Sembulo Lesembulelwa Johane 15:1-8
15 Ngabona lesinye sibonakaliso ezulwini, lesikhulu futsi lesimangalisako, bekunetingilosi letingu-7+ tiphetse tishayo letingu-7. Leti tishayo tekugcina, ngobe ngato intfukutselo yaNkulunkulu itawuphela.+
2 Ngabona nalobekunjengelwandle loluyingilazi+ luhlangene nemlilo, ngabona nalabo labancobe+ lesilwane sesiganga, nemfanekiso waso+ kanye nenombolo yelibito laso.+ Bebeme ngakulolwandle loluyingilazi baphetse emahabhu aNkulunkulu.
3 Bebahlabela ingoma yaMosi+ inceku yaNkulunkulu nengoma yeliWundlu+ batsi:
“Mikhulu futsi iyamangalisa imisebenti yakho,+ Jehova* Nkulunkulu, Somandla.+ Tilungile futsi tiliciniso tindlela takho,+ Nkhosi yaphakadze.+
4 Ngubani longeke akwesabe Jehova,* akhatimulise nelibito lakho, ngobe nguwe wedvwa lowetsembekile?+ Tonkhe tive titawuta tikhonte embikwakho,+ ngobe imitsetfo yakho lelungile seyembuliwe.”
5 Ngemuva kwaletintfo ngabona indzawo lengcwele yelithende lebufakazi+ ivulekile ezulwini,+
6 letingilosi letingu-7 letiphetse letinhlupho letingu-7+ taphuma kulendzawo lengcwele, tembetse ilineni lehlantekile futsi lekhanyako, tibophe nemabhande eligolide etifubeni tato.
7 Lesinye setidalwa letine letiphilako sanika letingilosi letingu-7 titja teligolide letingu-7, lebetigcwele intfukutselo yaNkulunkulu+ lophila phakadze naphakadze.
8 Lendzawo lengcwele yagcwala intfutfu ngenca yenkhatimulo nemandla aNkulunkulu,+ futsi kute lowakwati kungena kuyo kwaze kwaphela letinhlupho letingu-7+ lebetiphetfwe nguletingilosi letingu-7.
