Joshuwa
7:1-26
7 Kodvwa ema-Israyeli akazange etsembeke mayelana netintfo lebetinikelwe ekubhujisweni, ngobe Akhani+ indvodzana yaKhami, loyindvodzana yaZabdi, indvodzana yaZera, lovela esiveni sakaJuda, watsatsa letinye tetintfo lebetinikelwe ekubhujisweni.+ Ngako intfukutselo yaJehova yawavutsela ema-Israyeli.+
2 Ngemuva kwaloko, Joshuwa watfuma emadvodza kutsi esuke eJerikho aye e-Ayi,+ lesedvute neBhethi-aveni futsi lesemphumalanga yeBetheli,+ watsi kuwo: “Khuphukani niyohlola lelive.” Ngako lamadvodza ahamba ayohlola i-Ayi.
3 Atsi nakabuya kuJoshuwa ambikela atsi: “Akudzingeki kutsi bonkhe labantfu bakhuphuke. Emadvodza langaba ngu-2 000 nobe langaba ngu-3 000 enele kutsi ayincobe i-Ayi. Ungabahluphi bonkhe labantfu ngekutsi utsi abakhuphuke, ngobe bancane bantfu labahlala kuleya ndzawo.”
4 Ngako kwakhuphuka emadvodza langaba ngu-3 000, kodvwa kwadzingeka kutsi awabalekele emadvodza ase-Ayi.+
5 Emadvodza ase-Ayi abulala emadvodza aka-Israyeli langu-36. Awacosha kusukela ngephandle kweligede lelidolobha aze ayofika eShebarimu,* futsi awabulalela kulendzawo leyehlelako. Ngako tinhlitiyo tebantfu tashona phansi, futsi baphelelwa nasibindzi.
6 Nakeva loku, Joshuwa wadzabula tingubo takhe futsi yena nemadvodza lamadzala aka-Israyeli baguca phansi bakhotsama embikweLibhokisi laJehova kwaze kwaba kusihlwa. Bachubeka batitsela ngemhlabatsi etinhloko.
7 Joshuwa watsi: “Awu Nkhosi Lephakeme Jehova, uvumeleni kutsi labantfu bahambe yonkhe lendlela bewele iJordane kuze usinikele kuma-Amori kutsi asibhubhise? Kube mane kwasenelisa kuchubeka sihleti ngale* kweJordane!
8 Awu Jehova, ngingatsini nje nyalo njengobe ema-Israyeli asabalekele* titsa tawo?
9 Kutawutsi lapho emaKhenani nabo bonkhe bantfu labahlala kulelive beva ngaloku, basitungelete futsi basuse libito letfu emhlabeni. Utawubese wenta njani ngelibito lakho leliphakeme?”+
10 Jehova waphendvula Joshuwa watsi: “Sukuma! Uweleni phansi ngebuso bakho?
11 Ema-Israyeli onile. Asephulile sivumelwane sami+ lengatsi akasigcine. Atsetse letinye tetintfo lebetinikelwe ekubhujisweni,+ ateba+ futsi atifihla etintfweni tawo.+
12 Ngako ema-Israyeli ngeke akhone kumelana netitsa tawo. Atawugucuka atibalekele, ngobe sekafanelwe kunikelwa ekubhujisweni. Ngeke ngiphindze ngibe nani ngaphandle nangabe ningacotfula letintfo letisemkhatsini wenu letinikelwe ekubhujisweni.+
13 Hamba uyewungcwelisa labantfu!+ Ubotsi kubo: ‘Kusasa nibotingcwelisa, ngobe naku Jehova Nkulunkulu wema-Israyeli lakushoko: “Nine ma-Israyeli, emkhatsini wenu kunetintfo letinikelwe ekubhujisweni. Ngeke nikhone kumelana netitsa tenu kuze kube ngulapho nitisusa letintfo letinikelwe ekubhujisweni letilapha emkhatsini wenu.
14 Ekuseni kufanele nite lapha, kube sive ngesive, futsi sive Jehova latasikhetsa+ sitawusondzela, kube ngumndeni ngemndeni, nemndeni Jehova latawukhetsa utawusondzela, kube yindlu ngendlu, nendlu Jehova latayikhetsa nayo itawusondzela, kube yindvodza nendvodza.
15 Loyo lotawutfolakala analetintfo letinikelwe ekubhujisweni utawushiswa ngemlilo,+ yena kanye nako konkhe lanako, ngobe wephule sivumelwane+ saJehova, wenta nesento lesenyanyekako ka-Israyeli.”’”
16 Ngako ngelilanga lelilandzelako Joshuwa wavuka ekuseni kakhulu wase utsi ema-Israyeli akasondzele, kube sive ngesive, futsi kwakhetfwa sive sakaJuda.
17 Watsi imindeni yakaJuda ayisondzele, futsi kwakhetfwa umndeni wakaZera. Ngemuva kwaloko watsi umndeni wakaZera+ awusondzele, kube yindvodza ngendvodza, futsi kwakhetfwa Zabdi.
18 Ekugcineni watsi akusondzele indlu yaZabdi, kube yindvodza ngendvodza, futsi kwakhetfwa+ Akhani indvodzana yaKhami, loyindvodzana yaZabdi, indvodzana yaZera, lovela esiveni sakaJuda.
19 Joshuwa wabese utsi ku-Akhani: “Ndvodzana, ngicela udvumise Jehova Nkulunkulu wema-Israyeli, uvume sono sakho kuye. Ngicela ungitjele kutsi wenteni, ungangifihleli lutfo.”
20 Akhani waphendvula Joshuwa watsi: “Ecinisweni ngimi lolowonile kuJehova Nkulunkulu wema-Israyeli, futsi naku lengikwentile:
21 Ngitsite nangibuka letintfo ngabona ingubo lenhle futsi lekhetsekile yaseShinari,+ nelisiliva lelingemakhilogremu langaba mabili* kanye neligolide lelinesisindvo lesingemagremu langaba ngu-600.* Ngibese ngiyatihawukela letintfo futsi ngatitsatsa. Nyalo ngitifihle phansi ethendeni lami, nalemali ingaphansi kwato.”
22 Ngaso leso sikhatsi Joshuwa watfumela titfunywa tagijima taya kulelithende. Tatfola lengubo ifihlwe ethendeni la-Akhani nalemali ingaphansi kwayo.
23 Ngako tatsatsa letintfo kulelithende tatimikisa kuJoshuwa nakuso sonkhe sive sema-Israyeli, tefike tatibeka embikwaJehova.
24 Ngemuva kwaloko, Joshuwa kanye nawo onkhe ema-Israyeli batsatsa Akhani+ indvodzana yaZera, batsatsa nalelisiliva, nalengubo lekhetsekile, naleligolide+ kanye nemadvodzana nemadvodzakati akhe, tinkhabi takhe, timbongolo takhe, umhlambi wakhe wetimvu newetimbuti, lithende lakhe kanye nako konkhe labenako, bakhuphuka nako baya eSihosheni* sase-Akhori.+
25 Joshuwa watsi: “Usiletseleleni lenhlekelele?*+ Ngaleso sizatfu, naJehova utakuletsela inhlekelele lamuhla.” Onkhe ema-Israyeli amgcoba ngematje,+ ngemuva kwaloko abashisa ngemlilo.+ Ngako abagcoba bonkhe ngematje.
26 Ema-Israyeli abeka indvundvuma lenkhulu yematje etikwakhe futsi isekhona nalamuhla. Ngenca yaloko intfukutselo yaJehova yancipha.+ Kungako lendzawo ibitwa ngekutsi Sihosha sase-Akhori* kuze kube ngulamuhla.
Imibhalo lengentansi
^ Lokusho kutsi “Imigodzi Lokumbiwa Kuyo Ematje Ekwakha.”
^ Lokusho, emphumalanga.
^ Nobe “asafulatsele.”
^ NgesiHebheru kutsi, “lelingemashekeli langu-200.” Fundza Sandzisachazo B14.
^ NgesiHebheru kutsi, “semashekeli langu-50.” Fundza Sandzisachazo B14.
^ Nobe “eTsafeni.”
^ Nobe “lenkinga; lokulahlwa.”
^ Lokusho kutsi “Inhlekelele; Kulahlwa.”
