KubaseKholose 2:1-23
2 Ngifuna nati kutsi kukhulu kangakanani kuhlupheka lengibhekana nako ngenca yenu, nangenca yebaseLawodisiya+ kanye nabo bonkhe labangakaze bangibone.*
2 Loku ngikwentela kutsi tinhlitiyo tabo tidvudvuteke,+ futsi bahlanganiswe babe munye elutsandvweni,+ batfole netibusiso* letingumphumela wekuciniseka ngetintfo labaticondzako, kuze bazuze lwati lolungulonalona lwemfihlo lengcwele yaNkulunkulu, lokunguKhristu.+
3 Kuye, kufihlisiswe wonkhe umcebo wekuhlakanipha newelwati.+
4 Loku ngikusho kuze kube bete umuntfu longahle aniyenge ngemavi lakhangako.
5 Nanobe ngingekho nani ngemtimba, kodvwa nginani ngemoya, futsi kuyangijabulisa kubona kuhleleka kwenu,+ nekucina kwekukholwa kwenu kuKhristu.+
6 Ngako njengobe senemukele Khristu Jesu iNkhosi, chubekani nihamba ebunyeni naye,
7 nicine futsi nakhiwe kuye,+ nisime nasekukholweni,+ njengobe nje nafundziswa, futsi nibohlale nibonga.+
8 Cinisekani kutsi kube bete umuntfu lonitfumba* ngekuhlakanipha kwebantfu, nangekuyenga lokulite+ lokungakasekelwa kuKhristu, kodvwa lokusekelwe emasikweni ebantfu nasetintfweni letitsatfwa njengaletibalulekile eveni;
9 ngobe bonkhe bunguye baNkulunkulu lobuphelele buhlala kuye.+
10 Ngako senitfole kuphelela ngenca yakhe, loyo loyinhloko yabo bonkhe bohulumende nebabusi.+
11 Ngenca yekutsi ninebuhlobo naye nasokwa, kodvwa anisokwanga ngetandla, kunaloko nasusa lokutsandvwa ngumtimba wenu lonesono.+ Nasokwa ngekusoka lokukwaKhristu.+
12 Nangcwatjwa naye ngelubhabhatiso lwakhe,+ futsi ngaye navuswa+ kanyekanye ngekukholwa leninako kuloko lokwafezwa ngemandla aNkulunkulu, lowamvusa ekufeni.+
13 Ngetulu kwaloko, ngisho nome benifile ngenca yetiphambeko tenu futsi ningakasoki enyameni, Nkulunkulu waniphilisa kanye naKhristu.+ Ngemusa wasitsetselela tonkhe tiphambeko tetfu,+
14 futsi wayicisha* incwadzi lebhalwe ngesandla,+ lebeyinemitsetfo+ futsi imelene natsi.+ Wayisusa ngekuyibetsela elugodvweni*+ lokwabetselwa kulo Jesu.
15 Wancoba bohulumende nebabusi, wabaveta kuwonkhe wonkhe kutsi ubehlulile, futsi ngalolugodvo* wabukisa ngabo akhombisa kutsi ubancobile.+
16 Ngako ningavumeli muntfu kutsi anehlulele ngalenikudlako nangalenikunatsako,+ nobe ngekugujwa kwemikhosi, kugujwa kwekwetfwasa kwenyanga+ nobe kwelisabatha.+
17 Leto tintfo tisitfunti saleto letitako,+ kodvwa lokungiko sibili kukuKhristu.+
18 Akube bete umuntfu lonemuka umklomelo,+ lokungumuntfu lojatjuliswa kutishaya lotfobekile, lokhonta tingilosi, “nalome”* etintfweni latibonile. Udvwaliswa yimicabango yakhe lelite,
19 futsi akabambeleli enhlokweni,+ lenguloyo wonkhe umtimba lowondliwa uphindze uhlanganiswe kuye kanyekanye ngemalunga nangemisipha, futsi lowentiwa ukhule ngemandla lavela kuNkulunkulu.+
20 Nangabe nafa kanye naKhristu etintfweni letitsatfwa njengaletibalulekile eveni,+ pho niphilelani shengatsi niseseyincenye yelive, ngekuchubeka nititfoba kulemitsetfo+ letsi:
21 “Ungaphatsi, unganambitsi, ungatsintsi”?
22 Ngobe lemitsetfo ikhuluma ngetintfo letiphelako natisetjentiswa, futsi ivumelana nemitsetfo yebantfu netimfundziso tabo.+
23 Nanobe leto tintfo tibonakala tikuhlakanipha, timane tikukhonta labatentele kona, nekutishaya labatfobekile, kanye nekuhlupha umtimba,+ kodvwa atisiti ngalutfo ekulweni netifiso tenyama.
Imibhalo lengentansi
^ NgesiGriki kutsi, “labangakabuboni buso bami enyameni.”
^ Nobe “umcebo.”
^ Nobe “lonetfwala kuhle kwenyamatane.”
^ Nobe “wayesula.”
^ Fundza Tinchazelo Temagama.
^ Kungaphindze kubekwe ngekutsi, “ngaye.”
^ Lawa ngemavi lasetjentiswa nguPawula lasuselwa emasikweni langacondzakali (ekwetfula umuntfu kubonkulunkulu) lebekentiwa bantfu labangamkhonti Nkulunkulu.
