Kubase-Efesu 1:1-23
1 Mine Pawula, umphostoli waKhristu Jesu ngentsandvo yaNkulunkulu, ngibhalela labangcwele labase-Efesu,+ labetsembekile ebunyeni naKhristu Jesu:
2 Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini lenguJesu Khristu.
3 Akabongwe Nkulunkulu longuBabe weNkhosi yetfu Jesu Khristu, ngobe usibusise ngato tonkhe tibusiso letivela kuye ezulwini njengobe sisebunyeni naKhristu,+
4 ngobe wasikhetsa kutsi sibe munye naKhristu live* lisengakasekelwa, kuze ngelutsandvo sibe ngcwele futsi singasoleki+ embikwakhe.
5 Wasikhetsa kusengaphambili+ kuze sifakwe esiswini sentiwe emadvodzana akhe+ ngaJesu Khristu, ngekuvumelana naloko lokwemukelekako kuye nalokuyintsandvo yakhe,+
6 khona atodvunyiswa ngenca yemusa wakhe lomkhulu+ futsi lokhatimulako lasentele wona ngekukhululeka asebentisa lotsandzekako wakhe.+
7 Ngaye, siyakhululwa ngenhlawulo leyentiwa ngengati yakhe,+ lokusho kutsetselelwa kwetono tetfu+ ngekuvumelana nekuphuphuma kwemusa lomkhulu waNkulunkulu.
8 Nkulunkulu wenta lomusa lomkhulu waphuphuma kitsi futsi wasinika konkhe kuhlakanipha nekucondza,*
9 ngekusenta sati imfihlo lengcwele+ yentsandvo yakhe. Lemfihlo lengcwele ivumelana nesifiso sakhe, futsi ivumelana nenjongo yakhe lemayelana
10 nekucondzisa tintfo nasekufike tikhatsi letibekiwe, kuze ngaKhristu abutsele ndzawonye tonkhe tintfo, lokutintfo letisezulwini netintfo letisemhlabeni.+ Letintfo titawubutselwa ndzawonye ngaKhristu
11 lesisebunyeni naye nalesabelwa kutsi sibe tindlalifa+ naye, ngobe sakhetfwa kusengaphambili ngekuvumelana nenjongo yaloyo lowenta tonkhe tintfo ngendlela lancume ngayo ngekwentsandvo yakhe,
12 kuze tsine lesibe bekucala kwetsembela kuKhristu sisebentele kudvunyiswa nekukhatinyuliswa kwakhe.
13 Nani nabese netsembela kuye nasenilivile livi leliciniso, lokutindzaba letimnandzi tensindziso yenu. Ngemuva kwekutsi nikholwe, nabekwa luphawu+ ngemoya longcwele lowetsenjiswa, futsi loku kwentiwa ngaKhristu.
14 Umoya longcwele usicinisekiso* lesentiwa kusengaphambili selifa letfu,+ kuze ngenhlawulo kukhululwe bantfu baNkulunkulu,*+ khona atokhatinyuliswa aphindze advunyiswe.
15 Ngivile ngekukholwa leninako eNkhosini Jesu nangelutsandvo lenilukhombisa bonkhe labangcwele, kungako
16 ngingayekeli kubonga Nkulunkulu ngani. Ngiyachubeka nginithantazela,
17 kuze Nkulunkulu weNkhosi yetfu Jesu Khristu, longuBabe lokhatimulako, aninike umoya wekuhlakanipha nalotanembulela lwati lolungulonalona ngaye.+
18 Nkulunkulu uvule tinhlitiyo tenu kuze nibone futsi nati kutsi wanibitela kuliphi litsemba, kutsi ngumuphi umcebo lokhatimulako lawubeke njengelifa lalabangcwele,+
19 nekutsi makhulu kangakanani emandla akhe kitsi tsine lesikholwako.+ Loku kuvumelana nekusebenta kwebukhulu bemandla akhe,
20 lawasebentisa nakavusa Khristu ekufeni, nangesikhatsi amhlalisa ngesekudla sakhe+ ezulwini
21 ngetulu kwabo bonkhe bohulumende, emagunya, emandla, bukhosi, nawo onkhe emabito,+ hhayi kulelive* kuphela, kodvwa nakulelo lelitako.
22 Waphindze wabeka tonkhe tintfo ngephansi kwetinyawo takhe,+ futsi wamenta inhloko yato tonkhe tintfo letiphatselene nelibandla+
23 lelingumtimba wakhe,+ naleligcwele tonkhe tintfo letimayelana naye, njengobe aphelelisa tonkhe tintfo.
Imibhalo lengentansi
^ Loku kusho bantfwana ba-Adamu na-Eva.
^ Nobe “kuba nengcondvo.”
^ Nobe “sibambiso (imali lesibambiso).”
^ NgesiGriki kutsi, “tintfo taNkulunkulu.”
^ Nobe “kulesikhatsi.” Fundza Tinchazelo Temagama.
