Sembulo Lesembulelwa Johane 6:1-17
-
LiWundlu livula timphawu tekucala letisitfupha (1-17)
-
Loyo loncobako ugibele lihhashi lelimhlophe (1, 2)
-
Logibele lihhashi lelinembala lobovu njengemlilo ususa kuthula (3, 4)
-
Logibele lihhashi lelimnyama uletsa indlala (5, 6)
-
Logibele lihhashi lelihhwabile ubitwa ngeligama lelitsi Kufa (7, 8)
-
Labo lababulawa bangephansi kweli-al’thare (9-11)
-
Kutamatama lokukhulu kwemhlaba (12-17)
-
6 Ngabona ngesikhatsi liWundlu+ livula lunye lwaletimphawu letingu-7,+ futsi ngeva lesinye saletidalwa letine letiphilako+ sikhuluma ngelivi lelinjengekudvuma kwelitulu sitsi: “Wota!”
2 Ngatsi nangibuka ngabona lihhashi lelimhlophe,+ loyo lobekaligibele bekaphetse butjoki; wanikwa umchele,+ futsi wahamba ancoba, ayocedzela nekuncoba kwakhe.+
3 Latsi nalivula luphawu lwesibili, ngeva sidalwa lesiphilako sesibili+ sitsi: “Wota!”
4 Kwaphuma lelinye lihhashi lelinembala lobovu njengemlilo, futsi lobekaligibele wavunyelwa kutsi asuse kuthula emhlabeni kuze bantfu babulalane bodvwa, wanikwa nenkemba lenkhulu.+
5 Nalivula luphawu lwesitsatfu,+ ngeva sidalwa lesiphilako sesitsatfu+ sitsi: “Wota!” Ngatsi nangibuka ngabona lihhashi lelimnyama; lobekaligibele bekaphetse sikali esandleni sakhe.
6 Ngeva lobekunjengelivi emkhatsini waletidalwa letine letiphilako kutsi: “Ilitha* yakolo ngadenariyo,*+ nemalitha lamatsatfu ebhali ngadenariyo; ungawadlabhatisi emafutsa emncumo kanye neliwayini.”+
7 Nalivula luphawu lwesine, ngeva livi lesidalwa lesiphilako sesine+ litsi: “Wota!”
8 Ngatsi nangibuka ngabona lihhashi lelihhwabile; lobekaligibele bekaneligama lelitsi Kufa. LiThuna* belimlandzela edvute. Loku kwanikwa ligunya ngetulu kwencenye yesine yemhlaba, kuze kubulale ngenkemba lendze, ngendlala,+ ngesifo lesingumshayabhuce, nangetilwane tesiganga letisemhlabeni.+
9 Latsi nalivula luphawu lwesihlanu, ngabona ngephansi kweli-al’thare+ imiphefumulo*+ yalabo lababulawa ngenca yelivi laNkulunkulu nangenca yekuniketa bufakazi.+
10 Yamemeta ngelivi lelikhulu yatsi: “Nkhosi Lephakeme, lengcwele naleliciniso,+ kutawuze kube ngunini solo ungehluleli futsi ungayiphindziseleli ingati yetfu kulabo labahlala emhlabeni?”+
11 Ngulowo nalowo mphefumulo wanikwa ingubo lendze lemhlophe;+ yatjelwa nekutsi ilindze sikhashana kuze kube ngulapho kuphelela linani letinceku letikanye nayo nelebazalwane bayo, lebebasetawubulawa njengayo.+
12 Ngabona ngesikhatsi livula luphawu lwesitfupha, futsi kwaba khona kutamatama lokukhulu kwemhlaba; lilanga laba mnyama njengendvwangu yelisaka leyentiwe ngeboya,* nenyeti yaba njengengati,+
13 tinkhanyeti tasezulwini tawela emhlabeni njengalapho emakhiwa langakavutfwa ahhohloka esihlahleni sawo nakuhhusha umoya lomkhulu.
14 Lizulu lasuka njengemculu nawugocotwa,+ nato tonkhe tintsaba netihlenge tasuswa etindzaweni tato.+
15 Ngemuva kwaloko, emakhosi emhlaba, tikhulu, tindvuna temphi, tinjinga, bantfu labanemandla, tonkhe tigcili nabo bonkhe labakhululekile babhaca emigedzeni nasemadvwaleni lasetintsabeni.+
16 Bebasolo batsi kuletintsaba nakulamadvwala: “Welani etikwetfu,+ nisifihle ebusweni baLoyo lohleti esihlalweni sebukhosi+ naselulakeni lweliWundlu,+
17 ngobe lilanga lelikhulu lelulaka lwabo selifikile,+ ngubani longakhona kuma?”+
Imibhalo lengentansi
^ NgesiGriki kutsi, “I-quart.” Fundza Sandzisanchazo B14.
^ Lolu luhlavu lwelisiliva lwemali yemaRoma lebelilingana nemholo welilanga. Fundza Sandzisanchazo B14.
^ NgesiGriki kutsi, “iHayidesi,” lokusho lithuna lebantfu. Fundza Tinchazelo Temagama.
^ Kushiwo ingati yabo leyatfululwa e-al’thare. Fundza Tinchazelo Temagama.
^ Kungenteka beyentiwe ngeboya bembuti.
