Kulandzisa KwaMatewu 4:1-25
4 Jesu wase uholwa ngumoya waNkulunkulu wamyisa ehlane, lapho afike walingwa+ khona nguDeveli.+
2 Ngemuva kwekuzila kudla emalanga langu-40 nebusuku lobungu-40, walamba kakhulu.
3 Ngaleso sikhatsi, Develi wafika watomlinga,+ watsi kuye: “Nangabe uyindvodzana yaNkulunkulu, tjela lamatje ashintje abe tinkhwa.”
4 Kodvwa wamphendvula watsi: “Kubhaliwe kutsi: ‘Umuntfu ngeke aphile ngesinkhwa sodvwa, kodvwa uphila ngawo onkhe emavi laphuma emlonyeni waJehova.’”*+
5 Ngemuva kwaloko Develi wamyisa edolobheni lelingcwele,+ wammisa esicongweni* selithempeli.+
6 Watsi kuye: “Nangabe uyindvodzana yaNkulunkulu, tijike phansi ngobe kubhaliwe kutsi: ‘Yena utawutfuma tingilosi takhe kuwe,’ nekutsi: ‘Titakwetfwala ngetandla tato kuze lunyawo lwakho lungakhutjwa litje.’”+
7 Jesu watsi kuye: “Kubhaliwe futsi kutsi: ‘Ungabomlinga Jehova* Nkulunkulu wakho.’”+
8 Develi waphindze wamtsatsa wamyisa entsabeni lephakeme kakhulu, wamkhombisa yonkhe imibuso yemhlaba nebuhle bayo.+
9 Watsi kuye: “Tonkhe letintfo ngitakunika tona nawungaguca kanye nje ungikhonte.”
10 Jesu watsi kuye: “Hamba Sathane! Ngobe kubhaliwe kutsi: ‘Kufanele ukhotsamele Jehova* Nkulunkulu wakho,+ futsi nguye yedvwa lokufanele umkhonte.’”+
11 Ngemuva kwaloko Develi wamshiya,+ futsi tingilosi teta kuJesu tamsita.+
12 Ngesikhatsi Jesu eva kutsi Johane uboshiwe,+ wahamba waya eGalile.+
13 Ngemuva kwekusuka eNazaretha, wafike wahlala eKhaphanawume+ ngaselwandle, esifundzeni sakaZebuloni nesakaNaftali,
14 kuze kutogcwaliseka loko lokwashiwo ngumphrofethi Isaya, nakatsi:
15 “Wena Galile yebetive, wena live lakaZebuloni nelakaNaftali, leningasendleleni leya elwandle, ngesheya kweJordane,
16 bantfu lebebahleti ebumnyameni babone kukhanya lokukhulu, nekukhanya kuphumele kulabo lebebasetfuntini lekufa.”+
17 Kusukela ngaleso sikhatsi, Jesu wacala kushumayela, futsi abetsi: “Phendvukani, ngobe uMbuso wemazulu sewusondzele.”+
18 Watsi nakahamba eceleni kweLwandle LwaseGalile, wabona Simoni lobitwa ngekutsi nguPhetro,+ na-Andreya umnakabo bajika linethi elwandle, ngobe bebabadwebi.+
19 Watsi kubo: “Ngilandzeleni, ngitawunenta badwebi bebantfu.”+
20 Ngekushesha bashiya emanethi abo bamlandzela.+
21 Nakesuka lapho, wabona Jakobe naJohane+ umnakabo. Bebasesikebheni nababe wabo Zebedi, balungisa emanethi abo, futsi wababita.+
22 Ngaso leso sikhatsi bashiya sikebhe kanye nababe wabo, bamlandzela.
23 Ngemuva kwaloko, wahamba kuyo yonkhe iGalile+ afundzisa emasinagogeni+ futsi ashumayela tindzaba letimnandzi teMbuso, elapha tonkhe tifo kanye nako konkhe kugula lobekuphetse bantfu.+
24 Bantfu bakuyo yonkhe iSiriya beva ngaye, base baletsa bonkhe lebebaphetfwe tifo netinhlungu letehlukahlukene,+ lebebanemadimoni,+ lebebanesifo sekuwa+ kanye nalabebakhubatekile, futsi wabelapha.
25 Ngesizatfu saloko, sicumbi lesikhulu sebantfu samlandzela sisuka eGalile, eDekhapholi,* eJerusalema, eJudiya kanye nangesheya kweJordane.
Imibhalo lengentansi
^ Fundza Sandzisanchazo A5.
^ Nobe “endzaweni lephakeme.”
^ Fundza Sandzisanchazo A5.
^ Fundza Sandzisanchazo A5.
^ Nobe “eSifundzeni Semadolobha Langu-10.”
