Kulandzisa KwaMakho 2:1-28
2 Ngemuva kwemalanga latsite wabuyela eKhaphanawume, futsi bantfu beva kutsi ungene endlini.+
2 Ngako bantfu labanyenti babutsana lapho yaze yagcwala lendlu, kwaba bete nendzawo ngisho nasemnyango, futsi wacala kushumayela kubo.+
3 Emadvodza lamane eta kuye atfwele indvodza lebeyingakhoni kuhamba.+
4 Kodvwa ngenca yekutsi bekangakhoni kuyisondzeta kuJesu njengobe bekugcwele kulendlu, avula sikhala eluphahleni lwendlu macondzana naJesu, ase ayehlisa kuleso sikhala ngeluhlaka leyayilele kulo.
5 Ngesikhatsi Jesu abona kukholwa kwawo,+ watsi kulendvodza: “Ndvodzana, tono takho titsetselelwe.”+
6 Bekunaletinye tati temtsetfo lebetihleti lapho ticabanga titsi:+
7 “Lomuntfu ukhulumelani kanjena? Uyahlambalata. Ukhona yini longatsetselela tono ngaphandle kwaNkulunkulu?”+
8 Kodvwa ngekushesha Jesu wakwati loko lebetikucabanga, wase utsi kuto: “Kungani nicabanga letintfo?+
9 Ngukuphi lokuncono kutsi ngitsi kulona longakhoni kuhamba: ‘Tono takho titsetselelwe,’ nobe ngitsi: ‘Sukuma utsatse luhlaka lwakho uhambe’?
10 Kodvwa ngitanikhombisa kutsi iNdvodzana yemuntfu+ ineligunya lekutsetselela tono lapha emhlabeni,”+ ngako watsi kulona lobekangakhoni kuhamba:
11 “Ngitsi kuwe sukuma utsatse luhlaka lwakho, uhambe uye ekhaya.”
12 Ngako lendvodza yasukuma futsi ngekushesha yatsatsa luhlaka lwayo, yahamba bayibona bonkhe. Bantfu bamangala, base badvumisa Nkulunkulu batsi: “Asikase sesiyibone intfo lenje.”+
13 Jesu waphindze waya ngaselwandle futsi sicumbi sebantfu samlandzela, wase uyasifundzisa.
14 Watsi nakendlula, wabona Levi indvodzana ya-Alfiyose ahleti endzaweni yekutselisa, watsi kuye: “Ngilandzele.” Ngako wasukuma wamlandzela.+
15 Ngesikhatsi ahleti etafuleni endlini yaLevi, batselisi netoni letinyenti bebahleti naye kanye nebafundzi bakhe, futsi labanyenti kulabatselisi netoni besebabalandzeli bakhe.+
16 Kodvwa ngesikhatsi tati temtsetfo lebetibaFarisi tibona kutsi udla netoni nebatselisi, tatsi kubafundzi bakhe: “Kantsi udla nebatselisi netoni?”
17 Nakeva loko, Jesu watsi kuto: “Bantfu labaphilile abamdzingi dokotela, kodvwa ngulabagulako labamdzingako. Angiketeli kutobita bantfu labalungile, kodvwa ngitobita toni.”+
18 Bafundzi baJohane kanye nebaFarisi bebazila kudla. Ngako beta kuJesu batsi: “Kwentiwa yini kutsi bafundzi baJohane nebafundzi bebaFarisi bazile kudla, kodvwa bafundzi bakho bona bangakuzili kudla?”+
19 Jesu watsi kubo: “Nangabe umkhwenyane+ asekhona, bangani bakhe bayakuzila yini kudla? Nakasekhona umkhwenyane, kute sidzingo sekutsi bazile kudla.
20 Kodvwa sikhatsi siyeta lapho umkhwenyane atawuhamba khona,*+ kube ngukhona-ke bazila kudla.
21 Kute umuntfu lochibela ingubo lendzala ngesicephu lesisha. Nakangenta njalo, lesicephu sitayidzabula lengubo bese kuba nembobo lenkhulu.+
22 Kute umuntfu lofaka liwayini lelisha etigujini letindzala tesikhumba. Nakangenta njalo, letigubhu titawubhubuka, futsi leliwayini licitseke, nato tonakale. Kodvwa liwayini lelisha lifakwa etigujini letinsha tesikhumba.”
23 Ngesikhatsi ahamba emasimini ngeliSabatha, bafundzi bakhe bebachulula kolo njengobe bahamba.+
24 Ngako baFarisi batsi kuye: “Asewubuke! Kungani benta intfo lengakavumeleki ngeliSabatha?”
25 Kodvwa watsi kubo: “Anizange nifundze yini ngaloko Davide lakwenta ngesikhatsi sekete kudla, futsi yena nemadvodza lebekahamba nawo sebalambile?+
26 Kutsi ngesikhatsi sa-Abiyatha+ umphristi lomkhulu, Davide wangena endlini yaNkulunkulu wadla tinkhwa lebetinikelwe kuNkulunkulu, futsi ngemuva kwaloko watinika nalamadvodza lebekahamba nawo. Kute lobekavumeleke kutsi atidle letinkhwa ngaphandle kwebaphristi.”+
27 Wachubeka watsi kubo: “LiSabatha laba khona kute kusitakale umuntfu,+ hhayi kutsi umuntfu wadalelwa kugcina liSabatha.
28 Ngako iNdvodzana yemuntfu iphindze ibe yiNkhosi yeliSabatha.”+
Imibhalo lengentansi
^ NgesiGriki kutsi, “atawutsatfwa kubo.”
