Sembulo Lesembulelwa Johane 12:1-17
12 Ngemuva kwaloko kwaba nesibonakaliso lesikhulu ezulwini, kwabonakala umfati+ embetse lilanga, bekunenyeti ngephansi kwetinyawo takhe, nasenhloko yakhe bekunemchele wetinkhanyeti letingu-12,
2 futsi bekakhulelwe. Bekakhaliswa buhlungu nayimihelo yekubeleka.
3 Kwaphindze kwaba nalesinye sibonakaliso ezulwini. Kwabonakala drago lomkhulu,*+ lobovu njengemlilo, lonetinhloko letingu-7 netimphondvo letingu-10, kuletinhloko takhe kunemichele* lengu-7;
4 umsila wakhe udvonsa incenye yesitsatfu yetinkhanyeti+ tasezulwini, futsi utijika emhlabeni.+ Lodrago bekasolo eme ngakulomfati+ lobesekatawubeleka, kuze kutsi nakabeleka ashwabadzele lomntfwana.
5 Wabeleka indvodzana,+ umntfwana lomdvuna lobekatawelusa tonkhe tive ngentfonga yensimbi.+ Lomntfwana wakhe wahlwitfwa wayiswa kuNkulunkulu lobekahleti esihlalweni sebukhosi.
6 Lomfati wabaleka waya ehlane, lapho Nkulunkulu amlungisela khona indzawo, futsi bekatawondliwa khona emalanga langu-1 260.+
7 Kwesuka imphi ezulwini: Mikhayeli*+ netingilosi takhe balwa nadrago, drago anetingilosi takhe naye walwa,
8 kodvwa drago netingilosi takhe abazange bancobe,* futsi abazange basaba nendzawo ezulwini.
9 Ngako wajikijelwa phansi drago lomkhulu,+ inyoka yekucala,+ lobitwa ngekutsi nguDeveli+ nangekutsi nguSathane,+ lodukisa umhlaba wonkhe;+ wajikijelwa phansi emhlabeni,+ netingilosi takhe tajikijelwa phansi kanye naye.
10 Ngeva livi lelikhulu ezulwini litsi:
“Nyalo seyifikile insindziso,+ emandla, neMbuso waNkulunkulu wetfu+ kanye neligunya laKhristu wakhe, ngobe sewujikijelwe phansi ummangaleli webanaketfu, lobamangalela busuku nemini embikwaNkulunkulu wetfu!+
11 Bamncoba+ ngemandla engati yeliWundlu+ nangemlayeto lebebawumemetela,+ bebangesabi nekulahlekelwa kuphila* kwabo+ ngisho nalapho babhekene nekufa.
12 Ngako jabulani nine mazulu nani lenihlala kuwo! Maye ngemhlaba nangelwandle,+ ngobe Develi wehlele kini atfukutsele kakhulu, ati kutsi unesikhatsi lesincane.”+
13 Ngesikhatsi drago abona kutsi ujikijelwe phansi emhlabeni,+ wamphatsa kabi lomfati+ lowabeleka lomntfwana lomdvuna.
14 Kodvwa lomfati wanikwa timphiko letimbili telusweti+ lolukhulu kuze andize aye ehlane, endzaweni latawondliwa kuyo sikhatsi, tikhatsi, nehhafu yesikhatsi,*+ khashane nalenyoka.+
15 Lenyoka yakhipha emanti lanjengemfula emlonyeni wayo ngemuva kwalomfati kuze amite kuwo.
16 Kepha umhlaba wamsita lomfati, wavula umlomo wawo wagwinya lomfula lowaphuma emlonyeni wadrago.
17 Drago wamtfukutselela kakhulu, futsi waphuma wayokulwa nalabo labasele bentalelwane*+ yalomfati, labagcina imiyalo yaNkulunkulu nalabanemsebenti wekufakaza ngaJesu.+
Imibhalo lengentansi
^ Nobe “inyoka lenkhulu.”
^ Nobe “imichele yasebukhosini.”
^ Lokusho kutsi “Ngubani LonjengaNkulunkulu?”
^ Kungaphindze kubekwe ngekutsi, “kodvwa drago akazange ancobe.”
^ NgesiGriki kutsi, “bebangayitsandzi imiphefumulo.” Fundza Tinchazelo Temagama.
^ Lokusho, tikhatsi letintsatfu nehhafu.
^ NgesiGriki kutsi, “benhlanyelo.”
