Malakhi 3:1-18
3 Jehova wemabutfo utsi: “Ngitfumela sitfunywa sami lesitawulungisa* indlela embikwami.+ Ngekushesha iNkhosi yeliciniso, leyo leniyifunako itawufika ethempelini layo;+ futsi kutawufika sitfunywa sesivumelwane, leso lenijabulako ngaso sitawufika. Nakanjani sitawufika.
2 “Kodvwa ngubani lotawubeketelela lelilanga lekufika kwaleNkhosi, futsi ngubani lotawukhona kuma nayivela? Ngobe itawufana nemlilo wemcengi nanjengensipho+ yalabawasha timphahla.
3 Itawuhlala njengalocwenga lisiliva+ futsi itawuhlanta emadvodzana aLevi; itawacwenga njengeligolide nanjengelisiliva, futsi nakanjani kuJehova atawuba bantfu labaletsa umnikelo wesipho ngekulunga.
4 Nakanjani utamjabulisa Jehova umnikelo wakaJuda newaseJerusalema, njengasemalangeni akadzeni nanjengaseminyakeni yasendvulo.+
5 “Ngitawufika ngitewunehlulela futsi ngitawufakaza ngekushesha ngalokumelene nebatsakatsi,+ tiphingi, labo labafunga emanga,+ nalabo labakhwabanisela sisebenti lesicashiwe,+ umfelokati nemntfwana*+ lote babe, kanye nalabo labangafuni kusita* sihambi.+ Bonkhe laba abakangesabi,” kusho Jehova wemabutfo.
6 “Mine nginguJehova; angishintji.*+ Nine ningemadvodzana aJakobe, kungako nisengakacotfulwa.
7 Kusukela emalangeni abokhokho benu nisukile emitsetfweni yami futsi anikayigcini.+ Buyelani kimi, nami ngitawubuyela kini,”+ kusho Jehova wemabutfo.
Kodvwa nine nitsi: “Kufanele sibuyele kanjani?”
8 “Umuntfu angamebela yini Nkulunkulu? Kodvwa nine niyangebela.”
Nine nitsi: “Sikwebele kanjani?”
“Ngekwelishumi nangeminikelo.
9 Nakanjani nine nicalekisiwe,* ngobe niyangebela, sonkhe lesive senta njalo.
10 Letsani konkhe kwelishumi encolobaneni,+ kuze kube nekudla endlini yami;+ futsi ngicela ningilinge ngaloko, kuze nibone kutsi angeke yini ngivule emagede etikhukhula tasezulwini+ ngitfululele tibusiso etikwenu kuze kube bete ngisho nendzawo yekutigcina,”+ kusho Jehova wemabutfo.
11 Jehova wemabutfo utsi: “Mine ngitawekhuta loyo lonishwabadzelako,* futsi angeke onakalise titselo letiseveni lenu, nemagilebisi lasensimini yenu angeke ahlale angatseli.”+
12 Jehova wemabutfo utsi: “Tonkhe tive titawutsi niyajabula,+ ngobe nitawuba live lenjabulo.”
13 “Emavi enu leniwasho ngalokumelene nami abe ngulamabi kakhulu,” kusho Jehova.
Futsi nine nitsite: “Sikhulume kanjani ngalokumelene nawe?”+
14 “Nine nitsite: ‘Akusiti ngalutfo kukhonta Nkulunkulu.+ Yini lesiyizuzile ngekugcina tifungo tetfu kuye nangekuhamba njengebantfu labaselusizini embikwaJehova wemabutfo?
15 Nyalo, sitsatsa bantfu labatigcabhako ngekutsi bajabulile, futsi bantfu labenta bubi bayaphumelela.+ Balinga Nkulunkulu futsi baphumelele.’”
16 Ngaleso sikhatsi, labo labesaba Jehova bakhuluma kulomunye nalomunye, nguloyo naloyo nemngani wakhe, futsi Jehova wachubeka anakile futsi alalele. Embikwakhe kwabhalwa incwadzi yesikhumbuto+ yalabo labesaba Jehova nalabo labahlale bacabangisisa* ngelibito lakhe.+
17 Jehova wemabutfo utsi: “Batawuba bami+ ngelilanga lengitawuveta ngalo imphahla yami lekhetsekile.*+ Ngitawubavela, njengendvodza nayivela indvodzana yayo lesisebenti sayo.+
18 Nitawuphindze nibone umehluko emkhatsini wemuntfu lolungile nemuntfu lomubi,+ nasemkhatsini walokhonta Nkulunkulu naloyo longamkhonti.”
Imibhalo lengentansi
^ NgesiHebheru kutsi, “sitawuvula indlela.”
^ Nobe “intsandzane.”
^ Nobe “labawaphikako emalungelo.”
^ Nobe “angikashintji.”
^ Kungaphindze kubekwe ngekutsi, “Ngesicalekiso niyangicalekisa.”
^ Kungenteka kusho sishayo setilokatane.
^ Nobe “kuzindla.” Kungaphindze kubekwe ngekutsi, “labalitsatsa njengaleliligugu.”
^ Nobe “leligugu.”
