Kulandzisa KwaMakho 9:1-50
-
Jesu uyashintjwa (1-13)
-
Umfana lophetfwe ngemadimoni uyelashwa (14-29)
-
Tonkhe tintfo tingenteka kuloyo lonekukholwa (23)
-
-
Kuphindze kuphrofethwa ngekufa kwaJesu (30-32)
-
Bafundzi baphikisana ngekutsi ngubani lomkhulu emkhatsini wabo (33-37)
-
Umuntfu longakamelani natsi, usuke anatsi (38-41)
-
Tintfo letenta umuntfu awe ekukholweni (42-48)
-
“Banini njengeluswayi” (49, 50)
9 Jesu wachubeka watsi kubo: “Ngicinisile ngitsi kini: Kukhona labalapha labangeke bafe bangakawuboni uMbuso waNkulunkulu nasewubusa.”+
2 Ngemuva kwemalanga lasitfupha, Jesu watsatsa Phetro, Jakobe naJohane, wenyukela nabo entsabeni lendze babodvwa. Wase uyashintja embikwabo,+
3 tingubo takhe tangetulu tacwebetela, futsi kute umuntfu emhlabeni lobekangatenta tibe mhlophe njengato.
4 Base babona Elija naMosi bakhuluma naJesu.
5 Phetro watsi kuJesu: “Mfundzisi, kuhle kutsi sibe lapha, ngako asakheni emathende lamatsatfu, linye libe lakho, lelinye libe laMosi futsi lelinye libe la-Elija.”
6 Ecinisweni Phetro bekangatati kutsi utsini, ngobe bebesaba kakhulu.
7 Kwavela lifu labasibekela, futsi kwevakala livi+ liphuma kulelifu litsi: “Lena yiNdvodzana yami letsandzekako.+ Yilaleleni.”+
8 Kodvwa ngekushesha nje nabacalata, abazange basabona muntfu ngaphandle kwaJesu.
9 Nabasehla entsabeni, Jesu watsi bangacali batjele muntfu ngaloko lebebakubonile,+ kuze kube ngulapho iNdvodzana yemuntfu seyivukile ekufeni.+
10 Bawalalela lawo mavi,* kodvwa babutana bodvwa kutsi kusho kutsini lokuvuswa kwakhe ekufeni.
11 Babuta Jesu batsi: “Kwentiwa yini-ke kutsi tati temtsetfo titsi kufanele kufike Elija+ kucala?”+
12 Watsi kubo: “Elija utawufika kucala futsi abuyisele tonkhe tintfo esimeni sato.+ Pho isho kutsini imibhalo nayitsi iNdvodzana yemuntfu kufanele ihlupheke kakhulu+ iphindze iphatfwe kabi?+
13 Kodvwa ngitsi kini: Elija+ sewufikile, futsi bantfu bente labakutsandzako kuye, njengobe kubhaliwe ngaye.”+
14 Batsi nasebasondzela kulalabanye bafundzi, babona sicumbi lesikhulu sebantfu sibatungeletile, futsi bekunetati temtsetfo lebetiphikisana nabo.+
15 Ngekushesha lesicumbi sebantfu nasibona Jesu, samangala futsi sagijima saya kuye sayombingelela.
16 Jesu wababuta watsi: “Niphikisana ngani?”
17 Lomunye kulesicumbi watsi: “Mfundzisi, bengiletse indvodzana yami kuwe ngobe inelidimoni leliyenta ingakhulumi.+
18 Litsi lingayibamba liyilahle phansi, iphukuhle emagwebu, icucudze ematinyo futsi iphelelwe ngemandla. Ngicele bafundzi bakho kutsi balikhiphe, kodvwa behlulekile.”
19 Jesu watsi: “Awu situkulwane lesingakholwa,+ kufanele ngichubeke nginani sikhatsi lesingakanani? Ngitawunibeketelela kuze kube ngunini? Mletseni lapha lomfana.”+
20 Bamletsa, kodvwa lelidimoni latsi nalibona Jesu, lamnklinklitisa lomfana, lamjika phansi, washumpa futsi waphukuhla emagwebu.
21 Jesu wabuta babe walomfana, watsi: “Sesidze kangakanani sikhatsi limphetse?” Lobabe watsi: “Kusukela asemncane,
22 futsi belihlale limwisela emlilweni nasemantini kuze limbulale. Nawungakhona, sicela umane usihawukele, usisite.”
23 Jesu watsi kuye: “Usholani kutsi: ‘Nawungakhona’? Ngobe kuloyo lonekukholwa, tonkhe tintfo tiyenteka.”+
24 Masinyane babe walomfana wamemeta watsi: “Ngiyakholwa! Kepha ngisite ngicinise kukholwa kwami!”+
25 Jesu wabona kutsi sicumbi sebantfu besesibutsana sita ngakubo, wase uyalekhuta lelidimoni watsi: “Wena dimoni lobewenta lomntfwana angakhulumi futsi angeva etindlebeni, ngitsi kuwe phuma, ungaphindzi ungene kuye!”+
26 Ngemuva kwekukhala nekumnklinklitisa, lelidimoni laphuma kulomfana futsi kwaba shengatsi sewufile, kangangekutsi bantfu labanyenti besebatsi: “Ufile!”
27 Kodvwa Jesu wambamba sandla wamphakamisa, wase uyasukuma.
28 Ngemuva kwekungena endlini, bafundzi bakhe beta kuye bambuta babodvwa, batsi: “Kwentiwe yini kutsi tsine sehluleke kulikhipha?”+
29 Yena watsi kubo: “Lenhlobo yelidimoni ikhishwa ngemthantazo kuphela.”
30 Besuka lapho bahamba badzabula eGalile, kodvwa Jesu bekangafuni kutsi kube khona lowatiko ngaloko.
31 Ngobe bekafundzisa bafundzi bakhe futsi abatjela atsi: “INdvodzana yemuntfu itawunikelwa kubantfu, futsi batayibulala,+ bese kutsi ngelilanga lesitsatfu ivuswe.”+
32 Labafundzi abazange bacondze kutsi ukhuluma ngani, futsi besaba kumbuta.
33 Befika eKhaphanawume. Ngesikhatsi sebasendlini, Jesu wababuta watsi: “Beniphikisana ngani endleleni?”+
34 Abazange bamphendvule, ngobe endleleni bebaphikisana ngekutsi ngubani lomkhulu emkhatsini wabo.
35 Jesu wahlala phansi, wababita futsi watsi kubo: “Nangabe umuntfu afuna kuba mkhulu kufanele atehlise, abe yinceku yabo bonkhe.”+
36 Watsatsa umntfwana lomncane wammisa embikwabo, wase uyamgaca, watsi kubo:
37 “Nobe ngubani lowemukela lomunye lonjengalomntfwana+ ngenca yelibito lami, uyangemukela nami, futsi nobe ngubani longemukelako, akemukeli mine kuphela, kodvwa wemukela naLoyo longitfumile.”+
38 Johane watsi kuye: “Mfundzisi, kunendvodza lesiyibone ikhipha emadimoni ngelibito lakho, futsi setamile kuyivimba, ngobe beyingahambi natsi.”+
39 Kodvwa Jesu watsi: “Ningayivimbi, ngobe kute umuntfu lowenta timangaliso ngelibito lami longashintja ngekushesha akhulume tintfo letimbi ngami.
40 Umuntfu longakamelani natsi, usuke anatsi.+
41 Nobe ngubani loninatsisa emanti ngenca yekutsi nibaKhristu,+ ngicinisile ngitsi loyo muntfu ngeke ahlale angawutfoli umvuzo.+
42 Kodvwa nobe ngubani lokhubekisa lomunye walaba labakholwako labanjengebantfwana, bekungaba ncono kutsi kuboshelwe litje lelikhulu lekusila entsanyeni yakhe, lelinjengalelo leligucuguculwa yimbongolo, bese ujikwa elwandle.+
43 “Nangabe sandla sakho sikonisa, sijube usilahle. Kuncono kutfola kuphila ukhubatekile, kunekutsi uye eGehena,* emlilweni longacimeki ube unato totimbili tandla.+
44 *——
45 Nangabe lunyawo lwakho lukonisa, lujube ululahle. Kuncono kutfola kuphila uyinchute, kunekutsi ujikwe eGehena*+ unato totimbili tinyawo.
46 *——
47 Nangabe liso lakho likonisa, likhiphe ulilahle,+ ngobe kuncono kutsi ungene eMbusweni waNkulunkulu uyindlobho, kunekutsi ujikwe eGehena* unawo omabili emehlo,+
48 kuleyo ndzawo timphetfu takhona atifi, nemlilo wakhona awucimeki.+
49 “Bantfu labanjalo kufanele bafafatwe ngemlilo, njengalapho umuntfu avuvutela luswayi.+
50 Luswayi lumnandzi, kodvwa nangabe luphelelwa ngemandla alo, lawo mandla angabuyiselwa ngani?+ Banini njengeluswayi,+ futsi nihlalisane ngekuthula.”+
Imibhalo lengentansi
^ Kungaphindze kubekwe ngekutsi, “Abatjelanga muntfu ngalendzaba.”
^ Fundza Tinchazelo Temagama.
^ Fundza Sandzisanchazo A3.
^ Fundza Tinchazelo Temagama.
^ Fundza Sandzisanchazo A3.
^ Fundza Tinchazelo Temagama.
