Malakhi 2:1-17
2 “Lona ngumyalo wenu nine baphristi.+
2 Nangabe ningafuni kuwulalela niphindze niwunake kuze nidvumise libito lami, ngitanitfumelela sicalekiso,+ futsi ngitawugucula tibusiso tenu tibe ticalekiso.+ Ngitiguculile tibusiso taba ticalekiso ngobe lomyalo aniwunaki,” kusho Jehova wemabutfo.
3 “Ngitayonakalisa* inhlanyelo yenu ngenca yetento tenu,+ futsi ngitawusakatela bulongo ebusweni benu, bulongo betilwane lenenta ngato umhlatjelo emikhosini yenu; futsi nitawujikijelwa endvundvumeni yalobulongo.*
4 Nitawubese niyati kutsi ngininike lomyalo kuze sivumelwane lengasenta naLevi sichubeke,”+ kusho Jehova wemabutfo.
5 “Sivumelwane sami lengasenta naye besisekuphila, kuthula kanye nenhlonipho,* lokutintfo lengamniketa tona. Bekangesaba, futsi bekalihlonipha libito lami.
6 Umtsetfo* weliciniso bewusemlonyeni wakhe,+ futsi kute kungalungi lokwatfolakala etindzebeni temlomo wakhe. Wahamba nami ngekuthula nangebucotfo,+ futsi wakhipha labanyenti esonweni.
7 Tindzebe temlomo wemphristi kufanele tilondvolote lwati, futsi bantfu kufanele bafune umtsetfo* emlonyeni wakhe,+ ngobe usitfunywa saJehova wemabutfo.
8 Jehova wemabutfo utsi: “Kodvwa nine niphambukile endleleni. Nente labanyenti bakhubeka ngenca yemtsetfo.*+ Nisephulile sivumelwane saLevi. +
9 Ngako-ke, ngitawunenta nedzeleleke futsi nibukeleke phansi embikwabo bonkhe bantfu, ngenca yekutsi anikatigcini tindlela tami, kodvwa nikhombise kukhetsa nanisebentisa umtsetfo.”+
10 “Site yini babe munye sonkhe?+ Asidalwanga yini nguNkulunkulu munye? Kungani-ke singetsembeki kulomunye nalomunye?+ Kungani sedzelela sivumelwane sabokhokho betfu?
11 Juda ukhohlakele, futsi ka-Israyeli naseJerusalema kwentiwa intfo leyenyanyekako; ngobe Juda wedzelele bungcwele* baJehova+ labutsandzako, futsi utitsatsele indvodzakati yankulunkulu wetive yaba ngumfati wakhe.+
12 Jehova utamsusa emathendeni aJakobe umuntfu lowenta loku, nome kungatsiwa ngubani.* Ngisho nobe enta umnikelo kuJehova wemabutfo.”+
13 “Kunalenye* intfo leniyentako lebangela kutsi kumbonywe li-al’thare laJehova ngetinyembeti, nangekudzindza sililo kanye nekububula, leyenta kutsi angasatinaki tipho tenu nobe ajabulele nome yini lesetandleni tenu.+
14 Kodvwa nine nitsi: ‘Loku kwenteke ngasiphi sizatfu?’ Kwenteke ngesizatfu sekutsi Jehova ube ngufakazi emkhatsisini wakho nemfati webusha bakho, loyo wena longazange wetsembeke kuye, ngisho nobe angumlingani wakho nemfati wakho ngesivumelwane.*+
15 Nobe kunjalo, kunalabanye emkhatsini wenu labancumile etinhlitiyweni tabo kutsi ngeke bente ngalendlela. Bafuna kuba nebantfwana labayincenye yebantfu baNkulunkulu* mbamba. Ngako-ke, ticaphele ngalokuphatselene netintfo loticabangako,* futsi wetsembeke kumfati webusha bakho.
16 Ngobe ngiyayitondza* idivosi,”+ kusho Jehova Nkulunkulu wema-Israyeli, “ngiyamtondza naloyo lowenta budlova,”* kusho Jehova wemabutfo. “Ticapheleni ngalokuphatselene netintfo leniticabangako, futsi akukafaneli nibe bantfu labangaketsembeki.+
17 “Nine nente Jehova wadzinwa ngemavi enu.+ Nobe kunjalo, nine nitsi: ‘Simente kanjani wadzinwa?’ Ngekutsi nitsi: ‘Wonkhe umuntfu lowenta lokubi muhle emehlweni aJehova, futsi uyajabula ngaloyo muntfu,’+ nangekutsi nitsi: ‘Uphi Nkulunkulu lowehlulela ngekulunga?’”
Imibhalo lengentansi
^ NgesiHebheru kutsi, “Kwekhuta.”
^ Lokusho, indzawo lebekulahlwa kuyo bulongo baletilwane temihlatjelo.
^ NgesiHebheru kutsi, “nekwesaba.”
^ Nobe “sicondziso.”
^ Nobe “sicondziso.”
^ Kungaphindze kubekwe ngekutsi, “ngesicondziso senu.”
^ Kungaphindze kubekwe ngekutsi, “indzawo lengcwele.”
^ NgesiHebheru kutsi, “loyo lovukile nalophendvulako.”
^ NgesiHebheru kutsi, “Intfo yesibili.”
^ Nobe “umfati wakho lowamtsatsa ngalokusemtsetfweni.”
^ NgesiHebheru kutsi, “yenhlanyelo yaNkulunkulu.”
^ NgesiHebheru kutsi, “nemoya wakho.”
^ NgesiHebheru kutsi, “yena uyayitondza.”
^ NgesiHebheru kutsi, “loyo lombonya sembatfo sakhe ngebudlova.”
