Joshuwa
3:1-17
-
Ema-Israyeli ewela iJordane (1-17)
3 Ngemuva kwaloko Joshuwa wavuka ekuseni kakhulu, futsi yena nawo onkhe ema-Israyeli* besuka eShithimu+ baya eJordane. Bacitsa busuku bonkhe lapho ngaphambi kwekutsi bewele.
2 Ngemuva kwemalanga lamatsatfu, tindvuna+ tadzabula kuyo yonkhe indzawo lokuhlalwa kuyo
3 futsi tatsi kubantfu: “Ngekushesha nanibona libhokisi lesivumelwane saJehova Nkulunkulu wenu litfwelwe baphristi labangemaLevi,+ kufanele nisuke kulendzawo lenikuyo nililandzele.
4 Kodvwa kufanele nikhweshe kulo ngemamitha langaba ngu-890.* Ningacali nisondzele kulo kuze nitoyibona indlela lokufanele nihambe ngayo ngobe anikaze nihambe ngalendlela.”
5 Joshuwa wabese utsi kulabantfu: “Tingcweliseni+ ngobe kusasa Jehova utanentela tintfo letimangalisako.”+
6 Ngemuva kwaloko, Joshuwa watsi kubaphristi: “Tsatsani libhokisi+ lesivumelwane futsi nihambe embikwalabantfu.” Ngako labaphristi batsatsa lelibhokisi lesivumelwane futsi bahamba embikwalabantfu.
7 Jehova wabese utsi kuJoshuwa: “Lamuhla ngitakuphakamisa emehlweni awo onkhe ema-Israyeli+ kuze ati kutsi ngitawuba nawe+ njengobe ngaba naMosi.+
8 Ubotjela baphristi labetfwele libhokisi lesivumelwane utsi: ‘Nanifika elusentseni lwemfula iJordane,+ kufanele nime khona lapho.’”
9 Joshuwa wase utsi kuma-Israyeli: “Wotani lapha nitewulalela emavi aJehova Nkulunkulu wenu.”
10 Ngemuva kwaloko watsi: “Nitawati ngaloku kutsi Nkulunkulu lophilako unani+ nekutsi nakanjani ngeke ehluleke kucosha embikwenu sive semaKhenani, semaHethi, semaHivi, semaPheresi, semaGirigashi, sema-Amori kanye nesemaJebhusi.+
11 Libhokisi lesivumelwane seNkhosi yemhlaba wonkhe lihamba embikwenu liya eJordane.
12 Nyalo khetsani emadvodza langu-12 etiveni tonkhe taka-Israyeli, indvodza yinye esiveni ngasinye,+
13 futsi ngekushesha nje lapho tinyawo tebaphristi labatfwele Libhokisi laJehova, loyiNkhosi yemhlaba wonkhe, titsintsa* emanti emfula iJordane, emanti lachamuka ngenhla nemfula atawuma njengelidamu.”*+
14 Ngesikhatsi bantfu besuka emathendeni abo ngaphambi nje kwekutsi bewele umfula iJordane, baphristi labebatfwele libhokisi+ lesivumelwane bahamba embikwabo.
15 Ngekushesha ngesikhatsi baphristi labetfwele Libhokisi befika emfuleni iJordane futsi bafaka tinyawo tabo emantini laselusentseni+ lwalomfula (umfula iJordane bewugcwala ugole tintsetse nakusikhatsi sekuvuna),
16 emanti labekachamuka ngenhla ema. Lamanti akhula aba njengelidamu* khashane kakhulu e-Adamu, lokulidolobha lelisedvute neSarethani, kantsi emanti labegeletela eLwandle Lwase-Arabha, lokuLwandle Lweluswayi* ancipha, futsi ema. Ngako bantfu babese bewelela ngesheya kweJerikho.
17 Ngesikhatsi baphristi labetfwele libhokisi lesivumelwane saJehova basemile emhlabatsini lowomile+ ekhatsi nekhatsi nemfula iJordane, onkhe ema-Israyeli ewela emhlabatsini lowomile+ kwaze kwaba ngulapho sonkhe sive sesiwewelile lomfula.
Imibhalo lengentansi
^ NgesiHebheru kutsi, “emadvodzana aka-Israyeli.”
^ NgesiHebheru kutsi, “emakhyubhitha langaba ngu-2 000.” Fundza Sandzisanchazo B14.
^ NgesiHebheru kutsi, “tihlala emantini.”
^ Nobe “njengelubondza.”
^ Nobe “njengelubondza.”
^ Lokusho, Lwandle Lolufile.
