Joshuwa
2:1-24
2 Ngemuva kwaloko, Joshuwa indvodzana yaNuni watfumela tinhloli letimbili ngasense tesuka eShithimu.+ Watsi kuto: “Hambani niyewuhlola lelive, ikakhulukati iJerikho.” Ngako tahamba tefika endlini yengwadla lokutsiwa nguRahabi+ futsi tahlala khona.
2 Inkhosi yaseJerikho yatfunyelelwa umbiko lotsi: “Lamuhla entsambama kufike emadvodza langema-Israyeli atewuhlola lelive.”
3 Ngako inkhosi yaseJerikho yatfumela livi kuRahabi yatsi: “Khipha lamadvodza lafike angena endlini yakho, ngobe etele kutewuhlola lonkhe lelive.”
4 Kodvwa Rahabi wawafihla lamadvodza lamabili. Wase utsi: “Vele akhona emadvodza lefikile kimi, kodvwa bengingati kutsi abuya kuphi.
5 Nasekuhwalele, ngesikhatsi emagede elidolobha sekatawuvalwa, lamadvodza abese ayahamba. Angati kutsi aye kuphi, kodvwa naningaphangisa niwalandzele nitawakhandza.”
6 (Kepha abewayise eluphahleni lwendlu futsi wawafihla emkhatsini wetinhlanga teflekisi lebetendlalwe eluphahleni.)
7 Ngako lamadvodza labetfunywe yinkhosi alandzela letinhloli ngendlela yematubuko laya eJordane,+ futsi emagede elidolobha avalwa ngemuva kwekutsi sekaphumile.
8 Ngaphambi kwekutsi lamadvodza latinhloli alale, Rahabi waya kuwo letulu eluphahleni.
9 Watsi kuwo: “Ngiyati kutsi Jehova utaninika lelive.+ Sifikelwe kwesaba ngenca yenu,+ futsi bonkhe bantfu bakulelive betfukile,+
10 ngobe seva kutsi Jehova wawomisa njani emanti eLwandle Lolubovu embikwenu ngesikhatsi niphuma eGibhithe.+ Sakuva naloko lenakwenta emakhosini lamabili ema-Amori, boSihoni+ na-Ogi+ lenababhubhisa ngale* kweJordane.
11 Satsi nasiva ngaloko sefikelwa kwesaba* futsi kute lonesibindzi* sekumelana nani, ngobe Jehova Nkulunkulu wenu unguNkulunkulu etulu ezulwini naphansi emhlabeni.+
12 Nyalo, ngiyanicela kutsi nifunge kimi ngaJehova kutsi njengobe nginentele umusa,* nani nitayentela umusa indlu yababe, futsi ninginikete neluphawu lengingalwetsemba.
13 Nibosindzisa babe namake, bomnaketfu nabodzadzewetfu kanye nabo bonkhe bendlu yakabo, futsi kufanele nisisindzise ekufeni.”+
14 Lamadvodza atsi kuye: “Kungamane kufe tsine esikhundleni senu! Sitakwentela umusa, futsi setsembeke kuwe lapho Jehova sekasinika lelive, nangabe ungeke utjele muntfu ngaloko lesikutele.”
15 Ngemuva kwaloko wawakhipha ngelifasitelo asebentisa intsambo, ngobe indlu yakhe beyingaselubondzeni lwalelidolobha. Ecinisweni, bekahlala etulu kulolubondza.+
16 Wase utsi kuwo: “Hambani niye esifundzeni lesinetintsaba futsi nibhace lapho emalanga lamatsatfu, kuze kutsi laba labanifunako banganitfoli. Kutawutsi nasebabuyile, bese niyachubeka neluhambo lwenu.”
17 Lamadvodza atsi kuye: “Sitawubopheka kulesifungo losifungise+ sona
18 kuphela nangabe sitawutsi nasita kulelive sikukhandze ubophe lentsambo lebovu kulelifasitelo losikhiphe ngalo. Kufanele uletse babe wakho, make wakho, bomnakenu nawo wonkhe umndeni wababe wakho kulendlu yakho.+
19 Nangabe ukhona lotawuphumela ngephandle kwemnyango wendlu yakho, ingati yakhe itawuba setikwakhe, futsi sitawuba bete licala. Nakwenteka kube khona lotawulimala* akanye nawe kulendlu, ingati yakhe itawuba setikwetfu.
20 Kodvwa nawutawukhuluma ngaloko lesikutele lana,+ sitawukhululeka kulesifungo losifungise sona.”
21 Wawaphendvula watsi: “Akube njengobe nikhulumile.”
Wabese uyawakhulula ahamba. Ngemuva kwaloko wabopha lentsambo lebovu kulelifasitelo.
22 Lamadvodza ahamba aya esifundzeni lesinetintsaba futsi ahlala lapho emalanga lamatsatfu baze babuya laba labebawafuna. Bawafuna kuyo yonkhe imigwaco kodvwa abazange bawatfole.
23 Lamadvodza lamabili ehla kulesifundza setintsaba, ewela umfula futsi aya kuJoshuwa indvodzana yaNuni. Afike amtjela konkhe lobekwenteke kuwo.
24 Ase atsi kuJoshuwa: “Jehova usinike lonkhe lelive.+ Ecinisweni, bonkhe bantfu bakulelive baphelelwe ngemandla ngenca yetfu.”+
Imibhalo lengentansi
^ Lokusho, emphumalanga.
^ NgesiHebheru kutsi, “kute umuntfu lowaphindze waba nemandla.”
^ NgesiHebheru kutsi, “tinhlitiyo tetfu tancibilika.”
^ Nobe “lutsandvo lolucotfo.”
^ Nobe “lotawubekwa sandla.”
