Tihlabelelo 145:1-21
Ingoma yaDavide yekudvumisa.
א [Aleph]
145 Awu Nkulunkulu loyiNkhosi yami,+ mine ngitakudvumisa,Ngitawudvumisa libito lakho kuze kube phakadze.+
ב [Beth]
2 Ngitakudvumisa onkhe malanga;+Ngitawudvumisa libito lakho kuze kube phakadze.+
ג [Gimel]
3 Jehova mkhulu futsi kumfanele mbamba kudvunyiswa;+Kute longabucondza bukhulu bakhe.+
ד [Daleth]
4 Titukulwane ngetitukulwane titawudvumisa imisebenti yakho;Titawumemetela ngemisebenti yakho lemikhulu.+
ה [He]
5 Titawukhuluma ngebuhle bebukhosi bakho lobukhatimulako,+Futsi mine ngitawucabangisisa ngemisebenti yakho lemangalisako.
ו [Waw]
6 Titawukhuluma ngemisebenti* yakho lemangalisako,Futsi mine ngitawumemetela ngebukhulu bakho.
ז [Zayin]
7 Emavi ato ekudvumisa bukhulu bebuhle bakho atawugeleta njengemfula,+Futsi titawumemeta tijabulile ngobe wena ulungile.+
ח [Heth]
8 Jehova uneluvelo* futsi unesihawu,+Uyephuta kutfukutsela futsi uchichima lutsandvo lolucotfo.+
ט [Teth]
9 Jehova muhle kubo bonkhe,+Nemusa wakhe uyabonakala kuko konkhe lakwentako.
י [Yod]
10 Awu Jehova, yonkhe imisebenti yakho itakukhatimulisa,+Nalabetsembekile bakho batakudvumisa.+
כ [Kaph]
11 Batawumemetela ngekukhatimula kwebukhosi bakho+Futsi bakhulume ngemandla akho,+
ל [Lamed]
12 Kuze bantfu bati ngemisebenti yakho lemikhulu+Nangebuhle bebukhosi bakho lobukhatimulako.+
מ [Mem]
13 Bukhosi bakho butawuhlala bukhona kuze kube phakadze,Futsi kubusa kwakho kutawuhlala kukhona kuto tonkhe titukulwane.+
ס [Samekh]
14 Jehova uyabasita bonkhe labawako,+Aphakamise bonkhe labacindzetelekile.+
ע [Ayin]
15 Tonkhe tintfo letiphilako tetsembele kuwe;Utinika kudla ngesikhatsi lesifanele.+
פ [Pe]
16 Uvula sandla sakho,Unike tonkhe tintfo letiphilako loko letikufisako.+
צ [Tsade]
17 Jehova uhlale enta lokulungile+Futsi wetsembekile kuko konkhe lakwentako.+
ק [Qoph]
18 Jehova usedvute nabo bonkhe labambitako,+Usedvute nabo bonkhe labambita ngeliciniso.*+
ר [Resh]
19 Wenetisa tifiso talabo labamesabako;+Uyabeva nabakhalela lusito futsi abakhulule.+
ש [Shin]
20 Jehova uyabavikela bonkhe bantfu labamtsandzako,+Kodvwa utabacotfula bonkhe lababi.+
ת [Taw]
21 Ngitawumemetela ngeludvumo lwaJehova;+Konkhe lokuphilako akudvumise libito lakhe lelingcwele, kuze kube phakadze.+
