Nahume 1:1-15
1 Lona ngumlayeto lomelene neNineve:+ Lena yincwadzi lekhuluma ngembono waNahume* um-Elkhoshi:
2 Jehova unguNkulunkulu lofuna sikhonte yena yedvwa+ futsi uyaphindzisela;Jehova uyaphindzisela futsi ukulungele kuveta intfukutselo yakhe.+
Jehova uyatiphindziselela etitseni takhe,Futsi uhlale atitfukutselele titsa takhe.
3 Jehova uyephuta kutfukutsela+ futsi unemandla lamakhulu,+Kodvwa Jehova angeke ahlale angabajezisi labo labanelicala.+
Indlela yakhe isemoyeni lobhubhisako nasesivunguvungwini,Futsi emafu anjengelutfuli etinyaweni takhe.+
4 Yena wekhuta lwandle+ aphindze alomise;Futsi yonkhe imifula uyayomisa.+
Tikhotsa* taseBhashani netaseKhameli tiyabuna;+Netimbali taseLebanoni tiyabuna.
5 Tintsaba tiyatamatama ngenca yakhe,Nemagcuma ayancibilika.+
Umhlaba utawuphatamiseka ngenca yebuso bakhe,Kanye nalo lonkhe live nabo bonkhe labahlala kulo.+
6 Ngubani longamelana nentfukutselo yakhe?+
Futsi ngubani longamelana nelulaka lwakhe lolwesabekako?+
Intfukutselo yakhe itawutfululeka njengemlilo,Nemadvwala atawuchekeka ngenca yakhe.
7 Jehova ulungile,+ usiphephelo ngemalanga ekucindzeteleka.+
Uyabanaka* labo labafuna siphephelo kuye.+
8 Ngesikhukhula lesitsanyela konkhe, utayicedza ngalokuphelele iNineve,*Titsa takhe titawubhekana nebumnyama.
9 Yini longayenta lemelene naJehova?
Utakucotfula ngalokuphelele.
Angeke kudzingeke aphindze akubhubhise.+
10 Bahlanganiswe njengemanyeva,Futsi banjengebantfu labadzakwe tjwala;*Kodvwa batawucedvwa njengetinhlanga letomisiwe.
11 Kuwe kutawuphuma umuntfu lohlela emacebo lamabi ngalokumelene naJehova,Lonika seluleko lesingenamsebenti.
12 Naku lokushiwo nguJehova:
“Ngisho nobe bebanemandla lamakhulu futsi babanyenti,Batawuncunywa futsi bahlaselwe.
Ngikucindzetele,* kodvwa angeke ngisaphindze ngikucindzetele.
13 Nyalo ngitawephula lijoka futsi ngilisuse kuwe,+Futsi ngitawudzabula tinketane loboshwe ngato etandleni tibe ticucu letimbili.
14 Jehova unikete nangu umyalo mayelana nawe,*‘Libito lakho angeke lichubeke latiwa.
Ngitaticedza nya tithico letibatiwe netithico tensimbi* letisendlini* yabonkulunkulu bakho.
Ngitakwakhela lithuna, ngobe uyenyanyeka.’
15 Bukani etintsabeni tinyawo taloyo loletsa tindzaba letimnandzi!
Loyo lomemetela kuthula.+
Gubhani imikhosi yenu,+ awu nine bakaJuda, gcinani tifungo tenu,Ngobe umuntfu longenamsebenti angeke aphindze endlule emkhatsini wenu.
Utawubhujiswa ngalokuphelele.”
Imibhalo lengentansi
^ Lokusho kutsi “Umdvudvuti.”
^ Nobe “Konkhe lokumilako.”
^ Nobe “Uyabanakekela.” NgesiHebheru kutsi, “Uyabati.”
^ NgesiHebheru kutsi, “indzawo yayo.”
^ Nobe “tjwala bemabele.”
^ Lokusho, sive sakaJuda.
^ Lokusho, i-Asiriya.
^ Nobe “tithico tensimbi lencibilikisiwe.”
^ Nobe “letisethempelini.”
