Sembulo Lesembulelwa Johane 21:1-27
21 Ngabona lizulu lelisha nemhlaba lomusha;+ ngobe lizulu lelidzala nemhlaba lomdzala sekwendlulile,+ nelwandle+ alusekho.
2 Ngabona lidolobha lelingcwele, lokuyiJerusalema Lensha, lehla ezulwini livela kuNkulunkulu,+ lilungiswe njengamakoti ahlotjiselwe umkhwenyane.+
3 Ngemuva kwaloko ngeva livi lelikhulu livela esihlalweni sebukhosi litsi: “Nalo lithende laNkulunkulu likanye nebantfu, Nkulunkulu uyawuhlala nabo, bona babe bantfu bakhe, futsi Nkulunkulu uyawuba nabo.+
4 Uyakwesula tonkhe tinyembeti emehlweni abo,+ kufa ngeke kusaba khona,+ futsi kulila, nekukhala kanye nebuhlungu ngeke kusaba khona.+ Tintfo letindzala setendlulile.”
5 Loyo lohleti esihlalweni sebukhosi+ watsi: “Ngenta tonkhe tintfo tibe tinsha.”+ Waphindze watsi: “Bhala ngobe lamavi etsembekile futsi aliciniso.”
6 Wabuye watsi kimi: “Sekwentekile! Mine ngingu-Alfa na-Omega,* sicalo nesiphetfo.+ Nobe ngubani lowomile ngitamnatsisa mahhala emtfonjeni wemanti ekuphila.+
7 Wonkhe umuntfu loncobako utatitfola letintfo, mine ngitawuba nguNkulunkulu wakhe, yena abe yindvodzana yami.
8 Kodvwa emagwala, labangakholwa,+ labenyanyekako ngenca yekungcola kwabo, babulali,+ tingwadla,*+ labasebentelana nemimoya, labakhonta tithico, nabo bonkhe labacamba emanga+ batawujikwa echibini lelivutsa umlilo nesibabule.+ Loku kusho kufa kwesibili.”+
9 Lenye yetingilosi letingu-7 lebetiphetse titja letingu-7 letatigcwele tishayo letingu-7 tekugcina,+ yeta kimi yatsi: “Wota ngitokukhombisa makoti, umfati weliWundlu.”+
10 Ngako yangitsatsa ngemandla emoya yangiyisa entsabeni lenkhulu futsi lephakeme, yafike yangikhombisa lidolobha lelingcwele, lokuyiJerusalema, lelidolobha belehla ezulwini livela kuNkulunkulu,+
11 futsi linenkhatimulo yaKhe.+ Kukhanya kwalo bekufana nelitje leliligugu kakhulu, njengelitje lejasiphi lelicwebetelisa kwekristalu.+
12 Belinelubondza lolukhulu futsi loluphakeme kanye nemagede langu-12, kulamagede bekunetingilosi letingu-12, kuwo kubhalwe emabito etive letingu-12 temadvodzana a-Israyeli.
13 Emphumalanga bekunemagede lamatsatfu, enyakatfo bekunemagede lamatsatfu, eningizimu bekunemagede lamatsatfu, kantsi nasenshonalanga bekunemagede lamatsatfu.+
14 Lolubondza lwalelidolobha beluphindze lube nematje esisekelo langu-12, kuwo bekubhalwe emabito langu-12 ebaphostoli+ beliWundlu labangu-12.
15 Lona lobekakhuluma nami bekaphetse umhlanga weligolide kuze akale lelidolobha, nemagede alo kanye nelubondza lwalo.+
16 Lelidolobha belisikwele, budze balo bebulingana nebubanti balo. Walikala ngalomhlanga, belingemakhilomitha langaba ngu-2 200;* budze, bubanti kanye nekuphakama kwalo bekulingana.
17 Wakala nelubondza lwalo, belutinyatselo letingu-144* nalukalwa ngesikali semuntfu, lebesifana nesikali sengilosi.
18 Lolubondza belwakhiwe ngejasiphi,+ nalelidolobha liligolide lelicwebetela njengengilazi lokubonakala ngale kwayo.
19 Tisekelo telubondza lwalelidolobha betihlotjiswe ngayo yonkhe inhlobo yematje laligugu: sisekelo sekucala besiyijasiphi, sesibili siyisafire, sesitsatfu siyikhalkedoni, sesine sisimaragidu,
20 sesihlanu siyisadoniksi, sesitfupha siyisadiyu, sesi-7 siyikhrisolithe, sesi-8 siyibherili, sesi-9 siyithophazi, sesi-10 siyikhrisophrasi, sesi-11 siyihiyakinte, kantsi sesi-12 siyi-amethiste.
21 Lamagede langu-12 bekangemapharele langu-12; ligede ngalinye belentiwe ngelipharele linye. Umgwaco lomkhulu walelidolobha bewuligolide lelicwebetela njengengilazi lokubonakala ngale kwayo.
22 Kute lithempeli lengalibona kulelidolobha, ngobe Jehova* Nkulunkulu Somandla+ kanye neliWundlu balithempeli lalo.
23 Lelidolobha alilidzingi lilanga nobe inyeti kutsi kulikhanyisele, ngobe inkhatimulo yaNkulunkulu ilikhanyisele,+ nesibane salo liWundlu.+
24 Tive titawuhamba ekukhanyeni+ kwalelidolobha, nemakhosi emhlaba atalikhatimulisa.
25 Emagede alo ngeke avalwe sanhlobo emini, ngobe kutawuba bete busuku.+
26 Kulo kutawuletfwa inkhatimulo neludvumo lwetive.+
27 Nobe yini lengcolile, nanobe ngubani lowenta lokwenyanyekako nalokhohlisako ngeke aze angene kulo;+ kutawungena kuphela labo lababhalwe kulomculu wekuphila weliWundlu.+
Imibhalo lengentansi
^ Nobe “ngingu-A na-Z.” Alfa luhlavu lwekucala, futsi Omega luhlavu lwekugcina elulwimini lwesiGriki.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ NgesiGriki kutsi, “belingemastadiya langu-12 000.” Stadiya sisinye besilingana nemamitha langu-185. Fundza Sandzisanchazo B14.
^ NgesiGriki kutsi, “belungemakhyubhitha langu-144.” Fundza Sandzisanchazo B14.
^ Fundza Sandzisanchazo A5.
