Joshuwa
17:1-18
17 Ngemuva kwaloko, inkatho+ yaya esiveni sakaManase+ ngobe abelitibulo laJosefa.+ Ngenca yekutsi Makhire,+ litibulo laManase, longubabe waGileyadi abeyindvodza yemphi, lifa lakhe kwaba yiGileyadi neBhashani.+
2 Inkatho yabese iya kulabanye bebantfwana baManase ngemindeni yabo, lokufaka ekhatsi emadvodzana a-Abiyezeri,+ emadvodzana aHelekhi, emadvodzana a-Asriyeli, emadvodzana a-Shekhemu, emadvodzana aHeferi nemadvodzana aShemida. Laba bekungulabadvuna kubantfwana baManase indvodzana yaJosefa, ngemindeni yabo.+
3 Kodvwa Selofehadi+ indvodzana yaHeferi, indvodzana yaGileyadi, indvodzana yaMakhire, indvodzana yaManase, bekete emadvodzana. Bekanemadvodzakati kuphela futsi emabito awo bekuboMahala, Nowa, Hogila, Milkha naThisa.
4 Ngako lamadvodzakati aya ku-Eliyezeri+ umphristi, kuJoshuwa indvodzana yaNuni nakubaholi efike atsi: “NguJehova lowatjela Mosi kutsi asinike lifa emkhatsini webanaketfu.”+ Abese anikwa lifa emkhatsini webanakabobabe wawo njengobe Jehova abeshito.+
5 Manase watfola letinye tindzawo letingu-10 ngaphandle kweGileyadi neBhashani lebekungale* kweJordane,+
6 ngobe emadvodzakati aManase atfola lifa kanye nemadvodzana akhe, futsi indzawo yakaGileyadi yaba yalalabanye bantfwana baManase.
7 Umncele waManase bewusuka e-Asheri uya eMikmethathi,+ lebukene neShekhemu,+ futsi uchubeke uye eningizimu* endzaweni lapho bekuhlala khona bantfu base-Eni-Thaphuwa.
8 Indzawo yaseThaphuwa+ yaba yaManase, kodvwa iThaphuwa lebeyisemnceleni waManase beyiyebantfwana ba-Efrayimu.
9 Lomncele bewehlela eSigodzini saseKhana, uye eningizimu yalesigodzi. Bekunemadolobha a-Efrayimu emkhatsini wemadolobha aManase,+ futsi umncele waManase bewusenyakatfo yalesigodzi, uphelela elwandle.+
10 Indzawo leseningizimu beyiya-Efrayimu kantsi lesenyakatfo beyiyaManase, lwandle lona belungumncele waManase,+ futsi enyakatfo umncele wakhe* bewufika endzaweni yaka-Asheri kantsi emphumalanga bewufika endzaweni yaka-Isakhari.
11 Endzaweni yaka-Isakhari neyaka-Asheri, Manase wanikwa iBhethi-sheyani nemadolobha lebekaseceleni* kwayo, iJibleyamu+ nemadolobha lebekaseceleni kwayo, iDori+ nebantfu bakhona kanye nemadolobha lebekaseceleni kwayo, i-Eni-dori+ nebantfu bakhona kanye nemadolobha lebekaseceleni kwayo, iThanaki+ nebantfu bakhona kanye nemadolobha lebekaseceleni kwayo, iMegido nebantfu bakhona kanye nemadolobha lebekaseceleni kwayo, lokutifundza letiphakeme letintsatfu.
12 Kodvwa bantfwana baManase abazange bakhone kutsatsa lamadolobha; emaKhenani achubeka ahlala ngenkhani kulendzawo.+
13 Kwatsi ema-Israyeli nase anemandla, acindzetela emaKhenani kutsi abe tigcili tawo,+ kodvwa awazange awacoshe* ngalokuphelele.+
14 Bantfwana baJosefa batsi kuJoshuwa: “Usiniketeleni* sabelo sinye ngenkatho+ waphindze wasisikela nendzawo yinye kutsi ibe lifa letfu? Tsine sesisive lesikhulu ngobe Jehova usibusisile kuze kube ngunyalo.”+
15 Joshuwa watsi kubo: “Nangabe nisive lesikhulu kangako, khuphukelani kulelihlatsi lelisendzaweni yemaPheresi+ neyemaRefa+ nitilungisele lona, njengobe sifundza lesinetintsaba saka-Efrayimu+ sisincane kakhulu kini.”
16 Bantfwana baJosefa base batsi: “Sifundza lesinetintsaba sincane kitsi, futsi onkhe emaKhenani lahlala esihosheni* anetincola temphi+ letinemasikela ensimbi,* lokufaka ekhatsi lawo lahlala eBhethi-sheyani+ nasemadolobheni laseceleni* kwayo nalawo lahlala eSihosheni* saseJezreyeli.”+
17 Ngako Joshuwa watsi endlini yaJosefa, lokungu-Efrayimu naManase: “Nine nisive lesikhulu, futsi ninemandla lamakhulu. Ngeke nitfole indzawo yinye kuphela,+
18 kodvwa nitawutfola nesifundza setintsaba.+ Nanobe silihlatsi, nitasilungisa futsi indzawo yenu itawugcina lapho, ngobe nitawacosha emaKhenani ngisho nobe anemandla futsi anetincola temphi letinemasikela ensimbi.”*+
Imibhalo lengentansi
^ Lokusho, emphumalanga.
^ NgesiHebheru kutsi, “ngesekudla.”
^ Lokusho, bantfu bakaManase nobe indzawo yakaManase.
^ Nobe “lebekakhelene.”
^ Nobe “atsatse indzawo yawo.”
^ NgesiHebheru kutsi, “Unginiketeleni.”
^ Nobe “etsafeni.”
^ NgesiHebheru kutsi, “tincola tensimbi.”
^ Nobe “lakhelene nayo.”
^ Nobe “eTsafeni.”
^ NgesiHebheru kutsi, “anetincola tensimbi.”