Taga 31:1-31
31 Lawa ngemavi eNkhosi Lemuweli. Lamavi lanemlayeto lobalulekile ashiwo ngumake wayo kuze ayifundzise:+
2 Yini lokufanele ngikutjele yona ndvodzana yami,Ngumaphi emavi lengingakutjela wona ndvodzana yami leyaphuma esiswini sami,Futsi yini lengingayisho kuwe, wena ndvodzana yami lengenta sifungo ngayo?+
3 Ungabavumeli bantfu labasikati+ bacedze emandla akho,Nobe ulandzele indlela yekuphila lebulala emakhosi.+
4 Awu Lemuweli, akuwafaneli emakhosi,Akuwafaneli emakhosi kunatsa liwayiniFutsi akubafaneli babusi kutsi batsi: “Siphi sinatfo sami?”+
5 Ngobe nakungenteka banatse batawubese bakhohlwa imitsetfo lebekiweFutsi bangawahloniphi emalungelo alabahluphekile.
6 Banike tjwala labo labashabalalako+Futsi ubanikete liwayini labo labacindzeteleke kakhulu.+
7 Bayekele banatse futsi bakhohlwe buphuya babo;Bayekele bakhohlwe netinkinga tabo.
8 Bakhulumele labo labangakhoni kutikhulumela;Vikela emalungelo abo bonkhe labashabalalako.+
9 Khuluma futsi wehlulele ngekulunga;Vikela emalungelo alabahluphekile nalabaphuyile.+
א [Aleph]
10 Ngubani nje longatfola umfati lonebuntfu lobuhle?*+
Uligugu kakhulu kwendlula ematje laligugu aselwandle.
ב [Beth]
11 Indvodza yakhe imetsemba ngenhlitiyo yayo yonkhe,Futsi inako konkhe lekudzingako.
ג [Gimel]
12 Uyentela lokuhle, hhayi lokubi,Kuko konkhe kuphila kwakhe.
ד [Daleth]
13 Utfola indvwangu lenhle kanye nelineni;Futsi uyakutsandza kusebenta ngetandla takhe.+
ה [He]
14 Ufana nemikhumbi yemtsengisi,+Kudla kwakhe ukulandza khashane.
ו [Waw]
15 Uvuka kusesebusuku,Alungisele umndeni wakhe kudlaAnikete netincekukati+ takhe kudla.*
ז [Zayin]
16 Utsi angacabangisisa ngensimu bese uyayitsenga;Ulima insimu yemagilebisi ngalakusebentele ngetandla takhe.*
ז [Heth]
17 Uyatilungiselela kuze asebente kamatima,*+Futsi ucinisa netandla takhe.
ט [Teth]
18 Uyabona kutsi umsebenti wakhe umletsela inzuzo;Nasebusuku sibane sakhe asicimi.
י [Yod]
19 Wenta indvwangu,Ayente ngetandla takhe.*+
כ [Kaph]
20 Usita labeswele,Futsi ubapha ngesandla lesivulekile labaphuyile.+
ל [Lamed]
21 Akakhatsateki ngemndeni wakhe nalikhitsikile,Ngobe umndeni wakhe wonkhe wembetse timphahla letifutfumele.
מ [Mem]
22 Uyatentela tindvwangu tekumbonya umbhedze.
Timphahla takhe tentiwe ngelineni nangendvwangu lebukhwebeletane.*
נ [Nun]
23 Indvodza yakhe yatiwa kakhulu emagedeni elidolobha,+Lapho ihlala khona nemadvodza lamadzala aseveni.
ס [Samekh]
24 Utfunga timphahla* telineni futsi atitsengiseAkhe nemabhande bese uwatsengisela batsengisi.
ע [Ayin]
25 Unesibindzi futsi uhlonishwa nangulabanye,Nelikusasa akalesabi.*
פ [Pe]
26 Emlonyeni wakhe kuphuma emavi ekuhlakanipha;+Ukhuluma ngemusa nakafundzisa.*
צ [Tsade]
27 Ukubuka konkhe lokwentiwa ekhaya lakhe,Futsi akavilaphi.+
ק [Qoph]
28 Bantfwana bakhe bayasukuma futsi bamdvumise;Nendvodza yakhe isukume futsi imdvumise itsi:
ר [Resh]
29 “Banyenti bafati labanebuntfu lobuhle,*Kodvwa wena ubendlula bonkhe.”
ש [Shin]
30 Kubukeka kahle kuyakhohlisa, nebuhle buyaphela,*+Kodvwa umfati lowesaba Jehova utawudvunyiswa.+
ת [Taw]
31 Mbonge ngaloko lakwentako,*+Futsi umsebenti wakhe awumdvumise emagedeni elidolobha.+
Imibhalo lengentansi
^ Nobe “umfati sibili.”
^ Kungaphindze kubekwe ngekutsi, “imisebenti.”
^ Nobe “ngemali latisebentele yona.”
^ NgesiHebheru kutsi, “ucinisa tingculu takhe.”
^ Nobe “usebentisa tingodvo tekwenta umtiya.”
^ NgesiNgisi kutsi “purple.”
^ Nobe “timphahla letigcokwa ngephansi.”
^ Nobe “Uyahleka nakacabanga ngelikusasa.”
^ NgesiHebheru kutsi, “Umtsetfo wemusa uselulwimini lwakhe.”
^ Nobe “bafati sibili.”
^ Nobe “bulite.”
^ NgesiHebheru kutsi, “Mnikete titselo tetandla takhe.”
