Joshuwa
5:1-15
5 Ngekushesha nje lapho onkhe emakhosi ema-Amori+ labehlala ngasenshonalanga* yeJordane, nawo onkhe emakhosi emaKhenani+ labehlala ngaselwandle eva kutsi Jehova womise emanti emfula iJordane embikwema-Israyeli kwaze kwaba ngulapho sekewele onkhe, esaba*+ futsi aphelelwa nasibindzi* ngenca yema-Israyeli.+
2 Ngaleso sikhatsi, Jehova watsi kuJoshuwa: “Tibatele imikhwa yematje futsi usoke+ bantfu labadvuna baka-Israyeli kwesibili.”
3 Ngako Joshuwa wabata imikhwa yematje wase usoka bantfu labadvuna baka-Israyeli eGibeyathi-haralothi.*+
4 Nasi sizatfu lesenta Joshuwa wabasoka: Bonkhe bantfu labadvuna lebebaphume eGibhithe, lokungiwo onkhe emadvodza emphi,* bafa ehlane ngesikhatsi basendleleni ngemuva kwekuphuma eGibhithe.+
5 Bonkhe bantfu labaphuma eGibhithe bebasokile, kodvwa bonkhe bantfu labatalwa ehlane ngesikhatsi ema-Israyeli asendleleni lephuma eGibhithe bebangakasoki.
6 Ema-Israyeli abehambe iminyaka lengu-40+ ehlane kwaze kwaba ngulapho onkhe lamadvodza emphi laphuma eGibhithe futsi langazange alalele livi laJehova+ sekafile. Jehova wafunga kuwo kutsi angeke awavumele abone lelive+ Jehova lafunga kubokhokho bawo kutsi utalinika bantfu bakhe,*+ lokulive leligeleta lubisi neluju.+
7 Ngako wenta kutsi emadvodzana abo angene esikhundleni sabo,+ futsi Joshuwa wawasoka, ngobe bebangazange bawasoke nabasesendleleni.
8 Nasebacedzile kusoka sonkhe lesive, bachubeka bahleti kuleyo ndzawo kwaze kwaba ngulapho sebapholile.
9 Jehova wase utsi kuJoshuwa: “Lamuhla ngilisusile* kini lihlazo laseGibhithe.” Ngako kuze kube ngulamuhla lendzawo ibitwa ngekutsi yiGilgali.*+
10 Ema-Israyeli achubeka ahleti eGilgali, futsi kusihlwa ngelilanga lesi-14 kuleyo nyanga+ agcina liPhasika, ehlane laseJerikho.
11 Ngelilanga lelilandzela liPhasika acala kudla umkhicito walelive, futsi ngalo lelolanga adla nesinkhwa lesingenamvubelo+ kanye nalokutinhlavu lokugayingiwe.
12 Ngelilanga lelilandzela lelo lebekadle ngalo umkhicito walelive, imana ayizange isaba khona.+ Ema-Israyeli akaphindzanga ayitfola, kodvwa ngalowo mnyaka acala kudla umkhicito welive laseKhenani.+
13 Ngesikhatsi Joshuwa sekadvute neJerikho, waphakamisa emehlo futsi wabona kume indvodza+ embikwakhe iphetse inkemba esandleni.+ Ngako Joshuwa waya kuyo, wayibuta watsi: “Useluhlangotsini lwetfu yini nobe useluhlangotsini lwetitsa tetfu?”
14 Yaphendvula yatsi: “Cha, kodvwa ngiyindvuna* yelibutfo laJehova.”+ Nakeva loko, Joshuwa waguca, wakhotsama futsi watsi: “Yini inkhosi yami lefuna kuyitjela inceku yayo?”
15 Lendvuna yelibutfo laJehova yaphendvula Joshuwa yatsi: “Khumula tincabule takho ngobe lendzawo lome kuyo ingcwele.” Ngekushesha Joshuwa wenta njalo.+
Imibhalo lengentansi
^ NgesiHebheru kutsi, “eluhlangotsini lolubuke elwandle.”
^ NgesiHebheru kutsi, “tinhlitiyo tawo tancibilika.”
^ NgesiHebheru kutsi, “akazange aphindze abe nemandla.”
^ Lokusho kutsi “Ligcuma Lemajwabu.”
^ Nobe “emadvodza labesakhule ngalokwenele kutsi aye emphini.”
^ NgesiHebheru kutsi, “kusinika lona.”
^ NgesiHebheru kutsi, “ngiligocotile.”
^ Lokusho kutsi “Kugocota.”
^ Nobe “ngisikhulu selibutfo.”
