsatfwe nendzawo yabo bonkhe bantfu labahlala esifundzeni lesinetintsaba kusukela eLebanoni+ kuya eMisrefothi-mayimu;+ nendzawo yabo bonkhe bantfu baseSidoni.+ Ngitabacosha* embikwesive sema-Israyeli.+ Wena kufanele nje wabele ema-Israyeli lendzawo ibe lifa lawo, njengobe nje nganiyala.+
7 Kufanele wabe lelive libe lifa letive letingu-9 kanye nencenye yesive sakaManase.”+
8 Sive sakaRubeni, sive sakaGadi nalelenye incenye yesive sakaManase batsatsa lifa labo labaliniketwa nguMosi emphumalanga yeJordane, njengobe Mosi inceku yaJehova bekabanikile.+
9 Indzawo yabo beyisuka e-Aroyeri,+ leseceleni kweSihosha sase-Anoni,+ nasedolobheni lelisemkhatsini walesihosha, nakuyo yonkhe indzawo lephakeme* yaseMedeba kuze kuyofika eDiboni;
10 kanye nawo onkhe emadolobha aSihoni inkhosi yema-Amori, lobekabusa eHeshboni kuze kuyewufika emnceleni wema-Amoni;+
11 neGileyadi kanye nendzawo yemaGeshuri nemaMakhathi,+ nayo yonkhe iNtsaba iHemoni nayo yonkhe iBhashani+ kuze kuyewufika eSalekha;+
12 nayo yonkhe indzawo yebukhosi ba-Ogi eBhashani, lobekabusa e-Ashtarothe nase-Edreyi. (Ogi bekangulomunye wemaRefa ekugcina.)+ Mosi wawancoba wase uyawacosha.*+
13 Kodvwa ema-Israyeli akazange awacoshe*+ emaGeshuri nemaMakhathi, ngobe kuze kube ngulamuhla sive semaGeshuri nesemaMakhathi sisahlala nema-Israyeli.
14 Sive semaLevi ngiso kuphela Mosi langasiniketanga lifa.+ Iminikelo lebeyentiwa ngemlilo kuJehova Nkulunkulu wema-Israyeli ilifa lawo,+ njengobe nje abewetsembisile.+
15 Ngemuva kwaloko Mosi waniketa sive sakaRubeni lifa laso ngemindeni yaso.
16 Indzawo yaso beyisuka e-Aroyeri, leseceleni kweSihosha sase-Anoni, nasedolobheni lelisemkhatsini walesihosha kanye nakuyo yonkhe indzawo lephakeme lengaseMedeba;
17 iHeshboni nawo onkhe emadolobha ayo+ lasendzaweni lephakeme, iDiboni, iBhamothi-bhali, iBhethi-bhali-meyoni,+
18 iJahasi,+ iKhedemothi,+ iMefathi,+
19 iKhiriyathayimu, iSibima,+ kanye neSerethi-shahari lesentsabeni leseceleni kwesihosha,*
20 iBhethi-pheyori, tindzawo letewukelako tasePhisga,+ iBhethi-jeshimothi,+
21 nawo onkhe emadolobha lasendzaweni lephakeme, kanye nayo yonkhe indzawo yebukhosi baSihoni inkhosi yema-Amori, lobekabusa eHeshboni.+ Mosi wamncoba+ kanye netikhulu tesive sakaMidiyani, bo-Evi, Rekhemu, Suri, Hure naReba,+ lebebabuswa* nguSihoni futsi bahlala kulelo live.
22 Bhalamu+ lobekayindvodzana yaBheyori futsi aphengula,+ bekangulomunye walabo lababulawa ngema-Israyeli ngenkemba.
23 Umncele wesive sakaRubeni bekuyiJordane, futsi lendzawo kanye nemadolobha nemadolobhana awo beyilifa lesive sakaRubeni ngemindeni yaso.
24 Ngetulu kwaloko Mosi waniketa sive sakaGadi lifa laso, wasiniketa ngemindeni yaso.
25 Indzawo yalesive beyifaka ekhatsi iJazeri+ nawo onkhe emadolobha aseGileyadi nencenye yelive lema-Amoni+ kuze kuyewufika e-Aroyeri, lebukene neRabha;+
26 kanye nendzawo lesukela eHeshboni+ kuye eRamathi-mispa naseBhetonimu, nalesukela eMahanayimu+ kuyofika emnceleni waseDebiri;
27 esihosheni* bekuyiBhethi-haramu,+ iBhethi-nimra, iSukhothi,+ kanye neSafoni, lebekuyindzawo lesele yaSihoni inkhosi yaseHeshboni,+ futsi iJordane yaba ngumncele kusuka endzaweni lephansi yeLwandle LwaseKhinerethi*+ lesemphumalanga yeJordane.
28 Lendzawo kanye nemadolobha nemadolobhana awo beyilifa lesive sakaGadi ngemindeni yaso.
29 Ngetulu kwaloko, Mosi waniketa incenye yesive sakaManase lifa ngemindeni yaso.+
30 Indzawo yaso beyisuka eMahanayimu+ itsatse yonkhe indzawo yaseBhashani, yonkhe indzawo ya-Ogi inkhosi yaseBhashani, kanye nawo onkhe emadolobha lamancane aseJayire+ eBhashani. Lamadolobha abengu-60.
31 Incenye yendzawo yaseGileyadi, i-Ashtarothe ne-Edreyi,+ lokungemadolobha endzawo ya-Ogi inkhosi yaseBhashani, yanikwa incenye yemadvodzana aMakhire+ loyindvodzana yaManase, ngemindeni yawo.
32 Leli lifa Mosi labaniketa lona ehlane lakaMowabi ngesheya kweJordane, emphumalanga yeJerikho.+
33 Kodvwa Mosi akazange asinikete lifa sive semaLevi.+ Jehova Nkulunkulu wema-Israyeli ulifa laso, njengobe nje bekawetsembisile.+
Imibhalo lengentansi
^ Nobe “incotjwe.”
^ NgesiHebheru kutsi, “embikweGibhithe.”
^ Nobe “kusuka eShihori.”
^ Nobe “esangweni laseHamathi.”
^ Nobe “Ngitawutsatsa indzawo yabo.”
^ Nobe “indzawo lebekile.”
^ Nobe “utsatsa indzawo yawo.”
^ Nobe “atsatse indzawo.”
^ Nobe “kwelitsafa.”
^ Lokusho, emakhosi labekabuswa nguSihoni.
^ Lokusho, lichibi laseGenesaretha, nobe Lwandle LwaseGalile.
^ Nobe “etsafeni.”
