Kulandzisa KwaMatewu 6:1-34
6 “Nibocaphela kutsi tintfo letinhle lenitentako anitenteli kubukisa;+ ngobe nanenta njalo, Babe wenu losemazulwini ngeke aninikete umvuzo.
2 Ngako-ke nawupha labanye,* ungamemeteli, njengobe kwenta batentisi emasinagogeni nasemigwacweni kute badvunyiswe bantfu. Ngicinisile ngitsi kini, sebavele bawutfolile umvuzo wabo.
3 Kodvwa wena nawupha labanye, ungavumeli kutsi sandla sakho sangesencele sibone loko lokwentiwa sandla sakho sangesekudla,
4 kuze nawupha ungabonwa bantfu. Babe wenu lobona asekusitsekeni utakunika umvuzo.+
5 “Nanithantaza, ningalingisi batentisi,+ ngobe batsandza kuthantaza beme emasinagogeni nasemakoneni emigwaco lemikhulu kute babonwe bantfu.+ Ngicinisile ngitsi kini, sebavele bawutfolile umvuzo wabo.
6 Kodvwa wena nawuthantaza, ngena ekamelweni lakho, uvale umnyango bese uthantaza kuBabe wakho losekusitsekeni.+ Babe wakho lobona konkhe utakunika umvuzo.
7 Nawuthantaza, ungaphindzaphindzi intfo yinye njengobe kwenta bantfu betive, ngobe bacabanga kutsi batawuviwa ngekukhuluma tintfo letinyenti.
8 Ngako ningafani nabo, ngobe Babe wenu uyatati tintfo lenitidzingako+ ngisho nobe nisengakaticeli.
9 “Ngako-ke kufanele nithantaze ngalendlela:+
“‘Babe wetfu losemazulwini, alingcweliswe* libito lakho.+
10 UMbuso wakho+ awute. Intsandvo yakho+ ayentiwe emhlabeni njengasezulwini.+
11 Sicela usiphe sinkhwa setfu salamuhla,+
12 usitsetselele tono tetfu,* njengobe natsi sibatsetselela labasonako.*+
13 Ungasingenisi ekulingweni,+ kodvwa usikhulule* kulomubi.’+
14 “Ngobe nangabe nitsetselela labanye tono tabo, naBabe wenu losezulwini utanitsetselela;+
15 kodvwa nangabe ningabatsetseleli labanye tono tabo, naBabe wenu losezulwini ngeke anitsetselele tono tenu.+
16 “Nanizila kudla,+ ningalingisi batentisi ngekutenta labadzabukile. Abayinaki imitimba yabo, ngobe basuke bafuna bantfu babone kutsi bazilile.+ Ngicinisile ngitsi kini, sebavele bawutfolile umvuzo wabo.
17 Kepha wena nawuzila kudla, gcobisa inhloko yakho, ugeze nebuso bakho
18 kuze bantfu bangaboni kutsi uzilile, kodvwa ubonwe nguBabe wakho losekusitsekeni. Babe wakho lobona konkhe utakunika umvuzo.
19 “Ningatibekeli umcebo emhlabeni,+ lapho umvunya nekutfomba kungawudla khona, nalapho emasela angagcekeza khona awebe.
20 Kodvwa tibekeleni umcebo ezulwini,+ lapho umvunya nekutfomba kungeke kuwudle khona,+ nalapho emasela angeke agcekeze khona awebe.
21 Ngobe lapho kunemcebo wakho khona, kulapho nenhlitiyo yakho itawuba khona.
22 “Sibane semtimba liso.+ Ngako-ke nangabe liso lakho libuke intfo yinye,* umtimba wakho wonkhe utawukhanya.*
23 Kodvwa nangabe liso lakho libukhali,*+ umtimba wakho wonkhe ngeke ukhanye. Nangabe kukhanya lokukuwe kubumnyama, lobo bumnyama butawuba bukhulu kakhulu.
24 “Kute umuntfu longasebentela emakhosi lamabili, ngobe utawutondza lenye atsandze lelenye,+ nobe ahloniphe lenye edzelele lelenye. Ngeke nikhonte Nkulunkulu kanye nemcebo.+
25 “Ngako-ke ngitsi kini, ningakhatsateki+ ngekuphila kwenu mayelana nekutsi nitawudlani, nekutsi nitawunatsani, futsi ningakhatsateki ngemitimba yenu mayelana nekutsi nitawugcokani.+ Kuphila akukabaluleki yini kwendlula kudla, nemtimba awukabaluleki yini kwendlula timphahla?+
26 Nakisisani tinyoni;+ atilimi, ativuni futsi tite netinyango. Kodvwa Babe wenu losezulwini uyatondla. Nine anikabaluleki yini kwendlula tona?
27 Ukhona yini kini longatsi ngekukhatsateka kwakhe engete umzuzu* nje ekuphileni kwakhe?+
28 Nitikhatsatelani ngekutsi nitawugcokani? Fundzani endleleni timbali tesiganga letikhula ngayo; atikhandleki, futsi atitfungi;
29 kodvwa ngiyanitjela ngitsi, naSolomoni+ ebukhatikhatini bakhe abengagcoki njengato.
30 Ngako nangabe Nkulunkulu atembatsisa ngalendlela timbali tesiganga, letikhona lamuhla bese kusasa tiyahhohloka, ngeke yini anembatsise nine leninekukholwa lokuncane?
31 Ngako-ke ningacali nikhatsateke+ nitsi: ‘Sitawudlani?’ nobe ‘Sitawunatsani?’ nobe ‘Sitawugcokani?’+
32 Ngobe tonkhe letintfo ngito bantfu betive labatifuna kakhulu. Babe wenu losezulwini uyati kutsi niyatidzinga.
33 “Ngako-ke chubekani nifuna kucala uMbuso waNkulunkulu nekulunga kwakhe, futsi tonkhe leletinye tintfo nitawunikwa tona.+
34 Ningacali nikhatsateke ngelilanga lelilandzelako,+ ngobe nalo litawuba netinkinga talo. Nakani tinkinga talamuhla kuphela.
Imibhalo lengentansi
^ Nobe “nawupha labeswele.” Fundza Tinchazelo Temagama.
^ Nobe “alitsatfwe njengalelingcwele; aliphatfwe njengalelingcwele.”
^ NgesiGriki kutsi, “tikweleti tetfu.”
^ NgesiGriki kutsi, “labasikweletako.”
^ Nobe “usisindzise.”
^ Nobe “libona kahle.” NgesiGriki kutsi, “limelula.”
^ Nobe “utawukhanya bha!”
^ NgesiGriki kutsi, “lilibi; likhohlakele.”
^ NgesiGriki kutsi, “likhyubhitha.” Fundza Sandzisanchazo B14.
