Joshuwa
22:1-34
22 Joshuwa wabese ubita sive sakaRubeni, sakaGadi kanye nencenye yesive sakaManase
2 watsi: “Senikwente konkhe Mosi inceku yaJehova lanitjela kona,+ nalilalela nelivi lami kuko konkhe lenganitjela kona.+
3 Anikaze nibashiye bomnakenu sonkhe lesikhatsi kuze kube ngulamuhla+ futsi niwugcinile umyalo waJehova Nkulunkulu wenu.+
4 Jehova Nkulunkulu wenu unikete bomnakenu kuphumula, njengobe abetsembisa.+ Nyalo seningahamba nibuyele emathendeni enu eveni Mosi inceku yaJehova laninika lona ngale* kweJordane.+
5 Kuphela nje nibociniseka kutsi niyawugcina umyalo kanye neMtsetfo Mosi inceku yaJehova laninika wona,+ ngekutsi nitsandze Jehova Nkulunkulu wenu,+ nihambe kuto tonkhe tindlela takhe,+ nilalele imitsetfo yakhe,+ ninamatsele kuye+ niphindze nimkhonte+ ngayo yonkhe inhlitiyo yenu nangawo wonkhe umphefumulo* wenu.”+
6 Ngemuva kwaloko, Joshuwa wababusisa futsi wabakhulula, base bayahamba baya emathendeni abo.
7 Mosi bekanike incenye yesive sakaManase lifa eBhashani,+ futsi Joshuwa waniketa lelenye incenye yalesive indzawo lesenshonalanga yeJordane+ kanye nabomnakabo. Ngetulu kwaloko, ngesikhatsi Joshuwa abakhulula kutsi bahambe baye emathendeni abo, wababusisa
8 watsi kubo: “Buyelani emathendeni enu nemcebo lomnyenti, imfuyo lenyenti, lisiliva neligolide, litfusi nensimbi kanye netingubo letinyenti kakhulu.+ Tsatsani tintfo lenititfole etitseni tenu+ nehlukaniselane tona nabomnakenu.”
9 Sive sakaRubeni, sakaGadi kanye nencenye yesive sakaManase tabese tiyawashiya lalamanye ema-Israyeli. Tesuka eShilo eveni laseKhenani tabuyela eveni lakaGileyadi,+ lebelilifa letanikwa lona futsi lebetihlala kulo njengobe Jehova bekashito ngaMosi.+
10 Ngesikhatsi sive sakaRubeni nesakaGadi kanye nencenye yesive sakaManase tifika etifundzeni taseJordane eveni laseKhenani, takha li-al’thare lelikhulu kakhulu ngaseJordane.
11 Ngemuva kwesikhatsi lalamanye ema-Israyeli eva+ kutsiwa: “Asenibuke! Sive sakaRubeni, sakaGadi nencenye yesive sakaManase setakhe li-al’thare emnceleni welive laseKhenani etifundzeni taseJordane letisendzaweni yema-Israyeli.”
12 Ngesikhatsi ema-Israyeli eva ngaloku, sonkhe lesive sahlangana eShilo+ kuze siyokulwa nato.
13 Ema-Israyeli abese atfumela Finehasi+ indvodzana ya-Eliyezeri umphristi esiveni sakaRubeni, sakaGadi nasencenyeni yesive sakaManase eveni lakaGileyadi,
14 futsi bekahamba nebaholi labangu-10, kungumholi munye wendlu ngayinye kuto tonkhe tive tema-Israyeli, ngamunye wabo ayinhloko yendlu yakubo emkhatsini wetinkhulungwane* tema-Israyeli.+
15 Nabefika esiveni sakaRubeni, sakaGadi nasencenyeni yesive sakaManase eveni lakaGileyadi batsi kuto:
16 “Naku lokushiwo ngiso sonkhe sive saJehova: ‘Yini lokungetsembeki+ lenikwentile kuNkulunkulu wema-Israyeli? Lamuhla niyekelile kulandzela Jehova, natakhela li-al’thare futsi navukela Jehova.+
17 Belingakeneli yini leliphutsa lesalenta ePheyori? Solo asikatihlambululi kulo kuze kube ngulamuhla, ngisho nome sonkhe sive saJehova sehlelwa yinhlekelele.+
18 Lamuhla senifuna kuyekela kulandzela Jehova? Nangabe nivukela Jehova lamuhla, kusasa utawutfukutselela sonkhe sive sema-Israyeli.+
19 Nangabe live lelilifa lenu lingakahlanteki, welelani eveni lelilifa laJehova+ lapho kunelithende lekukhontela laJehova+ khona futsi nihlale natsi, kodvwa ningamvukeli Jehova futsi ningabangeli kutsi natsi sivukele ngekutsi nitakhele lelinye li-al’thare ngaphandle kweli-al’thare laJehova Nkulunkulu wetfu.+
20 Ngesikhatsi Akhani+ indvodzana yaZera enta sento sekungetsembeki mayelana nentfo lobekufanele ibhujiswe, intfukutselo yaNkulunkulu ayizange yini yehlele sonkhe sive sema-Israyeli?+ Akufanga yena kuphela ngesono lasenta.’”+
21 Ngako sive sakaRubeni, sakaGadi kanye nencenye yesive sakaManase taphendvula tinhloko tetinkhulungwane* tema-Israyeli+ tatsi:
22 “Nkulunkulu lophakeme kunabo bonkhe bonkulunkulu, Jehova!* Nkulunkulu lophakeme kunabo bonkhe bonkulunkulu, Jehova!+ Yena uyati futsi nema-Israyeli atawati. Nangabe besivukela futsi singaketsembeki kuJehova, akangasisindzisi lamuhla.
23 Nangabe leli-al’thare silakhe kuze siyekele kulandzela Jehova, salakhela nekwenta iminikelo yekushiswa, yalokutinhlavu kanye nemihlatjelo yekuthula kulo, Jehova utasijezisa.+
24 Asikalakheli loko, kodvwa silakhe ngobe sikhatsatekile, futsi sicabange satsi: ‘Esikhatsini lesitako emadvodzana enu atawutsi emadvodzaneni etfu: “Nihlangana ngani naJehova Nkulunkulu wema-Israyeli?
25 Jehova ubeke iJordane yaba ngumncele emkhatsini wetfu nani, nine bakaRubeni kanye nebakaGadi. Nite sabelo kuJehova.” Ngaleyo ndlela emadvodzana enu atawuvimbela emadvodzana etfu kutsi akhonte* Jehova.’
26 “Ngako sitsite: ‘Asente konkhe lokusemandleni etfu kuze sakhe li-al’thare, hhayi lekwenta iminikelo yekushiswa nome imihlatjelo,
27 kodvwa lelitawuba bufakazi emkhatsini wenu natsi+ kanye nebantfwana betfu labatakuta emvakwetfu bekutsi umsebenti lesiwentela Jehova sitawenta embikwakhe ngeminikelo yekushiswa nangemihlatjelo yekuthula nangaleminye imihlatjelo,+ kuze esikhatsini lesitako emadvodzana enu angasho emadvodzaneni etfu atsi: “Nite sabelo kuJehova.”’
28 Sibese sitsi: ‘Nakwenteka asho loko kitsi nakubantfwana betfu esikhatsini lesitako, sitawuphendvula sitsi: “Bukani nangu umfanekiso weli-al’thare laJehova bokhokho betfu labalakha, longazange wakhelwe iminikelo nome imihlatjelo, kodvwa lowakhelwa kutsi ube bufakazi emkhatsini wetfu nani.”’
29 Asikucabangi ngisho nakancane kuvukela Jehova nekuyekela kulandzela Jehova lamuhla+ ngekutsi sakhe li-al’thare leminikelo yekushiswa, yalokutinhlavu, naleminye imihlatjelo, ngaphandle kweli-al’thare laJehova Nkulunkulu wetfu lelisembikwelithende lakhe lekukhontela!”+
30 Ngesikhatsi Finehasi umphristi, baholi besive kanye netinhloko tetinkhulungwane* tema-Israyeli lebebanaye beva lamavi lashiwo bantfwana baRubeni, baGadi nebaManase benetiseka.+
31 Ngako Finehasi indvodzana ya-Eliyezeri umphristi watsi kubantfwana baRubeni, baGadi nebaManase: “Lamuhla sesiyati kutsi Jehova unatsi ngobe anikasenti sento sekungetsembeki kuJehova. Nyalo seniwasindzisile ema-Israyeli esandleni saJehova.”
32 Ngemuva kwaloko Finehasi indvodzana ya-Eliyezeri umphristi kanye nebaholi besuka esiveni sakaRubeni nasesiveni sakaGadi kaGileyadi babuyela eveni laseKhenani futsi babuyisa umbiko kulalamanye ema-Israyeli.
33 Ema-Israyeli enetiseka ngalombiko. Abese advumisa Nkulunkulu futsi awazange asakhuluma ngekuyokulwa nesive sakaRubeni kanye nesakaGadi kuze ayobhubhisa live lebebahlala kulo.
34 Ngako sive sakaRubeni nesakaGadi setsa leli-al’thare libito,* ngobe “lingufakazi emkhatsini wetfu kutsi Jehova nguNkulunkulu weliciniso.”
Imibhalo lengentansi
^ Lokusho, emphumalanga.
^ Fundza Tinchazelo Temagama.
^ Nobe “wetive.”
^ Nobe “tetive.”
^ Nobe “Nkulunkulu Losezulwini, Jehova.”
^ NgesiHebheru kutsi, “esabe.”
^ Nobe “tetive.”
^ Kulenchazelo leniketiwe, kungenteka leli-al’thare letsiwa ngekutsi nguFakazi.
