Taga 14:1-35
14 Umfati lohlakaniphe mbamba uyawakha umuti wakhe,+Kodvwa losilima uwubhidlita ngetandla takhe.
2 Umuntfu lohamba ngendlela lelungile wesaba Jehova,Kodvwa umuntfu lohamba ngetindlela letikhohlakele* wedzelela Nkulunkulu.
3 Kutigcabha lokubonakala emavini esilima kunjengemzaca,Kodvwa umuntfu lohlakaniphile uvikelwa ngumlomo wakhe.
4 Nakute tinkhomo, indzawo letidlela kuyo iyahloba,Kodvwa emandla enkunzi enta kutsi kube nesivuno lesikhulu.
5 Fakazi lowetsembekile akawacali emanga,Kodvwa fakazi longaketsembeki uhlale akhuluma emanga.+
6 Umuntfu lowedzelelako ufuna kuhlakanipha kodvwa angakutfoli,Kepha umuntfu lonekucondza ulutfola kamelula lwati.+
7 Ungatihlanganisi nesilima,Ngobe kute ngisho naloluncane lwati lotalutfola kuso.+
8 Kuhlakanipha kwenta umuntfu lohlakaniphile ayicondze indlela lahamba ngayo,Kodvwa silima siyengwa* bulima baso.+
9 Tilima tiyahleka ngisho tonile,+Kodvwa labacotfo bahlale bakulungele kucolelana nalabanye.
10 Inhlitiyo ngiyo leyati buhlungu lebuvako,Futsi kute umuntfu longacondza injabulo lenayo.
11 Indlu yalomubi itawubhidlitwa,+Kodvwa lithende lalolungile litawuba likhulu.
12 Umuntfu ubona indlela acabange kutsi ikahle,+Kani ekugcineni iholela ekufeni.+
13 Umuntfu angahleka ngisho inhlitiyo yakhe ibuhlungu,Futsi kujabula kungashintja kube lusizi.
14 Umuntfu lonenhlitiyo lekhohlakele utawutfola umphumela wendlela laphila ngayo,+Kodvwa lonesimilo lesihle utawutfola umvuzo wetento takhe.+
15 Umuntfu lote lwati wetsemba konkhe lakuvako,Kodvwa lohlakaniphile uyacabangisisa ngako konkhe lakwentako.+
16 Umuntfu lohlakaniphile uhlala acaphile futsi uyakubalekela lokubi,Kodvwa silima asinendzaba* futsi sitetsemba kakhulu.
17 Umuntfu losheshe atfukutsele wenta tintfo letibulima,+Kodvwa umuntfu locabangisisako* ngetento takhe uyenyanywa.
18 Bantfu labete lwati batawuba tilima,Kodvwa labahlakaniphile batawuniketwa lwati, lube ngumchele wabo.+
19 Bantfu labenta lokubi batawukhotsamela bantfu labenta lokuhle,Futsi lababi batawukhotsama emagedeni alabalungile.
20 Umuntfu loweswele wenyanywa ngisho nabantfu labasondzelene naye,+Kodvwa umuntfu lonjingile unebangani labanyenti.+
21 Umuntfu lowedzelela lomunye uyona,Kodvwa uyajabula loyo lovela loweswele.+
22 Bantfu labahlose lokubi batawuduka,Kodvwa labetama kwenta lokuhle batawentelwa umusa* futsi baphatfwe ngekwetsembeka.+
23 Konkhe kusebenta kamatima kunemvuzo,Kodvwa kutsandza kukhuluma lite kwenta umuntfu eswele.+
24 Umcebo ungumchele walabahlakaniphile;Kodvwa tintfo letentiwa tilima tichubeka tibe bulima kakhulu.+
25 Fakazi lowetsembekile uyakusindzisa kuphila,Kodvwa fakazi lokhohlisako uhlale akhuluma emanga.
26 Umuntfu lowesaba Jehova umetsemba kuko konkhe,+Futsi emadvodzana emuntfu lonjalo atawutfola indzawo yekukhosela.+
27 Kwesaba Jehova kungumtfombo wekuphila,Ngobe kusita umuntfu kutsi abalekele tingibe tekufa.
28 Inkhosi iyahlonipheka nayibusa bantfu labanyenti,+Kodvwa umbusi lote bantfu lababusako akasilutfo.
29 Umuntfu lowephutako kutfukutsela uhlakaniphe mbamba,+Kodvwa lote sineke ububeka ebaleni bulima bakhe.+
30 Inhlitiyo lenekuthula iyawuphilisa umtimba,Kodvwa umona unjengesifo lesibolisa ematsambo.+
31 Loyo locindzetela umuntfu lophuyile wetfuka uMdali wakhe,+Kodvwa lophatsa kahle lophuyile udvumisa Nkulunkulu.+
32 Umuntfu lomubi utawuwiswa bubi bakhe,Kodvwa lolungile utawuvikeleka ngenca yebucotfo bakhe.+
33 Kuhlakanipha kuhlala enhlitiyweni yemuntfu lonekucondza,+Kodvwa silima sihamba sikhuluma nje sicabanga kutsi sihlakaniphile.
34 Kulunga kuyasiphakamisa sive,+Kodvwa sono silihlazo kubantfu.
35 Inkhosi iyasitsandza sisebenti lesenta tintfo ngekucondza,+Kodvwa iyasitfukutselela sisebenti lesiyihlazako.+
Imibhalo lengentansi
^ Nobe “letigwegwile.”
^ Kungaphindze kubekwe ngekutsi, “silima siyenga labanye.”
^ Nobe “sihlale sitfukutsele.”
^ Nobe “losebentisa kahle ingcondvo.”
^ Nobe “lutsandvo lolucotfo.”
