Taga 15:1-33
15 Imphendvulo lepholile* iyayehlisa intfukutselo,+Kodvwa emavi lahlabako* ayamtfukutselisa umuntfu.+
2 Lulwimi lwalabahlakaniphile lukhuluma tintfo letihlakaniphile,+Kodvwa umlomo wetilima uhlale ukhipha emavi labulima.
3 Emehlo aJehova abona yonkhe indzawo,Futsi abuka bantfu lababi nalabalungile.+
4 Emavi lanemusa* afana nesihlahla sekuphila,+Kodvwa emavi lakhohlisako acedzana emandla.
5 Silima siyawedzelela umyalo wababe waso,+Kodvwa umuntfu lohlakaniphile uyalalela nakayalwa.*+
6 Kunemcebo lomnyenti endlini yemuntfu lolungile,Kodvwa lomubi wehlelwa yinhlekelele ngenca yenzuzo yakhe.+
7 Umlomo wemuntfu lohlakaniphile wandzisa lwati,+Kodvwa inhlitiyo yesilima ayisinjalo.+
8 Umhlatjelo wemuntfu lomubi uyenyanyeka kuJehova,+Kodvwa umthantazo wemuntfu lolungile uyamjabulisa Nkulunkulu.+
9 Jehova uyayenyanya indlela yalomubi,+Kodvwa uyamtsandza umuntfu lowetama kwenta lokulungile.+
10 Umuntfu loshiya indlela lelungile utfola sijeziso lesimatima,+Kodvwa lowenyanya kwekhutwa utawufa.+
11 Nangabe Jehova ababona bantfu labaseThuneni* nalabasendzaweni lapho kubolela khona tidvumbu,*+Kangakanani-ke ngaloko lokusetinhlitiyweni tebantfu?+
12 Umuntfu lowedzelelako akamtsandzi umuntfu lomekhutako,+Akabuti nakubantfu labahlakaniphile.+
13 Inhlitiyo lejabulile yenta buso bujabule,Kodvwa lusizi luyawephula umoya.+
14 Inhlitiyo lenekucondza ifuna lwati,+Kodvwa silima sihlale sidla bulima.+
15 Onkhe emalanga emuntfu lohluphekako mabi,+Kodvwa loyo lonenhlitiyo lejabulako uhlale ajabulile onkhe malanga.*+
16 Kuncono kuba nalokuncane ube wesaba Jehova+Kunekutsi ube nemcebo lomnyenti ube ukhatsatekile.*+
17 Kuncono kudla tibhidvo kube kunelutsandvo+Kunekudla inyama lenonile kube kunenzondo.+
18 Umuntfu losheshe atfukutsele ubanga kucabana,+Kodvwa umuntfu lowephuta kutfukutsela uletsa kuthula lapho kunembango khona.+
19 Indlela yelivila ifana netihlahla temanyeva letihlangene,+Kodvwa indlela yalabacotfo injengemgwaco lomkhulu futsi lobekile.+
20 Indvodzana lehlakaniphile iyamjabulisa babe wayo,+Kodvwa umuntfu losilima umbukela phansi make wakhe.+
21 Umuntfu longenangcondvo ujatjuliswa kwenta tintfo letibulima,+Kodvwa umuntfu lonekucondza uchubeka ahamba ngendlela lelungile.+
22 Emacebo akaphumeleli nangabe kute kubonisana,Kodvwa ayaphumelela nangabe kunebeluleki labanyenti.+
23 Uyajabula umuntfu lophendvula kahle,+Futsi emavi lakhulunywe ngesikhatsi lesikahle amnandzi kakhulu.+
24 Umuntfu lonekucondza uhamba endleleni yekuphila,+Futsi uyayibalekela indlela leyehlela eThuneni.*+
25 Jehova utayidzilita indlu yemuntfu lotigcabhako,+Kodvwa utayilondvolota imincele yendzawo yemfelokati.+
26 Jehova uyawenyanya emacebo emuntfu lomubi,+Kodvwa uyawatsandza emavi lamnandzi.+
27 Umuntfu lowetama kutfola imali ngekungetsembeki uletsela umndeni wakhe inhlekelele,+Kodvwa umuntfu lokwenyanyako kudizelwa utawuchubeka aphila.+
28 Umuntfu lolungile ucale acabange enhlitiyweni yakhe asengakaphendvuli,*+Kodvwa umlomo walababi uhlala ukhipha tintfo letimbi.
29 Jehova ukhashane nebantfu lababi,Kodvwa uyawuva umthantazo walabalungile.+
30 Buso lobujabulile benta inhlitiyo ijabule;Umbiko lomuhle unikana emandla.+
31 Umuntfu lolalela siyalo lesiniketa kuphilaUtiva asekhaya nakanebantfu labahlakaniphile.+
32 Umuntfu longasemukeli siyalo wenyanya kuphila kwakhe,+Kodvwa loyo lolalelako nakekhutwa utfola kucondza.+
33 Kwesaba Jehova kufundzisa umuntfu kutsi ahlakaniphe,+Futsi kutfobeka kwenta umuntfu advunyiswe.+
Imibhalo lengentansi
^ Nobe “labuhlungu.”
^ Nobe “lenemusa.”
^ Nobe “Emavi laphilisako.”
^ Nobe “nakekhutwa.”
^ Nobe “labaseShiyoli,” lokusho lithuna lebantfu. Fundza Tinchazelo Temagama.
^ Nobe “nalabase-Abhadoni.”
^ Nobe “ujabula kube shengatsi uba nelidzili onkhe malanga.”
^ Nobe “udidekile.”
^ Nobe “eShiyoli,” lokusho lithuna lebantfu. Fundza Tinchazelo Temagama.
^ Nobe “uyacabangisisa ngekutsi utawuphendvula njani; uyacabanga asengakakhulumi.”
