Ruthe 2:1-23
2 Nawomi abenesihlobo sasemndenini wendvodza yakhe lebesinjinge kakhulu, libito laso kunguBhowazi.+ Bhowazi abevela emndenini wakubo-Elimeleki.
2 Ruthe umMowabi watsi kuNawomi: “Ngicela kuhamba ngiye emasimini, ngiyobutsa+ ematimba alokutinhlavu latawusala kunobe ngubani lotangentela umusa.” Ngako Nawomi watsi kuye: “Hamba ndvodzakati yami.”
3 Ruthe wahamba futsi wacala kubutsa lokusele emasimini ngemuva kwebavuni. Angati, wangena ensimini yaBhowazi,+ lobekavela emndenini wakubo-Elimeleki.+
4 Ngaso leso sikhatsi, kwefika Bhowazi esuka eBhetlehema futsi watsi kulabavuni: “Jehova akabe nani.” Bona bamphendvula batsi: “Jehova akakubusise.”
5 Ngemuva kwaloko Bhowazi wabuta lijaha lebelengamele labavuni watsi: “Uvela emndenini wabani lomakoti?”
6 Lelijaha lebelengamele bavuni latsi: “Lona ngumakoti longumMowabi+ lobuye naNawomi eveni lakaMowabi.+
7 Ufike watsi: ‘Ngicela kubutsabutsa+ ematimba* alokutinhlavu lasajutjiwe lasele kulaba labavunako.’ Ngako bekasolo asebenta kusukela nakefika ekuseni, nyalo usahleti emtfuntini kuze aphumule kancane.”
8 Bhowazi wabese utsi kuRuthe: “Lalela ndvodzakati yami. Ungayi kulenye insimu uyobutsa lokusele futsi ungahambi uye kulenye indzawo; hlala usedvute netincekukati tami.+
9 Ubobukisisa kutsi nguyiphi insimu labayivunako, bese uhamba nabo. Lamajaha ngiwatjele kutsi angakutsintsi.* Nangabe sewomile, ubokuya kuletimbita temanti unatse lamanti lakhiwe ngulamajaha.”
10 Nakeva loko Ruthe waguca watsintsa ngebuso phansi wakhotsama, wabese utsi kuBhowazi: “Kwenteke kanjani kutsi ngitfole umusa emehlweni akho, futsi kwentiwe yini kutsi unginake ngibe ngingumuntfu wekuhamba?”+
11 Bhowazi wamphendvula watsi: “Ngivile ngako konkhe lokwentele maketala wakho ngemuva kwekushona kwendvodza yakho, ngeva nekutsi washiya batali bakho kanye nelive letihlobo takho kuze uye kubantfu lobewungabati.+
12 Shengatsi Jehova angakubusisa ngaloko lokwentile,+ futsi shengatsi ungatfola umvuzo lophelele kuJehova Nkulunkulu wema-Israyeli, loyo lokhosele ngephansi kwemaphiko akhe.”+
13 Ngako Ruthe watsi: “Shengatsi ngingatfola umusa emehlweni akho nkhosi yami, ngobe uyidvudvutile waphindze wayikhutsata* incekukati yakho ngisho nobe ngingasiso nesisebenti sakho.”
14 Nase kusikhatsi sekudla, Bhowazi watsi kuye: “Wota lapha utokudla sinkhwa futsi usicobhote kuviniga.” Ngako Ruthe wahlala phansi eceleni kwebavuni. Bhowazi wase umniketa lokutinhlavu lokugayingiwe, futsi wadla waze wesutsa, kwaba khona nalokusalako.
15 Ngesikhatsi Ruthe asukuma kute ayobutsa+ lokusele emasimini, Bhowazi watsi kulamajaha: “Mvumeleni kutsi abutse ngisho nematimba* alokutinhlavu lasajutjiwe, futsi ningamphatsi kabi.+
16 Nibociniseka nekutsi nimkhiphela lamanye ematimba alokutinhlavu kuletitfungo, bese nimshiyela wona ngemuva kuze awabutse, futsi ningasho lutfo lolutamvimba.”
17 Ngako Ruthe wachubeka abutsa lokusele kulensimi kwaze kwaba nguntsambama.+ Watsi nakabhula loko lebekakubutsile, watfola kutsi yibhali lengaba ngemakhilogremu langu-13.*
18 Wabese uyakutsatsa uya edolobheni, futsi maketala wakhe wakubona loko lebekakubutsile. Wakhipha nalokudla lobekusele+ ngalesikhatsi asadle wesutsa, wakunika maketala wakhe.
19 Ngemuva kwaloko maketala wakhe wambuta watsi: “Bewubutsa ngakuphi lamuhla, futsi bewusebentela kuphi? Shengatsi angabusiswa loyo lokwentele umusa.”+ Ngako Ruthe watjela maketala wakhe ngaloyo lebekasebenta emasimini akhe, watsi: “Libito lalendvodza lebengisebenta emasimini ayo lamuhla nguBhowazi.”
20 Nakeva loko, Nawomi watsi kumalukatane wakhe: “Shengatsi loyo muntfu angatfola sibusiso kuJehova, longakayekeli kubentela umusa* labaphilako nalabafile.”+ Wachubeka watsi: “Lendvodza isihlobo setfu.+ Ingulomunye walabo labanelilungelo lekusihlenga.”*+
21 Ruthe umMowabi wabese utsi: “Lendvodza iphindze yatsi kimi: ‘Hlala usedvute naletinceku tami letisetinsha kuze kube ngulapho seticedze wonkhe umsebenti wekuvuna.’”+
22 Nawomi watsi kuRuthe, longumalukatane wakhe: “Ndvodzakati yami, kuncono kutsi uhambe naletincekukati tayo kunekutsi uhlushwe kulenye insimu.”
23 Ngako Ruthe wahlala asedvute naletincekukati taBhowazi futsi wabutsa lokusele emasimini kwaze kwaba ngulapho siphela sikhatsi sekuvunwa kwebhali+ nesikhatsi sekuvunwa kwakolo. Wachubeka ahlala namaketala wakhe.+
Imibhalo lengentansi
^ Kungaphindze kubekwe ngekutsi, “titfungo.”
^ Nobe “angakuphatamisi.”
^ NgesiHebheru kutsi, “wakhuluma enhlitiyweni yencekukati yakho.”
^ Kungaphindze kubekwe ngekutsi, “netitfungo.”
^ NgesiHebheru kutsi, “lengaba li-efa.” Fundza Sandzisanchazo B14.
^ Nobe “lutsandvo lolucotfo.”
^ Nobe “Ingulesinye setihlobo tetfu lesinelilungelo lekusitsenga (lekusihlenga).” Fundza Tinchazelo Temagama.
