Taga 16:1-33
16 Umuntfu uyakulawula lokusenhlitiyweni yakhe,Kodvwa loko lakushoko* kuvela kuJehova.+
2 Tonkhe tintfo umuntfu latentako tibonakala tilungile kuye,+Kodvwa Jehova uhlolisisa tisusa temuntfu.+
3 Shiyela kuJehova konkhe lokwentako,*+Nawenta njalo emacebo akho atawuphumelela.
4 Jehova wenta kutsi tonkhe tintfo tigcwalise injongo yakhe,Ngisho nalomubi umbekele lilanga lenhlekelele latawubhujiswa ngalo.+
5 Jehova uyamenyanya umuntfu lotiphakamisako.+
Futsi nakanjani umuntfu lonjalo utawujeziswa.
6 Nangabe umuntfu anelutsandvo lolucotfo futsi etsembekile,* emaphutsa akhe angatsetselelwa,+Nekwesaba Jehova kwenta umuntfu akubalekele lokubi.+
7 Nangabe Jehova ayitsandza indlela umuntfu laphila ngayo,Wenta kutsi titsa talomuntfu tibe nekuthula naye.+
8 Kuncono kuba nalokuncane ube ulungile+Kunekutsi unjinge kepha ube ungaketsembeki.+
9 Umuntfu angacabangisisa ngaloko lafuna kukwenta,Kodvwa nguJehova locondzisa tinyatselo takhe.+
10 Tincumo taNkulunkulu kufanele tihlale tisemlonyeni wenkhosi;+Futsi kufanele ikhombise kutsi yetsembekile nayikhipha sincumo.+
11 Tikali letingito tivela kuJehova;Futsi tonkhe tisindvo letisesikhwameni tasungulwa nguye.+
12 Emakhosi ayatenyanya tento letimbi,+Ngobe sihlalo sebukhosi sisinyiswa ngekulunga.+
13 Emakhosi ajatjuliswa ngemavi lalungile,Futsi ayamtsandza umuntfu lokhuluma liciniso.+
14 Intfukutselo yenkhosi injengesitfunywa lesitfunyelwe kuyobulala,+Kodvwa umuntfu lohlakaniphile uyati kutsi angayibohlisa* njani.+
15 Nangabe inkhosi imentela umusa umuntfu, loyo muntfu utawuphila kamnandzi;Umusa wayo ufana nelifu leliletsa imvula entfwasahlobo.+
16 Kuncono kakhulu kutfola kuhlakanipha kunekutfola ligolide!+
Kutfola kucondza kuncono kakhulu kunekutfola lisiliva.+
17 Bantfu labacotfo bayatibalekela tindlela letimbi.
Umuntfu logadza indlela yakhe ulondvolota kuphila kwakhe.+
18 Kutigcabha kuholela enhlekeleleni,Nekutiphakamisa kuholela* ekuweni.+
19 Kuncono kutfobeka futsi utihlanganise nalabatfobekile+Kunekutsi ugiyelane umcebo* nebantfu labatigcabhako.
20 Umuntfu lokhombisa kucondza endzabeni letsite utawuphumelela,*Futsi uyajabula loyo lowetsembela kuJehova.
21 Bantfu batawubona kutsi umuntfu lohlakaniphile unelikhono lekucondza,+Futsi umuntfu lokhuluma ngendlela lenemusa* nguye lolalelwako.+
22 Kucondza kungumtfombo wekuphila kulabo labanako,Kodvwa tilima tijeziswa bulima bato.
23 Umuntfu lohlakaniphile uwakhetsa ngekuhlakanipha emagama+Futsi indlela lakhuluma ngayo yenta bantfu bawakholwe emavi akhe.
24 Emavi lamnandzi afanana neluju loluntfontsako,Ayanongotela futsi acinisa umtimba.*+
25 Umuntfu ubona indlela acabange kutsi ikahle,Kani ekugcineni iholela ekufeni.+
26 Kufuna kudla kwenta umuntfu asebente kamatimaNgobe indlala* ngiyo lesuke imchuba.+
27 Umuntfu longasilusito lwalutfo wakha emacebo lamabi;+Emavi akhe afana nemlilo lovutsa emalangabi.+
28 Umuntfu loyinkinga* ubanga kungevani,+Futsi umnyundzeli wehlukanisa bangani labakhulu.+
29 Umuntfu losidlova uyenga makhelwane wakheFutsi amholele endleleni lembi.
30 Ufica liso nakakha emacebo lamabi.
Wenta shengatsi uyamamatseka njengobe enta tintfo letikhohlakele.
31 Timvu enhloko tingumchele webuhle*+Nangabe titfolwa ngumuntfu lohamba endleleni lelungile.+
32 Umuntfu lowephuta kutfukutsela+ uncono kunemuntfu lonemandla,Futsi lolawula intfukutselo yakhe uncono kunaloncoba lidolobha.+
33 Ngisho nobe umuntfu angenta inkatho,*+Kodvwa umphumela wayo uncunywa nguJehova.+
Imibhalo lengentansi
^ Nobe “imphendvulo lekahle.”
^ NgesiHebheru kutsi, “Gicitela kuJehova konkhe lokwentako.”
^ NgesiHebheru loku kungaphindze kusho lutsandvo lolucotfo lwaNkulunkulu nekwetsembeka kwakhe.
^ Nobe “angayibalekela.”
^ NgesiHebheru kutsi, “Nemoya wekutiphakamisa uholela.”
^ Nobe “nigiyelane umcebo leniwutsetse kulabanye.”
^ NgesiHebheru kutsi, “utawutfola lokuhle.”
^ Nobe “lokhuluma emavi lamnandzi.”
^ NgesiHebheru kutsi, “elapha ematsambo.”
^ NgesiHebheru kutsi, “umlomo.”
^ Nobe “lolicili.”
^ Nobe “weludvumo.”
^ NgesiHebheru kutsi, “angenta inkatho ematsangeni,” lokusho incenye yengubo lembonya imilente yemuntfu nakahleti.
